Ai 7 - The Holy Bible In Alur (Lur) Revised Orthography

¹ E Yehova wacu ni Musa kumae, Nen, adwoki calu Mungu ni Farao; man Harun m’umeru bibedo jabila peri.

² Ibiyero lembe ceke m’ang’olo iri; man Harun m’umeru biyero ni Farao, nia ewek nyithindho mir Israel uai kud i ng’om pare.

³ Man abidwoko adunde rarao nwang’, man abimedo giranyutha para Jeu musana para i ng’om Misiri.

⁴ Ento rarao biwinjowu ngo, e abiketho cinga kum Misiri, man abiwodho udul para, ma gi dhanu para ma nyithindho mir Israel, kud i ng’om Misiri ku lembapoka ma dit.

⁵ E Jumisiri gibing’eyo nia an a Yehova, kinde m’arieyo cinga wi Misiri, m’awodho ko nyithindho mir Israel kud i kindgi.

⁶ E Musa giku Harun gitimo kumeca; calu Yehova ng’olo igi, e gitimo kumeca.

⁷ Man rundi pa Musa pier abora, man rundi pa Harun pier abora wi adek, kinde ma giyero ni Farao.

Uluth pa Harun

⁸ Man Yehova yero ni Musa giku Harun, ewacu kumae,

⁹ Kinde ma Farao biweco i beng’wu, ebiwacu kumae, Wunyuth musana piwu; ibilund wacu ni Harun kumae, Ting’ uluth peri, man ibole piny i wang’ Farao, kara edok ni thwol.

¹⁰ E Musa giku Harun gimondo ba Farao, e gitimo kumeca, calu Yehova ng’olo: e Harun ubolo uluth pare i wang’ Farao man i Wang’ jutic pare, e edoko ni thwol.

¹¹ Farac lund ulwong’o jurieko ku weg ajoga bende: e gin bende, gi weg ajoga mi Misiri, gitimo kumeca kud ajoga migi.

¹² Kum ku ba dhanu ceke ng’atuman ubolo uluth pare, e gidoko ni thwol: ento uluth pa Harun umwonyo uluth migi.

¹³ E adunde Farao doko nwang’, man ewinjogi ngo; calu Yehova yero.

Masendi mi Rimo

¹⁴ E Yehova wacu ni Musa kumae, Adunde Farao tek, ekwero weko dhanu cidhi.

¹⁵ Ci ba Farao kugweno; nen, ecidho woko ba kulo; man ibicungo dhu kulo kara iromb kude; man ibimaku uluth m’ulokre ni thwol i cingi.

¹⁶ E ibiwacu ire kumae, Yehova, Mungu mi Juebrania, ora i beng’i, ewacu kumae, Wek dhanu para gicidhi, kara gitim ira i langa: man, nen, cil kawono iwinjo ngo.

¹⁷ Yehova wacu kumae, Ibing’eyo nia an a Yehova ni kum maeni: nen, abigoyo pi m’i kulo kud uluth ma ni i cinga, man ebilokre ni rimo.

¹⁸ Man rec m’i kulo bitho, e kulo bikwok; e Jumisiri bidagu madhu pi m’i kulo.

¹⁹ E Yehova wacu ni Musa kumae, Wac ni Harun kumae, Ting’ uluth peri, man iriei cingi wi pi mi Misiri, wi kulo migi, wi kulo mi pi migi, man wi kut migi, man wi nam migi ceke, kara gidok ni rimo; e rimo bibedo nuti i ng’om ceke mi Misiri, i agulu mi yen man i agulu mi kidi bende.

²⁰ E Musa giku Harun gitimo kumeca, calu Yehova ng’olo; e eting’o uluth, man egoyo pi ma ni i kulo, i wang’ Farao, man i wang’ jutic pare; e pi ceke ma ni i kulo lokre ni rimo.

²¹ E rec ma ni i kulo tho; man kulo kwok, Jumisiri de copo madhu pi m’i kulo ngo; e rimo ni i ng’om Misiri ngung’,

²² Man weg ajoga mi Misiri de gitimo kumeca kud ajoga migi: e adunde Farao doko nwang’, man ewinjogi ngo; calu Yehova yero.

²³ E Farao lokre man emondo i ot pare, kadok maeni de eparu pire ngo.

²⁴ E Jumisiri ceke gitong’o ng’et kulo ni pi ma gimadhi; kum gicopo madhu pi m’i kulo ngo.

Masendi mir Ungwal

²⁵ E ceng’ abiro kadhu, yo ng’ei kulo ma Yehova goyo.