Amos 6 - The Holy Bible In Alur (Lur) Revised Orthography

Nyoth mi Israel

¹ Can wi ju m’ubedo yo i Sayuni, man ni ju m’ubedo museme kum got mi Samaria, dhanu ma pigi yik mi thek ma kwong’a, ma ot mir Israel ubino i bang’e!

² Wukadh ba Kalne, e wunen; man ugambre kuca wucidh ba Hamath ma dit; wulund wulor piny ba Gath mi Jufilisti: gi ber ma sagu thek maeni? kadi kieu migi dit ma sagu kieu mu?

³ wun ma wucoro ceng’ ma rac bor, man wuketho kom mi rop ubino ceng’ni;

⁴ gi ju ma givuto wi kavuto mi lakliec, ma girieiri gigi de wi kabedo migi, ma gicamu nyithi rombe de ku i udul, ku nyithi dhiang’ kud i die dwol;

⁵ ma giwero wer mananu ku badwal mi dongo; man gicwio jamb wer mi badwal igi gigi, calu Daudi;

⁶ ma gimadhu pigulok i tabu, ma giwiri gigi de ku mo m’usagu; ento can unegogi ngo kum masendi pa Yusuf.

⁷ Ka kumeno kawono gibicidho i ng’eca karacelo ku ju m’ular ucidho i ng’eca, man woi mi ju m’urieyo kumgi bikadhu woko.

⁸ Rwoth Yehova kwong’o kude gire, Yehova, Mungu mir udul, uwacu kumae: Adagu dwong’ pa Yakobo, man adagu udi pare ma beco; ka kumeno abimio adhura ku gin ceke ma ni ie.

⁹ Man ebitimbre, tek dhanu ma co apar udong’ i ot acel, nia gibitho.

¹⁰ Man kinde ma neru ng’atu moko biting’e malu, en e ng’atu m’uwang’e, kara ewodh cogo woko kud i ot, m’ebiwacu de ni ng’atu ma ni i kusika mi ot kumae, Jumoko fodi ni i beng’i? man ebidwoko lembe kumae, Ungo; ebilund wacu kumae, Bed ling’; kum wacopo weco pi nying’ Yehova ngo.

¹¹ Kum, nen, Yehova ng’olo, e jubigoyo ot ma dit ku moropiny, man ot ma nok ku tucopiny.

¹² Riuni biringo wi cana? ng’atu moko bifuro kuca ku koni dhiang’i? ma nia wulok pokolembe ni ulecu, man nying’ bedopwe ni yendadra;

¹³ wun ma anyong’a negowu kum gin mananu, ma wuwacu kumae, Wagamu tung iwa ku tego mwa ma dhe ngo?

¹⁴ Kum, nen, abiting’o thek i kumwu, E ot mir Israel, Yehova, Mungu mir udul, uwacu; man gibisendowu gambre i kamondo mi Hamath cil kum kulo mir Araba.