Amos 3 - The Holy Bible In Alur (Lur) Revised Orthography

Tic pa Jabila

¹ Wuwinj lembe maeni ma Yehova yero i kumwu, E nyithindho mir Israel, kum juot dho m’awodhowu woko kud i Misiri, ewacu kumae,

² Ang’eyowu wu kendwu i kind juudi ceke m’i ng’om: ka kumeno abiliewo kier mu ceke i kumwu.

³ Juario biwotho karacelo, tek gikuripo pire ngo?

⁴ Umvor birundo i luli, kinde ma amaci moko mbe kude? nyathin umvor biywak kud i ode, tek k’egamu gin moko ngo?

⁵ Winyo copo podho i uwic wi ng’om, ka ma juciko ie uwic ungo ire? uwic bituk kud i ng’om, tek k’emaku gin moko ngo?

⁶ Jubikudho agwara i adhura, ma lworo kunego dhanu ngo? lem ma rac bipodho kum adhura, ma Yehova kutime en ungo?

⁷ Andha Rwoth Yehova bitimo gin moko ngo, tek k’enyutho lembamung’a pare ngo ni jutic pare ma jubila.

⁸ Umvor rundo; ng’a ma lworo binege ngo? Rwoth Yehova yero; ng’a ma kueu lembe ngo?

Pokolembe wi Samaria

⁹ Wurwei lembe i udi mi ker mi Acdod, man i udi mi ker mi ng’om Misiri, man wuwac kumae, Wucokru giwu wi gudi mi Samaria, man wunen maram yakni bedo ko dit i ie, man maram masendi bedo ko i kinde.

¹⁰ Kum ging’eyo timo ber ungo, Yehova wacu, gi ju ma gikanu rop kud ayeki i udi mi ker migi.

¹¹ Ka kumeno Rwoth Yehova wacu kumae: Jasend bibedo nuti, en e i ng’et ng’om gbur; man ebiwodho tego kud i beng’i piny, e jubiyaku udi mi ker peri.

¹² Yehova wacu kumae: Calu jakwac bodho tiend lim ario kud i dhu umvor, kadi ng’et ith, e nyithindho mir Israel biboth kumeca m’ubedo i Samaria i gui mi kavuto, man i Dameski i kabedo.

¹³ Wuwinji, man wutuc lembe kum ot pa Yakobo, Rwoth Yehova, Mungu mir udul, uwacu.

¹⁴ Kum i nindo m’abiliewo gondri mir Israel i wie, abiliewo pemblam mi Beth-el bende; man tung pemblamne bithumbre woko, man gibipodho i ng’om.

¹⁵ Man abigoyo ot mi dwij koyo ku ot mi dwij lietho; e udi mi lakliec binyothre, man udi ma dongo bithum, Yehova wacu.