Ai 9 - The Holy Bible In Alur (Lur) Revised Orthography

Masendi wi Lim

¹ Yehova lund uwacu ni Musa kumae, Mond ba Farao, man iwac ire kumae, Yehova, Mungu mi Juebrania, uwacu kumae, Wek dhanu para gicidhi, kara gitim ira.

² Kum tek ikwero weko gicidhi, man icerogi asu,

³ nen, cing’ Yehova ni wi lim peri ma gini i thim, wi riuni, wi kana, wi ngamia, wi udul lim, man wi udul rombe: thong’om ma rac dit bibedo nuti.

⁴ E Yehova bikoyo lim mir Israel ku lim mi Misiri; man gin moko mbe ma bitho ma en e mi nyithindho mir Israel.

⁵ E Yehova ng’olo nindo ma juketho, ewacu kumae, Urwo Yehova bitimo gin maeni i ng’om.

⁶ E Yehova timo gin maeno urwone; man lim ceke mi Misiri tho; ento lim mi nyithindho mir Israel acel de mbe m’utho.

⁷ E Farao oro kwenda, man, nen, kind lim mi Juisraeli acel de mbe m’utho. Ento adunde Farao bedo tek, e ekwero weko dhanu cidhi.

Masendi mi Vur

⁸ E Yehova wacu ni Musa man ni Harun kumae, Wugam vuru mir uka pong’ cing’, man wek Musa kire yor i polo i wang’ Farao.

⁹ E ebidoko ni ng’ili utur i ng’om Misiri ceke, man ebibedo ni vur ma luro kum dhanu man kum lim, i ng’om Misiri ceke ndri.

¹⁰ E gigamu vuru mir uka, man gicungo i wang’ Farao; e Musa kire malu yor i polo; man edoko ni vur ma luro kum dhanu man kum lim.

¹¹ E weg ajoga copo cungo i wang’ Musa ngo ni kum vurne; kum vur ni i kum weg ajoga, man i kum Jumisiri ceke.

¹² E Yehova dwoko adunde Farao nwang’, man ewinjo gi ngo; calu Yehova yero ni Musa.

Masendi mi Pei

¹³ Man Yehova wacu ni Musa kumae, Ai pir kugweno, man icung i wang’ Farao, man iwac ire kumae, Yehova, Mungu mi Juebrania, uwacu kumae, Wek dhanu para gicidhi, kara gitim ira.

¹⁴ Kum i kinde maeni abioro masendi para ceke wi adundeni, man wi jutic peri, man wi dhanu peri; kara ing’ei nia ng’atu moko mbe i ng’om ngung’ ma calu an.

¹⁵ Kum kuno di i nindo maeni arieyo cinga, man agoi ku dhanu peri ku thong’om, man kuno di jukebi woko kud i ng’om:

¹⁶ ento andha pi lembe maeni aketho icungo, kara anyuth iri tego para, man kara juyer pi nyinga i ng’om ngung’.

¹⁷ Fodi itingri asu kum dhanu para, ketho ikwero weko gicidhi?

¹⁸ Nen, urwo unyoni abikonjo pei ma rac dit, wadi ma fodi ubedo mbe i Misiri ugambre i ceng’ ma juketho ecungo i ie cil kawono de.

¹⁹ Ka kumeno kawono or kwenda, ucok lim peri pio ku gin ceke m’ibedo ko i thim; kum ku ba dhanu ceke ku lim de ma junwang’u i thim, ma jukelo pacu ngo, pei bicore i wigi, e gibitho.

²⁰ Ng’atu m’ulworo lembe pa Yehova i kind jutic pa Farao eketho jutic pare ku lim pare giringo i udi:

²¹ man ng’atu m’uparu pi lembe pa Yehova ngo eweko jutic pare ku lim pare i thim.

²² E Yehova wacu ni Musa kumae, Riei cingi yor i polo, kara pei bed nuti i ng’om Misiri ceke wi dhanu man wi lim, man wi uboko m’i thim kubang’e kubang’e i ng’om Misiri ndri.

²³ E Musa rieyo uluth pare yor i polo: man Yehova oro morpolo ku pei, e mac uloro piny i ng’om; man Yehova eoro pei wi ng’om Misiri.

²⁴ Kum kumeno pei nuti, man mac ubemoc i pei, gire rac dit, wadi ma fodi ubedo mbe i ng’om Misiri ceke ugambre m’edoko ni thek.

²⁵ E pei kilo gin ceke ma ni i thim i ng’om Misiri ndri, dhanu ku lim bende; e pei kilo uboko m’i thim kubang’e kubang’e, man eturo yen m’i thim kubang’e kubang’e.

²⁶ Pei mbe i ng’om Gocen kende, ka ma nyithindho mir Israel ni i ie.

²⁷ Man Farao oro kwenda, man elwong’o Musa giku Harun, man ewacu igi kumae, Adubo i nindo maeni: Yehova e pwe, man an ku dhanu para wa rac.

²⁸ Kwai Yehova; kum morpolo maeni pa Mungu romo man pei; man abiweko wucidhi, e wubidong’ kendo ngo.

²⁹ E Musa wacu ire kumae, Kinde m’abiai kud i adhura, abithang’u cinga i wang’ Yehova; e morpolo biling’, kadok pei de bibedo nuti kendo ngo; kara ing’ei nia ng’om en e pa Yehova.

³⁰ Ento ang’eyo piri ku jutic peri, nia fodi wubilworo Yehova Mungu ngo.

³¹ Man jugoyo pamba ku nganu ma ju yuke: kum nganu ma ju yuke ng’ok, pamba de thiwo.

³² Ento nganu ku nganu ma tung’ jugoyo ngo: kum fodi gidongo ngo.

³³ E Musa ai woko kud i adhura ku ba Farao, man ethang’u cinge i wang’ Yehova: e morpolo ku pei jik, man koth ukonjre ngo wi ng’om.

³⁴ E kinde ma Farao neno nia koth ku pei ku morpolo jik, edubo m’usagu, man edwoko adundene nwang’, en ku jutic pare.

³⁵ E adunde Farao doko nwang’, man eyio ngo nyithindho mir Israel ucidhi; calu Yehova yero ku dhu Musa.