Ai 19 - The Holy Bible In Alur (Lur) Revised Orthography

Juisraeli ba Got Sinai

¹ I dwi mir adege yo ng’ei ai mi nyithindho mir Israel kud i ng’om Misiri, i ceng’ maeni nini giwok i langa mi Sinai.

² E kinde ma giai i Refidim, man giwok i langa mi Sinai, gigonjo i langa; e Israel ugonjo keca i wang’ got.

³ E Musa idho malu ba Mungu, man Yehova lwong’e ku wi got, ewacu kumae, Wac kumae ni ot pa Yakobo, man yer ni nyithindho mir Israel kumae:

⁴ Wuneno gin m’atimo kum Jumisiri, man maram ayeyo kowu wi bomb acur, man akelowu i bang’a gira.

⁵ Ka kumeno kawono, tek wubiworo dwanda andha, man wubiworo lembariba para, e wubibedo piny para ma dhe ku kind kodhidhanu ceke: kum ng’om ceke para:

⁶ e wubibedo ira ni ker mi julam, man thek ma leng’. Maeni en e lembe m’ibiwacu ni nyithindho mir Israel.

⁷ E Musa bino man elwong’o judongo mi dhanu, man eketho lembe maeni ceke ma Yehova ng’olo ire i wang’gi.

⁸ E dhanu ceke giloko lembe karacelo, man giwacu kumae, Lembe ceke ma Yehova wacu wabitimo. Man Musa dwoko lembe mi dhanu ni Yehova.

⁹ Man Yehova wacu ni Musa kumae, Nen, abino i beng’i i afuru ma pek, kara dhanu giwinj kinde m’aweco i beng’i, man kara giyii bende mi nja. E Musa yero lembe mi dhanu ni Yehova.

¹⁰ Man Yehova wacu ni Musa kumae, Cidh ba dhanu, man idwokgi leng’ tin kud urwo, man wek gilwok kendi migi,

¹¹ man gibed ayika mi ceng’ mir adege; kum i ceng’ mir adege Yehova biloro piny i wang’ dhanu ceke wi got Sinai.

¹² Man ibiguro kieu gbur kum dhanune, ibiwacu kumae, Wukuru giwu, kara kud wuidh malu kor got, kadi kud wumul kume de: ng’atu ma tek umulo kum got jubiketho etho andha:

¹³ cing’ moko mbe ma bimulo kume, ma jukubicanye ku kidi ngo andha, kadi ma jukubikile ngo; kadok en e lim kadi dhanu, ebibedo kwo ngo: kinde ma agwara winjre hai, gibibino ba got.

¹⁴ E Musa loro piny ku wi got ba dhanu, man edwoko dhanune leng’; e gilwoko kendi migi.

¹⁵ Man ewacu ni dhanunegi kumae, Wuyikra mi ceng’ mir adege: kud wubin ceng’ni mon.

¹⁶ Man etimbre i ceng’ mir adege, nwang’u piny uru, nia morpolo nuti ku lukoth, man afuru ma yer yer wi got, ku dwal mir agwara ma tek apila: man dhanu ceke ma ni i kagonjo kumgi miel.

¹⁷ Man Musa wodho dhanu woko kud i kagonjo kara giromb ku Mungu; e gicungo the got.

¹⁸ Man got Sinai winyo yiro, kubang’e ceke, kum Yehova loro i wie i mac; man yirone cikre malu calu yiro mi liek, man got dho miel dit.

¹⁹ E kinde ma dwal mir agwara doko dit man esagre, Musa yero, man Mungu loko ire lembe ku dwal.

²⁰ Man Yehova loro piny wi got Sinai, wi bith got: e Yehova lwong’o Musa wi bith got; e Musa idho malu.

²¹ E Yehova wacu ni Musa kumae, Lor piny, ng’ol lembe ni dhanu, gimaru ng’enyo yo ba Mungu kara ginen, man kindgi dupa maru tho.

²² Man wek julam bende, m’ubino ceng’ni Yehova, gidwokri gigi leng’, Yehova maru podho i wigi.

²³ E Musa wacu ni Yehova kumae, Dhanu copo coro ceng’ni got Sinai ngo: kum ing’olo iwa, iwacu kumae, Gur kieu kum got gbur, man idwoke leng’.

²⁴ Man Yehova wacu ire kumae, Cidhi, lor piny; man ibiidho malu, in, man Harun karacelo kudi: ento julam ku dhanu ku ging’eny piny ya giidh malu ba Yehova, emaru podho i wigi.

²⁵ Ka kumeno Musa loro piny ba dhanu, man eyero igi.