Ai 8 - The Holy Bible In Alur (Lur) Revised Orthography

¹ E Yehova wacu ni Musa kumae, Mond ba Farao, man iwac ire kumae, Yehova wacu kumae, Wek dhanu para cidhi, kara gitim ira.

² Man tek ikwero weko gicidhi, nen, abigoyo kieu peri ceke kud ungwal:

³ e kulo bipong’ kud ungwal, ma biidho malu bimondo i udi peri de, man i kusika mi kavuto peri, man wi kavuto peri, man i udi mi jutic peri, man wi dhanu peri man i kendo peri, man i jambng’ino kwen peri:

⁴ ungwal bibino i wii de, man wi dhanu peri, man wi jutic peri ceke.

⁵ E Yehova wacu ni Musa kumae, Wac ni Harun kumae, Riei cingi kud uluth peri wi kulo, man wi pi, man wi kut, man keth ungwal uidh wi ng’om mi Misiri.

⁶ E Harun urieyo cinge wi pi mi Misiri; man ungwal uidho, e giumo ng’om mi Misiri.

⁷ E weg ajoga de gitimo kumeca kud ajoga migi, e gikelo ungwal wi ng’om Misiri.

⁸ Farao lund ulwong’o Musa giku Harun, man ewacu kumae, Wukwai Yehova, kara ekab ungwal woko kud i bang’a, man ku ba dhanu para; e abiweko dhanu cidho, kara gilam lam ni Yehova.

⁹ E Musa wacu ni Farao kumae, Bed ku dwong’ maeni i wia: ng’ol nindo m’abikwayu piri i ie, man pi jutic peri, man pi dhanu peri, kara ungwal unyothre kud i beng’i man kud i udi peri, man gidong’ i kulo kende.

¹⁰ E ewacu kumae, Urwo. Man ewacu kumae, Ebed calku lembe peri; kara ing’ei nia ng’atu moko mbe ma calu Yehova Mungu mwa.

¹¹ Man ungwal biai kud i beng’i, kud i udi peri de, man ku ba jutic peri, man ku ba dhanu peri; gibidong’ i kulo kende.

¹² E Musa giku Harun giai ku ba Farao: e Musa lwong’o Yehova pir ungwal m’ekelo wi Farao.

¹³ E Yehova timo calku lembe pa Musa; man ungwal utho kud i udi, kud i lelagang’, man kud i pothi.

¹⁴ E gicokogi ni ungu ungu; e ng’om ung’wi.

¹⁵ Ento ka Farao neno nia kayom nuti, edwoko adundene tek, man ewinjogi ngo; calu Yehova yero.

Masendi mi Nyogo

¹⁶ Man Yehova wacu ni Musa kumae, Wac ni Harun kumae, Riei uluth peri, man igoi utur mi ng’om, kara edok ni nyogo i ng’om mi Misiri ceke.

¹⁷ E gitimo kumeca; e Harun urieyo cinge kud uluth pare, man egoyo utur mi ng’om, e nyogo bedo nuti kum dhanu, man kum lim; utur ceke mi ng’om udoko ni nyogo i ng’om Misiri ceke ndri ndri.

¹⁸ E weg ajoga gitimo kumeca kud ajoga migi kara gikel nyogo, ento gicopo ngo: man nyogo bedo nuti kum dhanu, man kum lim.

¹⁹ Weg ajoga lund uwacu ni Farao kumae, Maeni lwet Mungu: e adunde Farao doko nwang’, man ewinjogi ngo; calu Yehova yero.

Masendi mir Ulwang’ni

²⁰ Man Yehova wacu ni Musa kumae, Ai pir kugweno, man icung i wang’ Farao; nen, ebino ba pi; man iwac ire kumae, Yehova wacu kumae, Wek dhanu para gicidhi, kara gitim ira.

²¹ Kadi, tek ikwero weko dhanu para cidhi, nen, abioro udul ulwang’ni i wii, man i wi jutic peri, man i wi dhanu peri, man i udi peri: e udi mi Jumisiri bipong’ kud udul ulwang’ni, ku ng’om bende ma gini i wie.

²² Man abikoyo ng’om Gocen i ceng’ maeca, ma dhanu para bedo i ie, kara udul ulwang’ni moko kud ubed kuca; kara ing’ei nia an a Yehova i die ng’om.

²³ Man abiketho apoka i kind dhanu para ku dhanu peri: giranyutha maeni bibedo nuti urwo.

²⁴ E Yehova timo kumeca; e udul ulwang’ni ma rac ubino i ot pa Farao, man i udi mi jutic pare: man i ng’om mi Misiri ceke ng’om unyothre ni kum udul ulwang’ni.

²⁵ E Farao lwong’o Musa giku Harun, man ewacu kumae, Wucidhi, wulam lam ni Mungu mu i ng’ombe.

²⁶ E Musa wacu kumae, Timo kumeno maku piny ungo; kum wabilamu lam mi ginmajudagu mi Jumisiri ni Yehova Mungu mwa: nen, wabilamu lam mi ginmajudagu mi Jumisiri i wang’gi, e gibicanyuwa ku kidi ngo?

²⁷ Wabicidho mi woth mi ceng’ adek i langa, e wabilamu lam ni Yehova Mungu mwa, calu ebing’olo iwa.

²⁸ E Farao wacu kumae, Abiweko wucidhi, kara wulam lam ni Yehova Mungu mu i langa; ento wubicidho bor hai ungo: wukwai pira.

²⁹ E Musa wacu kumae, Nen, aai i beng’i, man abikwayu Yehova ya udul ulwang’gi ai ku ba Farao, ku ba jutic pare, man ku ba dhanu pare, urwo: ento Farao kud utim kud abombi kendo kum kwero dhanu ya ku gicidh nilamu lam ni Yehova.

³⁰ E Musa ai ku ba Farao, man ekwayu Yehova.

³¹ E Yehova timo calku lembe pa Musa; man ekabu ulwang’ni ku ba Farao, ku ba jutic pare, man ku ba dhanu pare; acel de mbe m’udong’.

³² E Farao dwoko adundene nwang’ i nindo maeni bende, man eweko dhanu gicidho ngo.