Amos 5 - The Holy Bible In Alur (Lur) Revised Orthography

Lwong’o ni Lokri

¹ Wuwinj lembe maeni m’ating’o mi ywak i wiwu, E ot mir Israel.

² Nyaku ma ng’won mir Israel upodho; ebiai kendo ngo: juredhe piny wi ng’om pare; ng’atu moko mbe m’uting’e malu.

³ Kum Rwoth Yehova wacu kumae: Adhura ma wok woko rubanga donge bidong’ dak, man ma wok woko dak donge bidong’ apar, ni ot mir Israel.

⁴ Kum Yehova wacu kumae ni ot mir Israel, Wuyenya, e wuibedo kwo;

⁵ ento kud wuyeny Beth-el, kadi kud wumond i Gilgal, man kud wukadh i Ber-ceba: kum Gilgal bicidho i ng’eca andha, man Beth-el bidoko gin mananu.

⁶ Wuyeny Yehova, e wubibedo kwo: emaru moc calu mac i ot pa Yusuf, man ewang’ piny, e ng’atu moko mbe ma binege i Beth-el.

⁷ Wun ma wuloko pokolembe ni yendadra, man wubayu bedopwe i ng’om.

⁸ Wuyeny ng’atu m’utimo cero ma Kilimia kud Orion, man m’uloko tipo mi tho ni kugweno, man m’udwoko ceng’ col ku diewor; m’ulwong’o pi mi nam, man m’ukonjogi woko i wang’ ng’om (Yehova en e nyinge);

⁹ m’ukelo nyoth pio wi jatego, ketho nia nyoth ubino wi ka ma tek.

¹⁰ Gidagu ng’atu m’ujuko i dhugang’ man gidagu ng’atu ma weco atira.

¹¹ Ka kumeno kum wunyono jacan, man wugamu girawodha mi nganu i bang’e: wugomo udi mi kidi m’apaya, ento wubibedo i igi ngo; wupidho podho mir ulok ma ber, ento wubimadhu pigulokne ngo.

¹² Kum ang’eyo maram gondri mu dit ko, man maram dubo mu tek ko, wun ma wusendo ju ma pwe, ma wugamu jamng’om, ma wuroco jacanpiny i dhugang’.

¹³ Ka kumeno ng’atu ma paru lembe biling’ i nindo ma kumeni; kum en e nindo ma rac.

¹⁴ Wuyeny gin ma ber, gin ma rac re ngo, kara wubed kwo; e kumeno Yehova, Mungu mir udul, bibedo kudu, calu wuwacu.

¹⁵ Wudag gin ma rac, man wumar gin ma ber, man wuketh pokolembe ma pwe i dhugang’: kuno nyo Yehova, Mungu mir udul, bitimo ku bero kum dong’ Yusuf m’udong’.

¹⁶ Ka kumeno Yehova, Mungu mir udul, ma Rwoth, uwacu kumae: Ywak bibedo i gengi ceke: man gibiwacu kumae i wang’ayo ceke, Akayo! akayo! man gibilwong’o jatipodho ba ywak man wadi ju ma gi riek ku ywak ni goyonduru.

¹⁷ Man ywak bibedo nuti i podho mir ulok ceke; kum abikadhu kud i kindi, Yehova wacu.

¹⁸ Can i wiwu wun ma wuyenyo ceng’ pa Yehova! Pirang’o wuyenyo wubed ku ceng’ pa Yehova? En e mudho, der ungo.

¹⁹ Calu tek dhanu ringo ni umvor, e girombo ku wai; kadi tek emondo i ot man ejengo cinge kor ot, e thwol utong’e.

²⁰ Ceng’ pa Yehova bibedo mudho ngo, man der ungo ngo? en e mudho ma bii ngo, man leropiny moko mbe i ie ngo?

²¹ Adagu, acayu agba mu, man anyong’a binega ki ngo kum cokri mu mi rwo.

²² Eyo, kadok wuthiero ira lam m’awang’a mu ku lam mi mogo mu, abijologi ngo; kadok lam mi kwiocwiny mu mi lim mu m’ucwe de abiparu pire ngo.

²³ Kab badwal mi wer peri cen kud i kuma; kum akwero winjo badwand dongo mu.

²⁴ Ento wek pokolembe mol piny calu pi, man bedopwe calu kulo ma dit.

²⁵ Wukelo lam man lam mi mogo i bang’a i langa rundi pier ang’wen, E ot mir Israel?

²⁶ Eyo, wuyeyo hema mir ubimo mu ku sanduk mir ayi gin m’acwia mu, en e cero mi mungu mu, ma wutimo iwu giwu.

²⁷ Ka kumeno abiketho wucidho i ng’eca loka Dameski, Yehova wacu, ma nyinge Mungu mir udul.