2 Ubimo 8 - The Holy Bible In Alur (Lur) Revised Orthography

Judwoko Aba pa Dhaku mi Cunem

¹ Nwang’u Elica yero ni dhaku, m’edwoko wode kwo, ewacu kumae, Ai, man icidh in ku juodi, man ibed ni umondo i ka ma tek icopo bedo i ie ni umondo: kum Yehova lwong’o ndru; e ebibino wi ng’om bende rundi abiro.

² E dhakune ai, man etimo calu lembe pa dhanu pa Mungu; e ecidho ku juode, man gibedo ni umondo i ng’om mi Jufilisti rundi abiro.

³ Man etimbre ka rundi abiro thum, nia dhakune dwogo kud i ng’om mi Jufilisti: e ecidho kara eywak bang’ ubimo pi ot pare man pi ng’om pare.

⁴ Man ubimo beweco ku Gehazi ma jatic pa dhanu pa Mungu, ewacu kumae, Akwei, Yer ira pi gin ma dwong’ ceke ma Elica timo.

⁵ Man etimbre, kinde m’ebeyero ni ubimo maram edwoko ko ng’atu m’utho ubed kwo, nia, nen, dhakune, m’edwoko wode kwo, eywak bang’ ubimo pi ot pare man pi ng’om pare. Man Gehazi wacu kumae, Rwoth para, E ubimo, maeni dhakune, man maeni wode, ma Elica dwoko kwo.

⁶ E kan ubimo penjo dhakune, eyero ire. Kum kumeno ubimo goyo wi jego moko ire, ewacu kumae, Dwok gin ceke ma pare, ku nying’ podho ceke ugambre i ceng’ m’eweko ie ng’om, cil kawono.

Hazael Udoko Ubimo mi Cami

⁷ Man Elica bino Dameski; e Ben-hadad m’ubimo mi Cami kume lith; man juyero pire ire, juwacu kumae, Dhanu pa Mungu bino keni.

⁸ Man ubimo wacu ni Hazael kumae, Gam giramia i cingi, man icidh, e irpmb ku dhanu pa Mungu, man ipenj Yehova ni kume, iwac kumae, Kuma ma lith maeni bikei?

⁹ Kum kumeno Hazael ucidho erombo kude, man ecidho ku giramia, ma en e gin ceke ma ber mi Dameski kubang’e kubang’e, ter mi ngamia pier ang’wen, man ebino ecungo de i wang’e, e ewacu de kumae, Wodi ma Ben-hadad m’ubimo mi Cami uora i beng’i, ewacu kumae, Kuma maeni ma lith bidoko beri?

¹⁰ Man Elica wacu ire kumae, Cidhi, wac ire kumae, Ibidoko ber andha; ento Yehova nyutho ira nia ebitho andha.

¹¹ Man enene tel, maram lewic umake ko: e dhanu pa Mungu ywak.

¹² Man Hazael uwacu kumae, Rwoth para ywak nedi? E eloko lembe kumae, Kum ang’eyo lem ma rac m’ibitimo kum nyithindho mir Israel: ibiwang’u ka ma tek migi, ibinego awobi migi ku palamularu, man ibirwadu nyithindho migi ma thindho, man ibikaku i mon migi ma igi nuti.

¹³ E Hazael uwacu kumae, Ento jatic peri en e ang’o, ma en e gwok ma gwok e, ma nia etim gin ma dit maeno? Man Elica loko lembe kumae, Yehova nyutho ira nia ibibedo ubimo mi Cami.

¹⁴ Elund eai bang’ Elica, man ebino ba rwoth pare; m’uwacu ire kumae, Elica wacu ang’o iri? Man eloko lembe kumae, Ewacu ira nia kumi bikei andha.

¹⁵ E etimbre urwone nia egamu girapedha mi kavuto, man ekethe i pi, e epedhe i wang’e, ketho etho: e Hazael ucamu ker kakare.

Nindo mi Camuker pa Yehoram mi Yuda

¹⁶ Man i rundi mir abije pa Yoram ma wod Ahab m’ubimo mir Israel, kinde ma Yehocafat ubedo ubimo mi Yuda, Yehoram ma wod Yehocafat m’ubimo mi Yuda umaku camu ker.

¹⁷ Rundi pare pier adek wi ario kinde m’emaku camu ker; man ecamu ker rundi abora i Yerusalem.

¹⁸ Man ewotho i yo p’ubimo mir Israel, calu ot pa Ahab utimo: kum ebedo ku nyar Ahab ni dhaku; e etimo gin m’ubedo rac i wang’ Yehova.

¹⁹ Endre Yehova yenyo ngo enyoth Yuda, ni kum Daudi ma jatic pare, kum eng’olo ire nia ebimio ire thala ni nyithindho pare mi nja.

²⁰ I nindo pare Edom ujai kud i the cing’ Yuda, man giketho ubimo i wigi gigi.

²¹ Yoram ulund ukadhu lokaca ba Zair, ku magali pare ceke kude: man eai ku diewor, e egoyo Juedomi m’utieke gbur, ku jego mi magali; e dhanu giringo ba hema migi.

²² Kum kumeno Edom ujai kud i the cing’ Yuda cil i ceng’ ma tin. Libna ulund ujai i nindo nica.

²³ Man dong’ tic pa Yoram, ku gin ceke m’etimo, gigore i kitabu mi lemkei p’ubimo mi Yuda ngo?

²⁴ Man Yoram unindo ku kwaru mire, e juyike ku kwaru mire i adhura pa Daudi; man Ahazia ma wode camu ker kakare.

Nindo mi Camuker pa Ahazia mi Yuda

²⁵ I rundi apar wi arionde pa Yoram ma wod Ahab m’ubimo mir Israel, Ahazia ma wod Yehoram m’ubimo mi Yuda maku camu ker.

²⁶ Rundi pa Ahazia pier ario wi ario kinde m’emaku camu ker; e ecamu ker rundi acel i Yerusalem. Man nying’ min en e Athalia ma nyar Omri m’ubimo mir Israel.

²⁷ E ewotho i yo mi juot pa Ahab, man etimo gin m’ubedo rac i wang’ Yehova, calu juot pa Ahab utimo; kum en e jalwod juot pa Ahab.

²⁸ Man gicidho giku Yoram ma wod Ahab nikiedo kum Hazael m’ubimo mi Cami i Ramoth-gilead: e Jucami gitong’o lero kum Yoram.

²⁹ E ubimo ma Yoram udwogo kara kume kei i Yezrel ni lero ma jutong’o ma Jucami tong’o i kume i Rama, kinde m’ekiedo kum Hazael m’ubimo mi Cami. Man Ahazia ma wod Yehoram m’ubimo mi Yuda loro piny kara enen Yoram ma wod Ahab i Yezrel, kum kume lith.