Amos 4 - The Holy Bible In Alur (Lur) Revised Orthography

¹ Wuwinj lembe maeni, wu dhiang’ mi Bacan, ma ni wi got mi Samaria, m’usendo jucan, m’unyono jucanpiny, m’uwacu ni rwodhigi kumae, Wukel, man wek wamadhi.

² Rwoth Yehova kwong’o ku leng’ pare, nia, nen, nindo bibino i wiwu, ya gibiyakuwu ku gol, man dongwu m’udong’ ku gol mi rec.

³ Man wubiwok woko ku ka m’umor, ku ba dhanu ng’atuman atira i wang’e; man wubibeiru i Harmon, Yehova wacu.

Israel Upoi Ngo kum Lembapoka pa Mungu

⁴ Wubin ba Beth-el, man wudubi; ba Gilgal, man wumed dubo; man wukel lam mu ku ba rupiny ku ba rupiny, man apaje ma ku ba ceng’ adek ku ba ceng’ adek;

⁵ man wuthier lam mi foc mi gin ma ie ju thobi, man wuyer pi lam mi berocwiny man wurwei pigi: kum maeni nyayu mutoro i iwu, E nyithindho mir Israel, Rwoth Yehova wacu.

⁶ An bende amio iwu leng’ mi lak i adhura mu ceke, ku can kwen i kakewu ceke; ento wulokru ngo i bang’a, Yehova wacu.

⁷ Man acero koth bende iwu, ma fodi dwi mi mwoka dong’ adek; man aketho koth ucwi wi adhura acel, e acere ku cwi wi adhura mange: koth ucwi wi ng’et ng’om acel, e ng’et ng’om ma koth ucwi ngo i wie ener.

⁸ Kum kumeno adhura ario kadi adek gicidho bang’ adhura acel kara gimadh pi, e eromogi ngo: ento wudwogo ngo i bang’a, Yehova wacu.

⁹ Agoyowu ku motho man laimo: ukoko camu udul pothi mu man podho mir ulok mu ku yendubolo mu man yendulam mu: ento wudwogo ngo i bang’a, Yehova wacu.

¹⁰ Aoro thong’om i kindwu calu mi Misiri: anego awobi mu ku palamularu, man ayaku riuni mu; man aketho ng’wic piny ma rac mi kagonjo mu idho malu cil i odiumwu: ento wudwogo ngo i bang’a, Yehova wacu.

¹¹ Ang’ielo adhura i kindwu, calu kinde ma Mungu ng’ielo Sodom ku Gomora, e wubedo calu dhumac ma juyudho kud i mac: ento wudwogo i bang’a ngo, Yehova wacu.

¹² Ka kumeno abitimo kumeni i beng’i, E Israel; man kum abitimo maeni i beng’i, yikri mi rombo ku Mungu peri, E Israel.

¹³ Kum, nen, ng’atu m’ung’ino gudi, m’ucwio yamu de, man m’uyero ni dhanu maram pidoic pare bedo ko; m’uloko kugweno ni mudho, man m’unyono ka ma malu mi ng’om, Yehova, Mungu mir udul, en e nyinge.