Ai 13 - The Holy Bible In Alur (Lur) Revised Orthography

Judwoko Kayu Leng’

¹ E Yehova yero ni Musa, ewacu kumae,

² Wudwok kayu ceke leng’ ira, gin ma tek uyabu ic i kind nyithindho mir Israel, mi dhanu ku lim de: en e para.

Agba mi Kwen ma Thobi Mbe i ie

³ E Musa wacu ni dhanu kumae, Wupoi kum ceng’ maeni, ma wuai ie woko kud i Misiri, kud i ot mi ng’eca; kum ku tego mi cing’ Yehova kelowu woko kud i ka maeni: kwen ma thobi ni i ie jubicamu ngo.

⁴ Tin wuwok woko i dwi Abib.

⁵ Man ebibedo, kinde ma Yehova biterowu i ng’om pa Jakanani, man Jahiti, man Jaamori, man Jahivi, man Jayebusi, m’ekwong’o ni kwaru peri nia ebimio iri, ng’om ma molo cak ku kic, nia ibiworo timotim maeni i dwi maeni.

⁶ Ceng’ abiro ibicamu kwen ma thobi mbe i ie, man ceng’ mir abirone bibedo ceng agba ni Yehova.

⁷ Jubicamu kwen ma thobi mbe i ie cil ceng’ abiro; man jubineno kwen ma thobi ni i ie i beng’i ngo, kadok thobi de jubineno ngo i beng’i, i kieu peri ceke.

⁸ E ibiwacu ni wodi i ceng’ maeca, ibiwacu kumae, En e kum maeca ma Yehova timo ira kinde m’aai woko kud i Misiri.

⁹ Man ebibedo ni giranyutha iri i cingi, man ni poi i ter nyimi, kara cik pa Yehova bed i dhogi: kum Yehova wodhi woko kud i Misiri ku cing’ ma tek.

¹⁰ Ka kumeno ibiworo lembapoka maeni kakare ku ba rundi ku ba rundi.

Kayu

¹¹ Man ebibedo, kinde ma Yehova bikeli i ng’om pa Jakanani, calu ekwong’o iri man ni kwaru peri, man ebimie iri,

¹² nia ibikoyo ni Yehova gin ceke m’uyabu ic, man ku ba nyithi lim ceke ma kayu m’ibedo ko; nyogi ceke bibedo pa Yehova.

¹³ Man ku ba nyithi kana ceke ma kayu ibiwaru ku nyathi rombo; man tek ibiware ngo, ibilund mino ng’ute: man kayu ceke mi dhanu ma kind woti ibiwaru.

¹⁴ Man ebibedo, kinde ma wodi penji i nindo ma bibino, ewacu kumae, Maeni ang’o? nia ibiwacu ire kumae, Ku tego mi cing’ Yehova kelowa woko kud i Misiri, kud i od ng’eca:

¹⁵ man etimbre, kinde ma Farao yenyo ngo ewek wacidhi, nia Yehova nego kayu ceke m’i ng’om Misiri, kayu mi dhanu, ku kayu mi lim: ka kumeno alamu ni Yehova gin ceke m’uyabu ic, ma gi co; ento kayu mi wota ceke awaru.

¹⁶ Man ebibedo ni giranyutha i cingi, man ni giratwia ter nyimi: kum ku tego mi cing’ Yehova kelowa woko kud i Misiri.

Mbegi mir Afuru ku Mbegi mi Mac

¹⁷ Man etimbre, kinde ma Farao weko dhanu gicidhi, nia Mungu telo wigi ngo ku yor i ng’om mi Jufilisti, kadok en e ceng’ni; kum Mungu wacu kumae, Kuno nyo dhanu bilokri ka gineno ali, man gidok i Misiri:

¹⁸ ento Mungu gondo dhanu, yor i yamba yo ba Nam Makwar: man nyithindho mir Israel giidho malu aronya ku jamtho kud i Misiri.

¹⁹ Man Musa cidho ku cogo Yusuf; kum ekwong’o ni nyithindho mir Israel, ewacu kumae, Mungu biliewowu andha; man wubitero cogona ku keni karacelo kudu.

²⁰ Man gitugo woth ugambre Sukoth, man gigonjo i Etham, dhu langa.

²¹ Man Yehova cidho i wang’gi ku dieceng’ kud i mbegi mir afuru, kara utel wigi i yo, man ku diewor i mbegi mi mac, kara umi igi der; kara giwoth ku dieceng’ man ku diewor:

²² mbegi mir afuru ku dieceng’, man mbegi mi mac ku diewor, uai ungo kud i wang’ dhanu.