Ai 5 - The Holy Bible In Alur (Lur) Revised Orthography

Musa giku Harun i Wang’ Farao

¹ E yo ku ng’eye Musa giku Harun gicidho, man giwacu ni Farao kumae, Yehova, Mungu mir Israel, uwacu kumae, Wek dhanu para gicidhi, kara gikwir ira agba i langa.

² Man Farao wacu kumae, Yehova en e ng’a, ma nia awinj dwande awek ko Israel gicidhi? Ang’eyo Yehova ngo, mange ke abiweko Israel ungo ya gicidhi.

³ E giwacu kumae, Mungu mi Juebrania rombo kudwa: wakwei, wek wacidh mi woth mi ceng’ adek i langa, man walam lam ni Yehova Mungu mwa, emaru podho i wiwa ku thong’om, kadi ku palamularu.

⁴ Man ubimo mi Misiri wacu igi kumae, Wu Musa ku Harun, pirang’o wucero dhanu ku tic migi? wuci ba ter mu.

⁵ Man Farao wacu kumae, Nen, kawono dhanu m’i ng’om gi dupa, e wukwio kumgi ni ter migi.

⁶ E ceng’ nica Farao ng’olo ni juwitic ma ni i wi dhanu, ku jego migi, ewacu kumae,

⁷ Wubimio lum kendo ngo ni dhanu ma gitim kudo biriki, calu ma naka wumio: wek gici gifudh lum gigi.

⁸ Man wubiketho wel biriki igi calu ma naka gitimo: wubijwigo ticne moko ngo: kum gibedo umbe tic; ka kumeno giywak, giwacu kumae, Wek waci walam lam ni Mungu mwa.

⁹ Mi tic ma tek ma sagu ni dhanune, kara gimuli i ie; man kud wuwek giketh wang’gi kum ndra.

¹⁰ E juwitic mi dhanu gicidho, ku jego migi, man giyero ni dhanu giwacu kumae, Farao wacu kumae, Abimio lum iwu ngo.

¹¹ Wucidh giwu, wugam lum ka ma wucopo nwang’e i ie; kum tic mu moko mbe ma bijwik.

¹² Kum kumeno dhanu lal mba mba i ng’om ceke mi Misiri kara gicok soka ka lum.

¹³ Man juwitic gidhulo, giwacu kumae, Wutim tic mu kakare, tic mu ma ku ba rupiny, calu ma lum nuti.

¹⁴ Man jufodo jego mi nyithindho mir Israel ma juwitic pa Farao ketho i wigi, man giwacu kumae, Pirang’o wutimo tic mu kakare ngo nyaworo ku tin, ku timo biriki calu ma naka?

¹⁵ E jego mi nyithindho mir Israel gilund gibino man giywak ba Farao, giwacu kumae, Pirang’o itimo kumeni kum jutic peri?

¹⁶ Jumio lum moko ngo ni jutic peri, e giwacu iwa kumae, Wutim biriki: man, nen, jugoyo jutic peri; ento kier ni i dhanu peri ma dhe.

¹⁷ Ento ewacu kumae, Tic umbe kudu, tic umbe kudu: ka kumeno wuwacu kumae, Wek wacidh walam lam ni Yehova.

¹⁸ Ka kumeno wucidh kawono, man wutim tic; kum lum moko mbe ma jubimio iwu, ento wubitimo wel mi biriki asu.

¹⁹ Man jego mi nyithindho mir Israel gineno nia gini i lem ma rac, ka juwacu kumae, Kud wujwig kum biriki mu moko, ma tic ma ceng’ ku ceng’.

²⁰ E girombo ku Musa giku Harun, ma gicungo i yo, ka giai ba Farao:

²¹ e giwacu igi kumae, Yehova nenwu, man epok lembe; kum wuketho judagu ng’wicwa i wang’ Farao man i wang’ jutic pare, m’uketho palamularu i cing’gi kara unegwa.

Kwayukwac pa Musa

²² E Musa dok ba Yehova, man ewacu kumae, Rwoth, pirang’o itimo dhanu maeni raci? nedi iora?

²³ Kum ugambre m’abino ba Farao niyero ku nyingi, etimo dhanu maeni rac; kadok in de ibodho dhanu peri ki ngo.