Ai 16 - The Holy Bible In Alur (Lur) Revised Orthography

Mungu Mio Mana

¹ E Gitugo woth kud i Elim, kud udul mi nyithindho mir Israel ceke gitundo ba langa mi Sin, ma ni i kind Elim ku Sinai, e i ceng’ apar wi abije mi dwi mir arionde yo ng’ei ng’om Misiri ma giweko.

² Man udul mi nyithindho mir Israel ceke ging’ur kum Musa man kum Harun i langa:

³ man nyithindho mir Israel uwacu igi kumae, Esagu tek watho i cing’ Yehova i ng’om Misiri, kinde ma wabedo dhu agulu mi ring’o, kinde ma wacamu kwen wayeng’; kum wukelowa i langa maeni, kara wuneg cokri maeni ceke ku kec.

⁴ Yehova lund uwacu ni Musa kumae, Nen, abicoro kwen iwu kud i polo; e dhanu biwok woko man gibikwanyu maka mi ceng’ acel ku ba rupiny ku ba rupiny, kara amul igi, tek gibiwotho i cik para, kadi ungo.

⁵ Man ebitimbre i ceng’ mir abusiende, nia gibiyiko gin ma gikelo i ie, man ebibedo wang’ ario mi gin ma gikwanyu ku ba rupiny ku ba rupiny.

⁶ E Musa giku Harun giwacu ni nyithindho mir Israel ceke kumae, Uthieno, wubilund ng’eyo nia Yehova wodhowu kud i ng’om Misiri;

⁷ man kugweno, wubilund neno dwong’ pa Yehova; kum ewinjo ng’ur mu ma kum Yehova: man wan wa ng’a, ma nia wung’ur i kumwa?

⁸ E Musa wacu kumae, Maeni bibedo, kinde ma Yehova bimio ring’o uthieno wucam, man kwen kugweno wuyeng’ ko; kum Yehova winjo ng’ur mu ma wung’ur ko i kume: man wan wa ng’a? ng’ur mu en e i kumwa ngo, ento i kum Yehova.

⁹ E Musa wacu ni Harun kumae, Wac ni udul ceke mi nyithindho mir Israel kumae, Wucor ceng’ni Yehova; kum ewinjo ng’ur mu.

¹⁰ Man etimbre, kinde ma Harun uyero ni udul nyithindho mir Israel nia gineno yor i langa, man, nen, dwong’ pa Yehova nyuthre i afuru.

¹¹ Man Yehova yero ni Musa, ewacu kumae,

¹² Awinjo ng’ur mi nyithindho mir Israel: yer igi, wac kumae, Uthieno wubicamu ring’o, man kugweno wubiyeng’ ku kwen; man wubing’eyo nia an a Yehova Mungu mu.

¹³ Man etimbre uthieno, nia aywer giidho malu, man giumo kagonjo: man thoi tieko kagonjo kugweno.

¹⁴ Man kinde ma thoi m’ung’ier uoi, nen, gin ma ngulungulu ni wi wang’ langa, e thindho thindho calu thoi ma tar i ng’om.

¹⁵ E kinde ma nyithindho mir Israel ginene, giwecri gigi kumae, En e ang’o? kum ging’eye ngo. E Musa wacu igi kumae, En e kwen ma Yehova mio iwu wucam.

¹⁶ Maeni gin ma Yehova ng’olo. Wukwanye kubeng’wu kubeng’wu calku cemo mi dhanu; asisa acel ni wie, calku wel dhanu mu, wubigame, ku ba dhanu ma co mi ju ma ni i hema pare.

¹⁷ E nyithindho mir Israel gitimo kumeca, man gikwanyu jumoko migi sagu, jumoko migi rem.

¹⁸ Man kinde ma gipore kud asisa, ng’atu m’ucoko dit moko mbe m’udong’ ire, man ng’atu m’ukwanyu nok de pare rem ungo; gikwanyu kubang’gi kubang’gi ng’atuman calku cemo pare.

¹⁹ E Musa wacu igi kumae, Ng’atu moko kud uwek kume moko mi kugweno.

²⁰ Ento giwinjo Musa ngo; ento jumoko m’i kindgi giweko kume moko mi kugweno, e enyolo ukoko, man edoko ng’wi; man kwinyo nego Musa i kumgi.

²¹ Man gikwanye ku ba kugweno ku ba kugweno, ku ba dhanu ng’atuman calku cemo pare: e kinde ma ceng’ udoko tek, eloi.

²² Man etimbre, nia i ceng’ mir abusiende gikwanyu kwen mi wang’ ario, asisa ario ni ng’atu acel: e judongo mir udul ceke gibino man giyero ni Musa.

²³ Man ewacu igi kumae, Maeni gin ma Yehova yero, Urwo en e yom mi rwo, en e sabatu ma leng’ ni Yehova: wuthol ma wubitholo, man wuted ma wubitedo; man donge m’udong’ ceke wukan iwu agwoka cil kugweno.

²⁴ E gikane cil kugweno, calu Musa ng’olo: man edoko ng’wi ngo, kadok ukoko de mbe i ie.

²⁵ E Musa wacu kumae, Wucam maeno tin; kum tin en e sabatu ni Yehova: tin wubinwang’e ngo i thim.

²⁶ Ceng’ abusiel wubikwanye; ento ceng’ mir abirone en e sabatu, ebibedo umbe i cenge.

²⁷ Man etimbre i ceng’ mir abirone, nia jumoko ma kind dhanu giwok woko kara gikwany, e ginwang’u ngo.

²⁸ Man Yehova wacu ni Musa kumae, Wubikwero woro lembang’ola para ku cik para de rokani?

²⁹ Wunen, kum Yehova mio iwu sabatu ka kumeno emio iwu kwen mi ceng’ ario i ceng’ mir abusiende; wubed kubeng’wu kubeng’wu ng’atuman i kakare, ng’atu moko kud uwek kakare i ceng’ mir abirone.

³⁰ Kum kumeno dhanune giyom i ceng’ mir abirone.

³¹ Man juot mir Israel ulwong’o nyinge Mana: man e calu nying’ cam moko, e tar; man midone calu kwen ma jung’ino ku kic.

³² Man Musa wacu kumae, Maepi gin ma Yehova ng’olo, Wek jukan maeni asisa acel cil i dhanum’utuk mu, kara ginen kwen m’akaku kowu i langa kinde m’awodhowu woko kud i ng’om Misiri.

³³ E Musa wacu ni Harun kumae, Gam tabu, man iketh mana asisa acel i ie, man ikane i wang’ Yehova, kara jugwoke cil kum dhanum’utuk mu.

³⁴ E Harun ukane kumeca i wang’ Lembatuca, calu Yehova ng’olo ni Musa, kara jugwoke.

³⁵ E nyithindho mir Israel ucamu mana rundi pier ang’wen, cil ma gitundo ko i ng’om ma dhanu ni i ie; gicamu mana, cil ma gibino ko ba kieu mi ng’om Kanan.

³⁶ Nwang’u asisa en e piny mir apaje mi katoko.