Ai 17 - The Holy Bible In Alur (Lur) Revised Orthography

Pi kud i Cana

¹ E udul mi nyithindho mir Israel ceke giwotho ma giai ko i langa mi Sin, ku woth migi, calku lembang’ola pa Yehova, man gigonjo i Refidim: e pi mbe ni dhanu ma gimadhi.

² Kum kumeno dhanu gidhau ni Musa, man giwacu kumae, Mi iwa pi kara wamadhi. E Musa wacu igi kumae, Nedi wudhau ira? nedi wubidho Yehova?

³ E rieu pi nego dhanu keca; e dhanune ging’ur kum Musa, man giwacu kumae, Pirang’o iwodhowa ku i Misiri, kara inegwa ku nyithindho mwa ku lim mwa ku rieu pi?

⁴ E Musa lwong’o Yehova ewacu kumae, Abitimo dhanu maeni nedi? gi ceng’ni canya ku kidi.

⁵ E Yehova wacu ni Musa kumae, Kadh i wang’ dhanu, man igam judongo mir Israel karacelo kudi; kud uluth peri, m’igoyo kudo kulo, ting’ i cingi, man icidhi.

⁶ Nen, abicungo i weng’i kuca wi cana i Horeb; e ibigoyo canane, e pi biai kud i ie, kara dhanu gimadhi. E Musa timo kumeca i wang’ judongo mir Israel.

⁷ Man elwong’o nying’ kakeca Masa, man Meriba, kum dhau mi nyithindho mir Israel, man kum gibidho Yehova, giwacu kumae, Yehova ni i kindwa, kadi embe?

Lwiny ku Juamaleki

⁸ Man Amalek ubino, man ekiedo kud Israel i Refidim.

⁹ E Musa wacu ni Yocuwa kumae, Goi wi dhanu iwa, man iwok woko, ikied kud Amalek: urwo abicungo wi ungulu got kud uluth pa Mungu i cinga.

¹⁰ Kum kumeno Yocuwa timo calu Musa wacu ire, man ekiedo kud Amalek: man Musa ku Harun man Hur giidho malu wi ungulu got.

¹¹ Man etimbre, kinde ma Musa ting’o cinge malu, nia Israel usagu; man kinde m’edwoko cinge piny, Amalek usagu.

¹² Ento cing’ Musa pek; e gigamu kidi, man gikethe i there, e ebedo i wie; man Harun giku Hur giting’o cinge malu, ng’atu acel yo kurucel, man ng’atu acel yo kurucel; e cinge bedo tek maram ceng’ umwony ko.

¹³ Man Yocuwa nyotho Amalek ku dhanu pare ku lak palamularu.

¹⁴ E Yehova wacu ni Musa kumae, Gor maeni ni poi i kitabu, man yere i ith Yocuwa: nia abikabu poi ma kum Amalek woko ku the polo.

¹⁵ Man Musa guro pemblam, man elwong’o nyinge Yehova-nisi (abera para),

¹⁶ man ewacu kumae, Yehova kwong’o kumae: Yehova bibedo kud ali kud Amalek ugambre kum dhanum’utuk cil kum dhanum’utuk.