Ai 39 - The Holy Bible In Alur (Lur) Revised Orthography

Karamb Timo Kendi mi Julam

¹ Man gitimo kendi ma jucwio ku rieko mi gin m’ulweku, ku m’uluga, ku ma kwar ngbo, mi timotim i kamaleng’ ni Harun; calu Yehova ng’olo ni Musa.

² Man etimo ugoke ku mola ma kwar, ku m’ulweku, man m’uluga, ku ma kwar ngbo, man bongu ma nwang’ ma ber m’awia.

³ E gifodo mola ma kwar i ban ma dhoge rebere, man githume ni silili, kara gitime kum m’ulweku, man kum m’uluga, man kum ma kwar ngbo, man kum bongu ma nwang’ ma ber, ma tic pa jabodho ma riek.

⁴ Gitimo jambgok pire, ma juribo karacelo; juribo karacelo i dhoge ario.

⁵ Man thondh pier ma jucwio ku rieko, ma ni i wie, ma jucwie kudo, en e mi piny acel man calu tije; mi mola ma kwar, mi m’ulweku, man m’uluga, ku ma kwar ngbo, man bongu ma nwang’ ma ber m’awia; calu Yehova ng’olo ni Musa.

⁶ Man gitimo kidi ma tek ma ju kite, ma juketho i jambgwok mi mola ma kwar, ma jung’iko ku ng’ik mir ayi, calku nying’ mi nyithindho mir Israel.

⁷ Man ekethogi i jambgok mir ugoke, kara ubed ni kidi mi poi ni nyithindho mir Israel; calu Yehova ng’olo ni Musa.

⁸ Man etimo jambkor, tic pa jabodho ma riek, calku tic mir ugoke; mi mola ma kwar, man m’ulweku, ku m’uluga, man ma kwar ngbo, ku bongu ma nwang’ ma ber m’awia.

⁹ Dhoge ang’wen rom rom; gitimo jambkor acel wi wadi: kaborne rom ku laccing’ m’arieya, man kalacne de rom ku laccing’ m’arieya, kum ebedo agbaya.

¹⁰ Man giketho kidi wang’e ang’wen i ie. Wang’e mi kidi ma kwar ngbo, ku kidi ma ie nen calu lum, man kidi ma kwar, en e wang’e ma kwong’ane;

¹¹ man wang’e mir arionde, kidi ma kit lum, ku kidi ma tek ma ie nen uluga, man kidi ma tar ma rieny;

¹² man wang’e mir adege, kidi m’uluga ma fura fura, ku kidi ma tek ma rieny, man kidi ma pili pili;

¹³ man wang’e mir ang’wende, kidi ma col ma calu nam, kidi ma tek ma ju kite, man kidi ma ju kite ma pii pii: jukethogi i jambgwok mi mola ma kwar i jambgwokne.

¹⁴ Man kidine calku nying’ nyithindho mir Israel, apar wi ario, calku nying’gi; calku ng’ik mir ayi, kubang’gi kubang’gi calku nyinge, mi suru apar wi ario.

¹⁵ Man gitimo nyoro calu thol wi jambkor, mi tic m’awia mi mola ma kwar ma leng’.

¹⁶ Man gitimo jambgwok ario mi mola ma kwar, man gwuo ario mi mola ma kwar, man giketho gwilo ario i kajik ario mi jambkor.

¹⁷ Man giketho nyoro ario m’awia mi mola ma kwar i gwilo ario i kajik mi jambkor.

¹⁸ Man giketho kajik ario mucelo mi nyoro ario m’awia wi jambgwok ario, man giketho gi wi jambgok mir ugoke, i wang’e.

¹⁹ Man gitimo gwilo ario mi mola ma kwar, man gikethogi i kajik ario mi jambkor, wi dhoge, ma eni yo ng’et ugoke yor i ie.

²⁰ Man gitimo gwilo ario mi mola ma kwar, e gikethogi wi jambgok mir ugoke i there, i wang’e, ceng’ni karibne, wi thondh bongu ma jucwio ku rieko mir ugoke.

²¹ Man gitwio jambkor ku gwilone kum gwilo mir ugoke ku thol m’ulweku, kara ebed wi thol ma jucwio ku rieko mir ugoke, man kara jambkor kud ugonjre ku kum ugoke; calu Yehova ng’olo ni Musa.

²² Man etimo kanzu mir ugoke ku tic m’aradha, ceke m’ulweku;

²³ man ka ma thwolo i kanzune m’i diere, calu ka ma thwolo i kind kanzu mir umbu, ku thol m’i dhoge m’utieko ka ma thwolone gbur, kara kud eyeci.

²⁴ Man gitimo nying ulemo m’ulweku, man m’uluga, ku ma kwar ngbo, man bongu ma nwang’ m’awia kum dhu kanzune.

²⁵ Man gitimo ngara mi mola ma kwar ma leng’, man giketho ngarane i kind nying ulam kum dhu kanzu utieke gbur, i kind nying ulemo:

²⁶ ngara man nying ulemo, ngara man nying ulemo, kum dhu kanzu utieke gbur, mi timo kudo tim; calu Yehova ng’olo ni Musa.

²⁷ Man gitimo kanzu mi bongu ma nwang’ ma ber mi tic m’aradha ni Harun, man ni wote,

²⁸ man dhu jambwic mi bongu ma nwang’ ma ber, man jambwic ma ber mi bongu ma nwang’ ma ber, man bongu mi tielo mi bongu ma nwang’ ma ber m’awia,

²⁹ man thondh pier mi bongu ma nwang’ ma ber m’awia, man m’ulweku, ku m’uluga, man ma kwar ngbo, tic pa jakwoc mi ruko; calu Yehova ng’olo ni Musa.

³⁰ Man gitimo ban mi jamkermiwic ma leng’ mi mola ma kwar ma leng’, man gigoro lembagora i wie, calu ng’ik mir ayi kumae, LENG’ NI YEHOVA.

³¹ Man gitwio thol m’ulweku i kume, kara umake wi jambwic ma malu; calu Yehova ng’olo ni Musa.

Judaru Jampiny mi Hema

³² E judaru tic ceke mi hema mi cokri kumeni: e nyithindho mir Israel gitimo calku gin ceke ma Yehova ng’olo ni Musa; gitimo kumeca.

³³ E gikelo hema ba Musa, en e Hema, ku jambe ceke, ramakne, ku baune, kud utwindine, man mbegine, ku werne;

³⁴ man girauma mi lau nyogi rombe ma jukworo, ku girauma mi lau yedi m’i nam, man kusikabongu mi voi;

³⁵ ku sanduk mi lembatuca, man yende, ku kabedomikisa;

³⁶ man mesa, kud agulune ceke, man kwen m’anyutha;

³⁷ man thethala ma leng’, ku thalane, en e thala ma jubiketho kakare, kud agulune ceke, man mo mi thala;

³⁸ man pemblam mi mola ma kwar, ku mo m’awira, kud udok ma ng’wice ng’ar ma lim lim, man voi mi dhugola mi Hema;

³⁹ ku pemblam mi mola, man voine mi mola, ku yende, man agulune ceke, ku jamblogo man tiende;

⁴⁰ man gang’bongu mi lelagang’, ku mbegine, man weme, man voi mi dhugang’ mi lelagang’, man thondhe, ku gutene, ku jamb tic ceke mi timo tim mi hema, mi hema mi cokri;

⁴¹ man kendi ma jutimo ku rieko mi timotim i kamaleng’, man kendi ma leng’ pa Harun ma jalam, ku kendi mi wote, mi timotim i tic pa jalam.

⁴² Calku gin ceke ma Yehova ng’olo ni Musa, e nyithindho mir Israel gitimo tic ceke kumeca.

⁴³ E Musa neno tic ceke, man, nen, gitimo; calu Yehova ng’olo, gitime kumeca: e Musa mio mugisa igi.