Ai 4 - The Holy Bible In Alur (Lur) Revised Orthography

¹ E Musa loko lembe ewacu de kumae, Ento, nen, gibiyia ngo, kadok dwanda de gibiwinjo ngo; kum gibiwacu kumae, Yehova nyuthre iri ngo.

² E Yehova wacu irekumae, Ang’omaniicingi? Man ewacu kumae, Uluth.

³ Man ewacu ire kumae, Bole i ng’om. E ebole i ng’om, man elokre edoko ni thwol; e Musa ringo i wang’e.

⁴ Man Yehova wacu ni Musa kumae, Riei cingi, man imake ku yibe (e erieyo cinge, emake, man edoko ni uluth i cinge);

⁵ kara giyi nia Yehova, Mungu pa kwarugi, Mungu pa Ibrahim, Mungu pa Isak man Mungu pa Yakobo, unyuthre iri.

⁶ E Yehova wacu ire kendo kumae, Kawono roi cingi i kori. E eroyo cinge i kore: man kan ewodhe, nen, joi nang’u cinge, e tar calu pei.

⁷ Man ewacu kumae, Roi cingi i kori kendo (E eroyo cinge i kore kendo; man kinde m’ewodhe woko kud i kore, nen, elokre kendo calu ring’kume mange.)

⁸ Man ebitimbre, tek gibiyii ngo, kadok giranyutha ma kwong’a de gibiwinjo dwande ngo, nia gibiwinjo dwal mi giranyutha ma cen.

⁹ Man ebitimbre, tek gibiyio cil giranyutha ario maeni ngo, kadok dwendi de gibiwinjo ngo, nia ibigamu kum pi m’i kulo, man ibikonje wi ng’om m’uthwo: man pi m’igamu kud i kulo bidoko ni rimo wi ng’om m’uthwo.

¹⁰ E Musa wacu ni Yehova kumae, A, Rwoth, dwanda leng’ ungo, ugambre con, kadok yo ng’ei lembe m’iyero ni jatic peri; kum an a ming’ mi wec, man leba de pek.

¹¹ E Yehova wacu ire kumae, Ng’a m’utimo dhu dhanu? kadi ng’a ma dwoko jo ajuba, kadi udhing’, kadi mi nenopiny, kadi abinga? en e an, a Yehova ngo?

¹² Ka kumeno kawono cidhi, man abibedo ku dhogi, e abiponji ku gin m’ibiyero.

¹³ Man ewacu kumae, A, Rwoth, akwei, or ku cing’ ng’atu m’ibioro.

¹⁴ E ng’ecwiny pa Yehova opo kum Musa, man ewacu kumae, Haran ma Jalawi m’umeru nuti ngo? Ang’eyo nia ecopo yero dre. Man bende, nen, ebino rombo kudi: e kan eneni, anyong’a binego adundene.

¹⁵ E ibiyero ire, man ibiketho lembe i dhoge: man abibedo ku dhogi, man ku dhoge, man abiponjowu ku gin ma wubitimo.

¹⁶ Man ebibedo jayerlembe peri ni dhanu; e ebitimbre, nia ebibedo iri ni dhok, man ibibedo ire calu Mungu.

¹⁷ E ibimaku uluth maeni i cingi, m’ibitimo ko giranyutha.

Musa Dwogo i Ng’om Misiri

¹⁸ Man Musa cidho man edok ba Yethro ma jalkwaru mire, man ewacu ire kumae, Akwei, wek acidhi, man adok ba utumira ma ni i Misiri, man anen tek fodi gibedo kwo. E Yethro wacu ni Musa kumae, Ci ku kwiocwiny.

¹⁹ E Yehova wacu ni Musa i Midian kumae, Cidhi, dok i Misiri; kum dhanu ceke m’uyenyo kwo peri githo.

²⁰ E Musa gamu dhaku pare ku wote, man ekethogi wi kana, man edok i ng’om Misiri: e Musa ting’o uluth pa Mungu i cinge.

²¹ Man Yehova wacu ni Musa kumae, Kan idok i Misiri, nen nia itim musana ceke m’aketho i cingi i wang’ Farao: ento abidwoko cwinye nwang’, e ebiweko dhanu cidho ngo.

²² Man ibiwacu ni Farao kumae, Yehova wacu kumae, Israel en e woda, ma kayu:

²³ man awacu iri kumae, Wek woda cidhi, kara etim ira; e icere ku cidho: nen, abinego wodi, ma kayu peri.

²⁴ E etimbre dhu yo i kagonjo, nia Yehova rombo kude, man eyenyo nege.

²⁵ Zipora lund ugamu kidi ma tek, man ethumo dend kum wode, man ebole the tiende; man ewacu kumae, Andha in i won ambadha mi rimo ira.

²⁶ Kum kumeno eweke e kende. Elund ewacu kumae, In i won ambadha mi rimo, ni kum yaa.

²⁷ Man Yehova wacu ni Harun kumae, Cidh i langa kara iromb ku Musa. E ecidho, man erombo kude wi got pa Mungu, e ecwio limbe.

²⁸ E Musa yero lembe pa Yehova m’eore kudo ceke ni Haran, ku giranyutha ceke m’eyero ko ire.

²⁹ E Musa giku Haran gicidho man gicoko judongo mi nyithindho mir Israel ceke karacelo:

³⁰ e Haran uyero lembe ceke ma Yehova yero ni Musa, man etimo giranyutha i wang’ dhanu.

³¹ E dhanu giyio; e ka giwinjo nia Yehova liewo nyithindho mir Israel, man nia eneno masendi migi, gilund gikulo wigi e girwo.