2 Ubimo 3 - The Holy Bible In Alur (Lur) Revised Orthography

Nindo mi Camu Ker pa Yehoram mi Israel

¹ Nie Yehoram ma wed Ahab umaku camu ker wi Israel i Samaria i rundi apar wi aborane p’ubimo mi Yuda ma Yehocafat, e ecamu ker rundi apar wi ario.

² Man etimo gin ma rac i wang’ Yehova, ento calu won ungo, man calu min de ngo; kum ecoro mbegi mi Bal cen ma won utimo.

³ Endre emoko kum dubo pa Yeroboam ma wod Nebat, m’eketho Israel udubo kudo; eai i ie ngo.

Elica Ewo pir Aloci wi Moab

⁴ Nie Meca m’ubimo mi Moab en e ng’atu ma won rombe dupa; man eculo yuk nyithi rombe rubanga dak acel ni ubimo mir Israel, man mi nyogi rombe rubanga dak acel.

⁵ Ento etimbre, kinde ma Ahab utho, nia ubimo mi Moab ujai ni ubimo mir Israel.

⁶ Man ubimo ma Yehoram uai woko kud i Samaria i nindo maeca, man ecoko Israel ceke.

⁷ Man ecidho eoro kwenda ba Yehocafat m’ubimo mi Yuda, ewacu kumae, Ubimo mi Moab ujai ira: wabicidho wakudi i lwiny kum Moabi? Man ewacu kumae, Abiidho malu: an a calu in, dhanu para de calu dhanu peri, riuni para de calu riuni peri.

⁸ E ewacu kumae, Wabiidho malu yo kani? Man eloko lembe kumae, Yor i langa mir Edom.

⁹ Kum kumeno ubimo mir Israel ucidho, kud ubimo mi Yuda, man ubimo mir Edom; e gigondri ku woth ceng’ abiro: man pi mbe ni udul, kadi ni lim mi ter m’ulubo tokgi.

¹⁰ E ubimo mir Israel uwacu kumae, Aka! kum Yehova lwong’o ubimo adek maeni karacelo kara emigi i cing’ Moab.

¹¹ Ento Yehocafat uwacu kumae, Jabila pa Yehova umbe keni, ma wapenj Yehova ku yor i bang’e? Man ng’atu acel ma kind jutic mir ubimo mir Israel uloko lembe man ewacu kumae, Elica ma wod Cafat ni keni, m’ubeduthiwo pi i cing Elia.

¹² Man Yehocafat uwacu kumae, Lembe pa Yehova ni kude. Kum kumeno ubimo mir Israel ku Yehocafat man ubimo mir Edom giloro piny i bang’e.

¹³ E Elica uwacu ni ubimo mir Israel kumae, Wabedo ku lembang’o wakudi? cidh ba jubila pa wuru man ba jubila pa meru. Man ubimo mir Israel uwacu ire kumae, Ungo; kum Yehova lwong’o ubimo adek maeni karacelo kara emigi i cing’ Moab.

¹⁴ Man Elica wacu kumae, Calu Yehova mir udul ubedo kwo, m’acungo i wang’e, andha, dok ande k’aparu pi Yehocafat m’ubimo mi Yuda ngo, kuno di k’aneno yo ku m’ini i ie ngo, kuno di k’aneni de ngo.

¹⁵ Ento kawono kel jagoi adungu i bang’a. Man etimbre, kinde ma jagoi adungu goyo, nia cing’ Yehova bino i wie.

¹⁶ Man ewacu kumae, Yehova wacu kumae, Wutong’ ora i poga maeni ceke.

¹⁷ Kum Yehova wacu kumae, Wubineno yamu ngo, kadok koth de wubineno ngo; ento poga maeni bipong’ ku pi, man wubimadhu, wun ku dhiang’ mu man lim mu mi ter.

¹⁸ Man maeni en e gin ma tek ungo i wang’ Yehova: man abimio Jumoabi bende i cingwu.

¹⁹ E wubigoyo adhura ceke ma tek, man adhura ceke ma jufoyo, man wubing’olo yen ceke ma ber, man wubiculo wang’ pi ceke, man wubinyotho ng’et ng’om ceke ma ber ku kidi.

²⁰ E etimbre kugweno, calu kinde ma juthiero ie girathiera, nia, nen, pi uai yor i Edom, e ng’om upong’ ku pi.

²¹ Nie kinde ma Jumoabi ceke giwinjo nia ju m’ubimo idho malu kara gikied kugi, gicokri gigi karacelo, dhanu ceke ma copo ronyo jambali, ku ma dongo, e gicungo i kieu.

²² Man giai pir kugweno, man ceng’ urieny wi pige, man Jumoabi neno pige ku yor i bang’gi m’ebedo kwar calu rimo:

²³ e giwacu kumae, Maeni rimo; ju m’ubimo ginyothri andha, man gigoiri ng’atuman ugoyo wadi man ugoyo wadi: ka kumeno kawono, Moab, cidh kum ayeki.

²⁴ Man kinde ma gibino ba kagonjo mir Israel, Juisraeli giai malu man gigoyo Jumoabi, ketho giringo i wang’gi; man gicikucidho i ng’ombe ma giwotho kugoyo Jumoabi.

²⁵ E gimoro adhura; man ku ba dhanu ku ba dhanu gibayu kidi wi ng’et ng’om ma ber kubang’e kubang’e, e gipong’e; man giculo wang’ pi ceke, man ging’olo yen ceke ma ber, ndhu i Kir-hareseth kende e ma giweko kidine; ento weg jungbe gitieke, man gij goye.

²⁶ E kinde m’ubimo mi Moab uneno nia lwiny ubedo tek m’usage, egamu dhanu dak abiro gikugi ma weg palamularu, kara ging’eny piny gitund bang’ ubimo mir Edom; ento gicopo ngo.

²⁷ Elund egamu wode ma kayu ma kuno di ucamu ker i kakare, man ethiere ni lam m’awang’a wi gang’kidi. Man kwinyo ma dit ni wi Israel: e giweke, man gidwogo i ng’om migi ma dhe.