Ai 21 - The Holy Bible In Alur (Lur) Revised Orthography

Kura Tim ba Jumiru

¹ Nie maeni lembapoka m’ibiketho i wang’gi.

² Tek ing’iewo jamiru ma Jaebrania, ebitimo rundi abusiel: man i mir abirone ebigonjre ma pinje mbe.

³ Tek emondo e kende, ebiwok e kende: tek ebedo ku dhaku, e dhaku pare biwok woko kude.

⁴ Tek jadit pare mie dhaku, man enyolo ire nyithindho ma co kadi nyithindho ma nyir; dhaku ku nyithindhe bibedo pa jadit pare, man ebiwok woko e kende.

⁵ Ento tek jamiru wacu kele kumae, Amaru jadit para, ku dhaku para, man nyithindho para; ayenyo ngo awok woko agonya:

⁶ e jadit pare bilund kele ba Mungu, man ebikele ba dhugola, kadi ba ng’et dhugola; man jadit pare bituco ithe ku dindo; man ebitimo ire nja.

⁷ Man tek ng’atu moko ng’iewo nyare bed ni bong’, ebiwok woko ngo calu jumiru wok.

⁸ Tek enyayu mutoro i jadit pare ngo, m’egame ire ni dhaku, ebilund weko juware: ebedo ku ng’ol ungo m’eloke ko ni dhanu ma juwirok, kum etimo ire kud abombi.

⁹ Man tek egame ni wode, ebitimo ire calu kura nyir.

¹⁰ Tek egamu ire dhaku mange; cemo pare, ku kendi pare, ku kura bedo pare mi gambri, ebijigo ngo.

¹¹ Man tek etimo gin adek maeni ire ngo, e ebiwok woko mananu, ma pinje mbe.

Lembang’ola wi Jutim Rac

¹² Ng’atu m’ugoyo dhanu, m’uketho etho, en de jubinege andha.

¹³ Man tek ng’atu moko kanu adhi ngo, ento Mungu kethe i cinge; abilund ng’olo iri ka m’ering i ie.

¹⁴ Man tek ng’atu moko bino kum wadi aka, kara enege ku riu; ibikabe ku ba pemblam para, kara etho.

¹⁵ Man ng’atu m’ugoyo won, kadi min, jubiketho etho andha.

¹⁶ Man ng’atu m’ukwalu dhanu, man eloke, kadi tek junwang’e i cinge, jubiketho etho andha.

¹⁷ Man ng’atu m’ucayu won kadi min, jubiketho etho andha.

¹⁸ Man tek dhanu gidhau, man ng’atu acel ucanyu wadi ku kidi, kadi ku cinge m’adola, man etho ngo, ento evuto wi kavuto pare;

¹⁹ tek eai malu kendo, man ewotho woko kud uluth pare, e ng’atu m’ugoye bilund bedo ma lembe mbe i wie: ere ebiculo pi nindo pare m’ukadhu mananu, man ebigwoke maram kume kei ko ma gwei.

²⁰ Man tek ng’atu moko goyo jamiru pare, kadi bong’ pare, kud ukede, man etho the cinge; jubisende andha.

²¹ Ento, tek ebedo ceng’ acel kadi ario, jubisende ngo: kum en e sente pare.

²² Man tek dhanu gidhau karacelo, man gitimo dhaku ma ie nuti rac, ketho ie dubre, man lembe ma rac ulube ngo; jubiketho eculo andha, calu ma cwar dhaku biketho i wie; man ebiculo calu jupoklembe ng’olo.

²³ Ento tek lembe ma rac ulube, ibilund culo kwo pi kwo,

²⁴ wang’ pi wang’, lak pi lak, cing’ pi cing’, tielo pi tielo,

²⁵ awang’a pir awang’a, lero pi lero, goc pi goc.

²⁶ Man tek ng’atu moko goyo wang’ jamiru pare, kadi wang’ bong’ pare, man enyothe; ebigonye pi wang’e.

²⁷ Man tek ekiro lak jamiru pare, kadi lak bong’ pare; ebigonye pi lake.

Lembang’ola ma Weg Lim Bitimo

²⁸ Man tek koni dhiang’ ugudo ng’atu ma nico kadi ng’atu ma dhaku mi tho, jubicanyu dhiang’ ku kidi andha, man jubicamu ringe ngo; ento won koni dhiang’ bibedo ma lembe mbe i wie.

²⁹ Ento tek koni dhiang’ ugamu gudo con, man juyero ni won, man egwoke ngo, e kan enego ng’atu ma nico kadi ng’atu ma dhaku; jubicanyu koni dhiange ku kidi, man jubiketho won de tho.

³⁰ Tek juketho jambwar i wie, ebilund mio gin ma juketho i wie pi war mi kwo pare.

³¹ Tek egudo nyathin ma nico, kadi egudo nyathin ma nyaku, jubitimo i kume calku lembapoka maeni.

³² Tek koni dhiang’ ugudo jamiru kadi bong’, jubimio cekel mi mola ma tar ni weggi, koni dhiange ke jubicanye ku kidi.

³³ Man tek ng’atu moko biyabu wi vur, man tek ng’atu moko bikunyo vur man eume ngo, e koni dhiang’ kadi kana podho i ie,

³⁴ won vurne biculo; ebimio sente ni won, e lim m’utho bibedo pare.

³⁵ Man tek dhiang’ pa ng’atu moko timo dhiang’ pa wadi rac, ketho etho, gibilund loko koni dhiang’ ma kwo, man gibipoko wel pinje; man m’utho bende gibipoko.

³⁶ Man tek jung’eyo nia koni dhiang’ ugamu gudo con, e won ugwoke ngo; e ebiculo koni dhiang’ pi koni dhiang’ andha, man lim m’utho bibedo pare gire.