Amos 9 - The Holy Bible In Alur (Lur) Revised Orthography

Ka Both Umbe ni Pokolembe pa Yehova

¹ Aneno Rwoth ucungo ng’et pemblam: man ewacu kumae, Goi lak akara, kara kamondo yengre; man iturgi nziki nziki i wigi kagi ceke; e abinego donge m’udong’ ku palamularu: ng’atu moko mbe mi kindgi ma bipiei, man ng’atu moko mbe mi kindgi ma biboth.

² Kadok gikuny i liel, cinga bigamugi ku kuca; man kadok giidho malu i polo, abidwokogi piny ku kuca.

³ Man kadok gipondo wi usimbru Karmel, abiyenyo man abikabugi ku kuca; man kadok gipondo ni wang’a the nam, abing’olo ni thwol ku kuca, e ebitong’ogi.

⁴ Man kadok gicidho i ng’eca i wang’ judegi migi, abing’olo ni palamularu ku kuca, e ebinegogi: man abiketho wang’a i kumgi mi lem ma rac, man mi lem ma ber ungo.

⁵ Kum Rwoth, Yehova mir udul, en e ng’atu ma mulo ng’om e eloi, man dhanu ceke m’ubedo i ie biywak; e ebipong’ calu Kulo, man ebidok kendo, calu Kulo mi Misiri;

⁶ en e ng’atu m’ugomo kusika pare i polo, man eketho girauma pare i ng’om; en e ng’atu ma lwong’o pi mi nam, man ekonjogi woko wi wang’ ng’om; Yehova en e nyinge.

⁷ Wun wu calu nyithindho mi Juethiopia ira, E nyithindho mir Israeli? Yehova wacu. Awodho nyithindho mir Israel ungo kud i ng’om Misiri, man Jufilisti kud i Kaftor, man Jucami kud i Kiri?

⁸ Nen, wang’ Rwoth Yehova ni wi ker mi dubo, man abinyothe kud i wang’ ng’om; ento abinyotho ot pa Yakobo kot ungo.

⁹ Kum, nen, abing’olo, man abiyeko ot mir Israel i kind thek ceke, calu juyeko cam i jambyeko, ento nying’ cam acel bipodho wi ng’om ungo.

¹⁰ Judubo ceke mi dhanu para bitho ku palamularu, m’uwacu kumae, Lem ma rac birubowa ngo kadi birombo kudwa de ngo.

Jubidwoko Israel Kendo

¹¹ I ceng’ maeca abiting’o hema pa Daudi m’upodho, man abiculo ka in’umome; man abiting’o gire m’ubam malu, e abigome calu i ceng’ ma con;

¹² kara gimwony dong Edom, ku thek ceke m’ulwongre ku nyinga, Yehova m’utimo maeni wacu.

¹³ Nen, ceng’ ubino, Yehova wacu, nia jafur birubo janyar, man janyon nyingulok birubo jacoi kodhi; man gudi bitono pigulok ma mit, e ungulu gudi ceke biloi.

¹⁴ Man abidwoko ng’eca mi dhanu para Israel, e gibigomo adhura m’ubedo ni uvuru, man gibibedo i igi; man gibipidho podho mir ulok, man gibimadhu pigulokne; gibitimo pothi bende, man gibicamu nying’gi.

¹⁵ E abipidhogi wi ng’om migi, man jubikabugi kendo ngo kud i ng’om migi m’amio igi, Yehova Mungu peri wacu.