2 Ubimo 24 - The Holy Bible In Alur (Lur) Revised Orthography

¹ I nindo pare Nebukadnezar m’ubimo mi Babeli uidho, man Yehoiakim udoko jatic pare rundi adek: kan elokre ejai ire.

² Man Yehova oro udul mi Jukaldayo i kume, kud udul Jucami, man udul Jumoabi, man udul mi nyithindho mir Amon, e eorogi kum Yuda kara unyothe, calku lembe pa Yehova, m’eyero ku dhu jutic pare ma jubila.

³ Maeni wok wi Yuda andha ni kum lembang’ola pa Yehova, kara ukabgi woko kud i wang’e, kum dubo pa Manase, calku gin ceke m’etimo,

⁴ man kum rimo ma dubone mbe bende m’ecwiro; kum epong’o Yerusalem ku rimo ma dubone mbe: man Yehova kwero weko lembene woko.

⁵ Nie dong’ tic pa Yehoiakim, ku gin ceke m’etimo, gigore ngo i kitabu mi lemkei p’ubimo pa Yuda?

⁶ Kum kumeno Yehoiakim unindo ku kwaru pare; man Yehoiakin ma wode camu ker kakare.

⁷ Man ubimo mi Misiri bino kendo ngo kud i ng’om pare; kum ubimo mi Babeli umaku ng’ombe, ugambre kum kulo mi Misiri cil kum kulo Frati, gin ceke ma p’ubimo mi Misiri.

Juter o Yehoiakin ku Judongo Pare i Ng’eca i Babeli

⁸ Yehoiakin rundi pare apar wi abora kinde m’emaku camu ker; man ecamu ker i Yerusalem dwi adek: man nying’ min mire Nehucta ma nyar Elnathan ma Yerusalem.

⁹ Man etimo gin ma rac i wang’ Yehova, calku gin ceke ma won utimo.

¹⁰ I nindo maeca jutic pa Nebukadnezar m’ubimo mi Babeli bino kum Yerusalem, man jutieko adhurane kud ali.

¹¹ Man Nebukadnezar m’ubimo mi Babeli bino kum adhurane, kinde ma jutic pare betieke kud ali;

¹² man Yehoiakin m’ubimo mi Yuda wok woko bang’ ubimo mi Babeli, en, ku min mire, ku jutic pare, ku judongomawijo pare, ku jego pare: e ubimo mi Babeli make i rundi mir aborane mi camuker pare.

¹³ Man eyaku pinym’akana ceke m’i ot pa Yehova, ku pinym’akana m’i ot p’ubimo woko ku keca, man etong’o agulu mi mola ma kwar ceke nziki nziki, ma Suleman m’ubimo mir Israel utimo i hekalu pa Yehova, calu Yehova wacu.

¹⁴ Man eyaku Yerusalem ceke, ku judongomawijo ceke, ku dhanu ma tek ceke ma jurukara, en e dhanu ma ng’eca rubanga apar, ku jubodho ceke man weg uka; moko mbe m’udong’, ndhu dhanu ma sai m’i ng’ombe.

¹⁵ Man eyaku Yehoiakin etere i Babeli; ku min ubimo, man mond ubimo, ku jego pare, man judongo m’i ng’ombe, eterogi ni ng’eca kud i Yerusalem i Babeli.

¹⁶ Man dhanu ma tek ceke, en e rubanga abiro, man jubodho ku weg uka rubanga acel, kagi ceke gi tek m’uromo kud ali, en e joni m’ubimo mi Babeli utero ni ng’eca i Babeli.

¹⁷ Man ubimo mi Babeli uketho Matania, m’umin won Yekonia, ni ubimo kakare, man eloko nyinge doko Zedekia.

Nindo mi Camuker pa Zedekia

¹⁸ Zedekia rundi pare pier ario wi acel kinde m’emaku camu ker; man ecamu ker rundi apar wi acel i Yerusalem: man nying’ min mire Hamutal ma nya Yeremia ma Libna.

¹⁹ Man etimo gin ma rac i wang’ Yehova, calku gin ceke ma Yehoiakim utimo.

²⁰ Kum etimbre kakare i Yerusalem ku Yuda ni kum ng’ecwiny pa Yehova, cil m’ebayugi woko kud i vute.