2 Ubimo 23 - The Holy Bible In Alur (Lur) Revised Orthography

Yosia Woro Lembang’ola pa Mungu

¹ E ubimo oro kwenda, man gicoko judongo mi Yuda ceke man mi Yerusalem i bang’e.

² E ubimo idho malu ba ot pa Yehova, ku dhanu ceke mi Yuda man ju m’ubedo i Yerusalem ceke gikugi, ku julam, man jubila, ku dhanu ceke, ma thindho ku ma dongo de: man esomo lembe ceke mi kitabu mi lembariba ma junwang’u i ot pa Yehova i ithgi.

³ E ubimo cungo ba mbegi, man etimo lembbariba i wang’ Yehova, kara elub tok Yehova, man ewor lembang’ola pare, ku lembatuca pare, man cik pare, kud adundene ceke man ku ng’eyong’ec pare ceke, kara etim lembe mi lembariba maeni m’ugore i kitabu maeni: man dhanu ceke gicungo kum lembaribane.

⁴ Man ubimo ng’olo ni Hilkia ma jalam ma dit, ku julam mi pok mir arionde, man jukur mi kamondo, kara giwodh agulu ceke woko kud i hekalu pa Yehova ma jutimo ni Bal, man ni mungu m’araga, man ni udul ceke m’i polo; e ewang’ugi ng’ei Yerusalem i pothi m’i Kidron, man etero vurune i Beth-el.

⁵ Man eredho julam mi mungu m’araga piny, m’ubimo mi Yuda ketho kara giwang’ udok ma ng’wice ng’ar i ka ma malu mir adhura mi Yuda, man i ka m’utieko Yerusalem gbur; ju ma giwang’u udok ma ng’wice ng’ar ni Bal bende, ni ceng’, man ni dwi, man ni cero ma dongo, man ni udul ceke m’i polo.

⁶ Man ewo dho mungu m’araga woko kud i ot pa Yehova, ecidho kude ng’ei Yerusalem, ba kulo Kidron, man ewang’e dhu kulo Kidron, e eode edoko ni utur, man eoyo uturne wi liend dhanu ma sai.

⁷ Man erwombo udi mi jusodomi piny, ma gini i ot pa Yehova, ka ma mon gicwio ie bongu m’ang’aba pi mungu m’araga.

⁸ Man ewodho julam ceke woko kud i adhura mi Yuda, man ecido ka ma malu ma naka julam wang’u ie udok ma ng’wice ng’ar, ugambre Geba cil kum Ber-ceba; man emoro gang’ mi ka ma malu piny ma gini i kamondo mi dhugang’ pa Yocuwa ma jabim mir adhura, ma gini yo ku cing’ dhanu ma yor acwic ma ni dhugang’ mir adhura.

⁹ Ento julam mi ka ma malu giidho malu ngo ba pemblam pa Yehova i Yerusalem, ento gicamu kwen ma thobi mbe i ie i kind utumeggi.

¹⁰ Man ecido Tofeth, ma ni i poga mi nyithindho pa Hinom, kara ng’atu moko kud uketh wode kadi nyare ukadh kud i mac ba Molek.

¹¹ Man ekabu riuni m’ubimo mi Yuda mio ni ceng’ woko, i kamondo mi ot pa Yehova, i ng’et kusika pa Nathanmelek ma jagwokpiny, ma ni i lela; man ewang’u magali mi ceng’ ku mac.

¹² Man pemblam ma ni wi ot mi kusika ma malu pa Ahaz, m’ubimo mi Yuda timo, man pemblam ma Manase timo i lelagang’ ario mi ot pa Yehova, ubimo mugo piny, man eodogi piny ku keca, man eoyo uturne i kulo Kidron.

¹³ Man ubimo cido ka ma malu ma ni i wang’ Yerusalem, ma ni yo ku cing’ ma yor acwic ni got mi nyoth, ma Suleman m’ubimo mir Israel ugomo ni Actoreth ma en e ginmajudagu mi Jusidoni, man ni Kemoc ma en e ginmajudagu mi Moab, man ni Milkom ma en e ginmajudagu mi nyithindho mir Amon.

¹⁴ Man eturo mbegi nziki nziki, man etong’o mungu m’araga piny, man epong’o kakagi ku cogo mi dhanu.

¹⁵ Man ke eturo pemblam piny ma ni Beth-el, man ka ma malu ma Yeroboam ma wod Nebat, m’uketho Israel udubo, utimo, en e pemblam maeno ku ka ma malu de; e ewang’u ka ma malu man eode edoko ni utur, man ewang’u mungu m’araga.

¹⁶ Man ka Yosia lokre gire, eneno udiliel ma ni keca i got; man eoro kwenda, e ewodho cogo woko kud i udiliende, man ewang’ugi wi pemblamne, e ecide, calku lembe pa Yehova ma dhanu pa Mungu yero, m’eyero pi gin maeni.

¹⁷ Elund ewacu kumae, Jampoi maeni en e ang’o m’aneno? Man dhanu mir adhurane giyero ire kumae, En e odliel pa dhanu pa Mungu, m’uai i Yuda, man m’uyero pi gin maeni m’itimo kum pemblam mi Beth-el.

¹⁸ E ewacu kumae, Wek edong’; ng’atu moko kud ukab cogone. Kum kumeno giweko cogone dong’, karacelo ku cogo pa jabila m’uai i Samaria.

¹⁹ Man Yosia kabu udi ceke woko bende mi ka ma malu ma ni i adhura mi Samaria, m’ubimo mir Israel utimo kara unyai ng’ecwiny i Yehova, man etimo i kumgi calku tic ceke m’etimo i Beth-el.

²⁰ Man enego julam ceke mi ka ma malu ma ni kuca, wi pemblam, man ewang’u cogo dhanu i wigi; e edok Yerusalem.

Jukwiro Kadhukuwijo

²¹ Man ubimo ng’olo ni dhanu ceke, ewacu kumae, Wukwir kadhukuwijo ni Yehova Mungu mu, calu egore i kitabu maeni mi lembariba.

²² Andha jukwiro kadhukuwijo ma calu maeni ngo ugambre i ceng’ mi jupoklembe m’upoko lembe mir Israel, kadi i ceng’ ceke mir ubimo mir Israel, kadi mir ubimo mi Yuda de;

²³ ento i rundi apar wi aborane p’ubimo ma Yosia jukwiro kadhukuwijo maeni ni Yehova i Yerusalem.

Kwinyo pa Mungu kum Yuda

²⁴ Mange ju ma weg tipo, ku weg ajoga, kud ayi gin m’acwia, ku mungu m’araga, ku ginmajudagu ceke ma juneno i ng’om Yuda kud i Yerusalem, Yosia kabugi woko, kara etim lembe mi cik ma jugoro i kitabu ma Hilkia ma jalam unwang’u i ot pa Yehova.

²⁵ Man ubimo moko mbe m’ular uwok ire ma calu en, m’ulokre ba Yehova kud adundene ceke, man ku ng’eyong’ec pare ceke, man ku tekre ceke, calku cik ceke pa Musa; kadok yo ng’eye de moko mbe m’uwok ma calu en.

²⁶ Karacelo ku maeni, Yehova lokre ngo ni lak kwinyo pare ma dit, ma jucwinyo kudo ng’ecwiny pare kum Yuda, kum gin ceke ma judagu ma Manase nyayu kudo ng’ecwiny i ie.

²⁷ E Yehova wacu kumae, Abikabu Yuda bende kud i wang’a, calu akabu Israel, man abibayu adhura maeni m’agoyo wie, en e Yerusalem, man ot m’awacu pire kumae, Nyinga bibedo kuca.

Tho pa Yosia

²⁸ Nie dong’ tic pa Yosia, ku gin ceke m’etimo, gigore ngo i kitabu mi lemkei mir ubimo mi Yuda?

²⁹ I nindo pare Farao-neko m’ubimo mi Misiri idho malu kum ubimo mir Ascur kum kulo Frati: e ubimo Yosia cidho i kume; man Farao-neko nege i Megido, kinde m’enene.

³⁰ E jutic pare tere ku i magali m’etho ku i Megido, man gikele Yerusalem, e giyike i odliel pare ma dhe. Man dhanu m’i ng’om gigamu Yehoahaz ma wod Yosia, e giwire, man gikethe ni ubimo ka won.

Nindo mi Camuker pa Yehoahaz man Maram Jukabe Ko

³¹ Yehoahaz rundi pare pier ario wi adek kinde m’emaku camu ker; e ecamu ker dwi adek i Yerusalem: man nying’ min mire Hamutal ma nya Yeremia ma Libna.

³² Man etimo gin ma rac i wang’ Yehova calku gin ceke ma kwaru pare timo.

³³ Man Farao-neko kethe i kol i Ribla i ng’om Hamath, kara kud ecam ker i Yerusalem; man egoyo ajok wi ng’ombe talanto mi mola ma tar dak acel, man talanto mi mola ma kwar acel.

³⁴ Man Farao-neko ketho Eliakim ma wod Yosia ni ubimo kaka Yosia ma won, man eloko nyinge doko Yehoiakim: e ekabu Yehoahaz woko; man ebino Misiri, e etho kuca.

³⁵ Man Yehoiakim umio mola ma tar ku mola ma kwar ni Farao; ento ebolo ajok wi ng’om kara emi sente calku lembang’ola pa Farao: egamu mola ma tar ku mola ma kwar ba dhanu m’i ng’om ku ba dhanu ceke calkud ajok pare, kara emie ba Farao-neko.

Nindo mi Camuker pa Yehoiakim

³⁶ Yehoiakim rundi pare pier ario wi abic kinde m’emaku camu ker; man ecamu ker rundi apar wi acel i Yerusalem: man nying’ min mire Zebida ma nyar Pedaya ma Ruma.

³⁷ Man etimo gin ma rac i wang’ Yehova, calku gin ceke ma kwaru mire timo.