Ai 3 - The Holy Bible In Alur (Lur) Revised Orthography

Mungu Lwong’o Musa

¹ Nwang’u Musa bekwayu udul rombe pa Yethro ma jalkwaru mire, ma jalam mi Midian: man etelo wi udul rombe yo ng’ei langa, man ewok kum got pa Mungu, kum Horeb.

² Man malaika pa Yehova wok i bang’e kud i lebmac ma ni i kind yen m’udinyo: man eneno, man, nen, yen m’udinyo wang’ ku mac, man yen m’udinyo rungre ngo.

³ E Musa wacu kumae, Abilokra cen kawono, man abineno giranena ma dit maeni, nedi yen m’udinyo wang’ ungo.

⁴ Man ka Yehova neno nia elokre ya enen, Mungu lwong’e ku kind yen m’udinyo, man ewacu kumae, Musa, Musa. Man ewacu kumae, Anuti.

⁵ Man ewacu kumae, Kud icor ceng’ni keni: wodh wara peri kud i tiendi, kum ka m’icungo i ie en e ng’om ma leng’.

⁶ Man ke ewacu kumae, An a Mungu pa wuru, Mungu pa Ibrahim, Mungu pa Isak, man Mungu pa Yakobo. E Musa panu wang’e; kum lworo neno Mungu nege.

⁷ Man Yehova wacu kumae, Andha aneno masendi mi dhanu para ma ni i Misiri, man awinjo ywak migi kum juwitic ma ni wigi; kum ang’eyo can migi;

⁸ man aloro piny kara alargi kud i cing’ Jumisiri, man kara awodhgi woko kud i ng’om maeno atergi i ng’om ma ber ma lac de, ba ng’om ma molo cak ku kic; i ka Jakanani, man Jahiti, man Jaamori, man Japerizi, man Jahivi, ku Jayebusi.

⁹ Man kawono, nen, ywak mi nyithindho mir Israel utundo i bang’a: mange ke aneno masendi ma Jumisiri sendo kogi.

¹⁰ Ka kumeno kawono bin, man abiori ba Farao, kara iwodh dhanu para ma nyithindho mir Israel kud i Misiri.

¹¹ Man Musa wacu ni Mungu kumae, An a ng’a, ma nia acidh ba Farao, man nia awodh nyithindho mir Israel kud i Misiri?

¹² Man ewacu kumae, Wabibedo wakudi andha; man maeni bibedo giranyutha iri, nia aori: kinde m’iwodho dhanu woko kud i Misiri, wubitimo ni Mungu wi got maeni.

¹³ Man Musa wacu ni Mungu kumae, Nen, kinde m’abiwok ba nyithindho mir Israel, man abiwacu igi kumae, Mungu pa kwaruwu ora i beng’wu; man gibiwacu ira kumae, Nyinge ng’a? abiwacu ang’o igi?

¹⁴ E Mungu wacu ni Musa kumae, ANUTI KUM ANUTI: man ewacu kumae, Ibiwacu kumeni ni nyithindho mir Israel, ANUTI ora i beng’wu.

¹⁵ Man Mungu wacu ni Musa kendo kumae, Ibiwacu kumae ni nyithindho mir Israel, Yehova, Mungu pa kwaruwu, Mungu pa Ibrahim, Mungu pa Isak, man Mungu pa Yakobo, uora i beng’wu: maeni nyinga mi nja, man maeni en e lem poi para cil kum dhanum’utuk ceke.

¹⁶ Cidhi, cok judongo mir Israel karacelo, man iwac igi kumae, Yehova, Mungu pa kwaruwu, Mungu pa Ibrahim, pa Isak, man pa Yakobo, uwok i bang’a, uwacu kumae, Aliewowu andha, man aneno lembe m’utimbre i kumwu i Misiri:

¹⁷ man awacu kumae, Abiwodhowu woko kud i masendi mi Misiri man abiterowu i ng’om pa Jakanani, man Jahiti, ku Jaamori, ku Japerizi, man Jahivi, ku Jayebusi, i ng’om ma molo cak ku kic.

¹⁸ Man gibiwinjo dwendi: man ibicidho, in ku judongo mir Israel, bang’ ubimo mi Misiri, man wubiwacu ire kumae, Yehova, Mungu mi Juebrania, urombo kudwa: man kawono, wakwei, wek wacidh mi woth mi ceng’ adek i langa, kara walam ni Yehova Mungurnwa.

¹⁹ Man ang’eyo nia ubimo mi Misiri bimio iwu woth ungo, ungo, ku cing’ ma tek de ngo.

²⁰ E abirieyo cinga, man abigoyo Misiri ku musana para ceke m’abitimo i kinde: man yo ng’ei maeno ebiweko wucidho.

²¹ Man abimio bero ni dhanu maeni i wang’ Jumisiri: man ebitimbre, nia, ka wucidho, wubicidho mananu ngo:

²² ento ku ba mon ceke ng’atuman bikwayu jadhugola pare, ku ng’atu ma en e umondo i ot pare, ku jamb mola ma tar, man jamb mola ma kwar, ku kendi: man wubironyo ko wotwu, ku nyigwu; man wubicoko piny mi Jumisiri.