2 Ubimo 9 - The Holy Bible In Alur (Lur) Revised Orthography

Juwiro Yehu ni Ubimo mi Israel

¹ Man Elica ma jabila lwong’o ng’atu acel ma kind wot jubila, ewacu ire kumae, Twi pieri, man iting’ cupa mi mo maeni i cingi, e icidh Ramoth-gilead.

² E kinde m’itundo kuca, yeny Yehu kuca ma wod Yehocafat ma wod Nimci, man imondi, e iketh eai malu ku kind utumin mire, man itere i kusika ma yor i ie.

³ Ilund iting’ cupa mi mo, man ikonje i wie, e iwac kumae, Yehova wacu kumae, Awiri ni ubimo wi Israel. E kan iyab dhugola, iringi, kud igal de.

⁴ Kum kumeno jalawobine, en e jalawobi ma jabila, ecidho Ramoth-gilead.

⁵ E kinde m’ewok, nen, jego mir udul gibedo; man ewacu kumae, Abedo ku lembe moko ma iri, E jego. E Yehu wacu kumae, Ni ng’a m’i kindwa ceke? E ewacu kumae, Iri, E jego.

⁶ E eai malu, man emondo i ot; e ekonjo mo i wie, man ewacu kumae, Yehova, Mungu mir Israel, uwacu kumae, Awiri ni ubimo wi dhanu pa Yehova, en e wi Israel.

⁷ E ibigoyo ot pa Ahab ma rwoth peri, kara acul rimb jutic para ma jubila, man rimb jutic ceke pa Yehova, kum cing’ Yezebel.

⁸ Kum ot pa Ahab dho binyothre; man abijigo wi nyithindho ceke ma co ku bang’ Ahab, ku ng’atu ma juciko bang’e man ng’atu m’ubedo agonya i kind Israel.

⁹ Man abidwoko ot pa Ahab calu ot pa Yeroboam ma wod Nebat, man calu ot pa Baca ma wod Ahija.

¹⁰ Man gwogi bicamu Yezebel i ng’et ng’om pa Yezrel, man ng’atu moko mbe ma biyike. E eyabu dhugola, man eringo.

¹¹ Yehu ulund uwok woko ba jutic pa rwoth pare: e ng’atu acel uwacu ire kumae, Gin ceke bedo beri? pirang’o jal m’avake maeni bino i beng’i? E ewacu igi kumae, Wung’eyo ng’atuno man maram wec pare bedo ko.

¹² Man giwacu kumae, En e ndra; yer iwa kawono. Man ewacu kumae, Eweco kuman kuman i bang’a, ewacu kumae, Yehova wacu kumae, Awiri ni ubimo wi Israel.

¹³ Gilund gitimo pio, man ku ba dhanu ceke ng’atuman uting’o kendi pare, man gikethe i there i wi ka ma juidho ko malu, e gikudho agwara, giwacu kumae, Yehu en e ubimo.

Yehu Nego Yoram

¹⁴ Kum kumeno Yehu ma wod Yehocafat ma wod Nimci uporo lembe i kum Yoram. (Nwang’u Yoram ubegwoko Ramoth-gilead, en kud Israel ceke, kum Hazael m’ubimo mi Cami;

¹⁵ ento ubimo ma Yoram udwogo kara kume kei i Yezrel ni lero m’atong’a ma Jucami tong’o i kume, kinde m’ekiedo ku Hazael m’ubimo mi Cami.) Man Yehu wacu kumae, Tek maeni bedo pidoic mu, e kud wuwek jumoko bothi uwok kud i adhura, kara gicigiyer i Yezrel.

¹⁶ Kum kumeno Yehu wotho ku i magali, man ecidho Yezrel; kum Yoram uvuto kuca. Man Ahazia m’ubimo mi Yuda loro piny kara enen Yoram.

¹⁷ Nwang’u jakur ucungo wi otkur i Yezrel, man eneno udul pa Yehu kan ebino, man ewacu kumae, Aneno udul dhanu. Man Yoram uwacu kumae, Gam won riuni, man iore eromb kugi, e wek ewac kumae, En e kwiocwinyi?

¹⁸ Kum kumeno ng’atu acel ucidho ku wi riuni kara eromb kude, man ewacu kumae, Ubimo wacu kumae, En e kwiocwinyi? Man Yehu wacu kumae, Wubedo kud ang’o wuku kwiocwinyi? lokri i ng’eya. E jakume yero, ewacu kumae, Jakwenda bino i bang’gi, ento edwogo ngo.

¹⁹ E elund eoro mir arionde ku wi riuni, ubino i bang’gi, man ewacu kumae, Ubimo wacu kumae, En e kwiocwinyi? E Yehu dwoko lembe kumae, Wubedo kud ang’o wuku kwiocwinyi? lokri i ng’eya.

²⁰ E jakume yero, ewacu kumae, Etundo cik i bang’gi, e edwogo ngo: man leko en e calu lek pa Yehu ma wod Nimci; kum eleko arenda.

²¹ Man Yoram uwacu kumae, Wuyikru. E giyiko magali pare. Man Yoram m’ubimo mir Israel kud Ahazia m’ubimo mi Yuda giwok woko, man i magali pare man i magali pare, e giwok woko kara giromb ku Yehu, man ginwang’e i ng’et ng’om pa Naboth ma Jayezreli.

²² Man etimbre kinde ma Yoram uneno Yehu, nia ewacu kumae, En e kwiocwiny Yehu? E eloko lembe kumae, Kwiocwiny ma nedi, ma nwang’u tarwang’ pa meru ma Yezebel kud ajoga pare gi dupa kumeni ngi e?

²³ Man Yoram uloko cinge, man eringo, ewacu de ni Ahazia kumae, En e lembapora ma rac, E Ahazia.

²⁴ Man Yehu dwanyu atum pare ku tegone ceke, man ekilo Yoram i kind bote; man athero tuc wi adundene, e epodho piny i magali pare.

²⁵ Yehu lund uwacu ni Bidkar ma jego pare kumae, Ting’e ibaye i podho pa Naboth ma Jayezreli; kum poi, kinde ma wawotho karacelo tok Ahab ma won, maram Yehova yero lembila maeni i kume:

²⁶ Andha aneno nyaworo rimo pa Naboth, man rimo mi wote, Yehova wacu; man abiculo i kumi i ng’et ng’om maeni, Yehova wacu. Ka kumeno game ibaye i ng’et ng’ombe, calku lembe pa Yehova.

Yehu Nego Ahazia

²⁷ Ento kan Ahazia m’ubimo mi Yuda neno maeni, eringo ku yo ba odpodho. Man Yehu lubo toke, man ewacu kumae, Wugoi en bende ku i magali: e gigoye i ka m’aidha mi Gur, ma en e ng’et Ibleam. E eringo ba Megido, e etho kuca.

²⁸ Man jutic pare giyeye i magali i Yerusalem, man giyike i odliel ku kwaru mire i adhura pa Daudi.

²⁹ Man i rundi apar wi acende pa Yoram ma wod Ahab, Ahazia maku camu ker wi Yuda.

Tho pa Yezebel

³⁰ Man kinde ma Yehu bino Yezrel, Yezebel uwinjo pire; e eruko wang’e, man eyiko jambwie, e eneno woko ku wang’ot.

³¹ Man ka Yehu mondo dhugang’, ewacu kumae, En e kwiocwiny, in i Zimri, i janeg rwoth peri?

³² E eng’ayu wang’e malu ba wang’ot, man ewacu kumae, Ng’a ma jabang’a? E jumusuma ario kadi adek gineno yo woko i bang’e.

³³ E ewacu kumae, Bole piny. Kum kumeno gibole piny; e rimbe moko kire wi gang’kidi, man kum riuni: e enyone the tielo.

³⁴ E kinde m’emondo, ecamu man emadhu; e ewacu kumae, Kawono wunen ba dhaku maeno ma kwong’ ni wie, man wuyike; kum en e nyar ubimo.

³⁵ E gicidho kara giyike; ento ginwang’u avuje mange ngo ndhu upoko wie, ku tiende, man diecinge.

³⁶ Kum kumeno gidwogo, man giyero ire. Man ewacu kumae, Meni lembe pa Yehova, m’eyero ku dhu jatic pare Elia ma Jaticbi, ewacu kumae, I ng’et ng’om pa Yezrel gwogi bicamu ring’kum Yezebel;

³⁷ man avuj Yezebel bibedo calu weyo wi wang’ podho i ng’et ng’om pa Yezrel, kara ku juwae kumae, Maeni Yezebel.