2 Ubimo 19 - The Holy Bible In Alur (Lur) Revised Orthography

Yuda Both kud i Cing’ Senakerib

¹ Man etimbre kinde m’ubimo ma Hezekia winjo maeni, nia eyeco kendi pare, man eumbre gire ku gonia, e emondo i ot pa Yehova.

² Man eoro Eliakim, ma en e wi juot, man Cebna ma jagorcik, ku judongo mi julam, m’ubedo auma ku gonia, bang’ Isaya ma jabila ma wod Amoz.

³ E giwacu ire kumae, Hezekia wacu kumae, Ceng’ maeni en e ceng’ mir ang’abacwiny, man mi juk, man mi cac; kum nyithindho giwok ma junyologi anyola, man tego ma junyolo kogi mbe.

⁴ Kuno nyo Yehova Mungu peri biwinjo lembe ceke pa Rabcake, m’ubimo mir Ascur ma jadit pare oro kara ecai Mungu ma kwo, man ebijuko lembe ma Yehova Mungu peri winjo: kum kumeno ting’ rwo peri malu pi dong’ dhanu m’udong’.

⁵ Kum kumeno jutic p’ubimo ma Elezekia bino bang’ Isaya.

⁶ E Isaya wacu igi kumae, Wuwac kumae ni jadit mu, Yehova wacu kumae, Lworo kud unegi kum lembe m’iwinjo, ma jutic p’ubimo mir Ascur ucida kudo.

⁷ Nen, abiketho tipo i ie, man ebiwinjo rwonglembe, e ebidok i ng’om pare ma dhe; man abiketho epodho ku palamularu i ng’om pare ma dhe.

⁸ Kum kumeno Rabcake dok, e enwang’u ubimo mir Ascur ubekiedo kum Libna; kum ewinjo nia eai kud i Lakic.

⁹ Man kinde m’ewinjo rwonglembe pi Tirhaka m’ubimo mir Ethiopia, kumae, Nen, ewok woko kara ekied kudi, e eoro jukwenda kendo ba Hezekia, ewacu kumae,

¹⁰ Iwac kumae ni Hezekia m’ubimo mi Yuda, Kud iyi Mungu mi genogen ni kume ubombi, m’ewacu kumae, Jubimio Yerusalem i cing ubimo mir Ascur ungo.

¹¹ Nen, iwinjo gin m’ubimo mir Ascur utimo kum ng’om ceke, ku nyothogi pet: e ibibothi?

¹² Mungu mi thek bibodho ju ma kwaru para nyotho, en e Gozan, man Haran, ku Rezef, man nyithindho pa Aden ma gini i Telasari?

¹³ Ubimo mir Hamath eni kani, man ubimo mir Arpad, man ubimo mir adhura mi Sefarvaim, mi Hena, man Iva?

¹⁴ E Hezekia gamu waraga kud i cing’ jukwenda, man esome; e Hezekia idho malu ba ot pa Yehova, man epedhe i wang’ Yehova.

¹⁵ E Hezekia rwo i wang’ Yehova, man ewacu kumae, E Yehova, Mungu mir Israel, m’ubedo wi kerubi, in i Mungu, in i kendi, mi ker ceke m’i ng’om; itimo polo ku ng’om.

¹⁶ Cik ithi, E Yehova, man iwinji; yab weng’i, E Yehova, man inen; e iwinj lembe pa Senakerib, m’eore ecai kudo Mungu ma kwo.

¹⁷ Andha, Yehova, ubimo mir Ascur ginyotho thek pet ku ng’om migi,

¹⁸ e gibayu mungu migi i mac; kum gi mungu ngo, ento tic m’i cing’ dhanu, yen ku kidi; ka kumeno ginyothogi.

¹⁹ Ka kumeno kawono, E Yehova Mungu mwa, bodhwa, wakwei, kud i cinge, kara ker ceke m’i ng’om ung’ei nia in i Yehova in i Mungu i kendi.

²⁰ Isaya ma wod Amoz ulund uoro kwenda ba Hezekia, ewacu kumae, Yehova, Mungu mir Israel uwacu kumae, Kum ipenja kum Senakerib m’ubimo mir Ascur, awinjoi.

²¹ Maeni lembe ma Yehova yero pire: Nyasayuni ma sumba ucei man eng’ieri cil ma lewic umeki ko; Nyayerusalem uyengo wie i kumi.

²² Icayu man icido ng’a? man iting’o dwendi ing’ayu weng’i malu de i kum ng’a? cil kum Ng’atu ma Leng’ mir Israel.

²³ Icayu Rwoth ku jukwenda peri, man iwacu kumae, Kud udul magali para aidho wi gudi, i ng’et Lebanon ma yor i ie; man abing’olo musongene ma wiu piny, man siprene ma pire tek; man abimondo i the kagonjo pare, luli m’i podho pare ma cek dit.

²⁴ Atong’o man amadhu pi ma jukung’eyo ngo, man abidwono kulo ceke mi Misiri ku tienda.

²⁵ Iwinjo ngo maram atimo ko maeni con, man atime i nindo ma coni? kawono aketho etimbre kakare, kara ebed tic peri ya inyoth adhura ma tek udok ni udhuru mi nyoth.

²⁶ Ka kumeno ju m’ubedo i igi tego migi nok, cwinygi ng’abre man ging’oyo ndiri; gibedo calu lum m’i thim, man calu uboko ma numu, calu lum ma wi ot, man calu cam m’urany ma fodi.

²⁷ Ento ang’eyo bedopiny peri, ku wokwoko peri, man mondo peri, ku pokodhok peri ni kuma.

²⁸ Kum ang’eyo pokodhok peri m’i kuma, man kum tingri peri bino malu i itha, ka kumeno abiketho gol para i umi, man gwang’ para i dendhogi, man abiloki cen i yo m’ibino i ie.

²⁹ Man maeni bibedo giranyutha iri: i rundi maeni wubicamu gin m’utwi kende, man i rundi mir arionde gin m’uloth i kume; e i rundi mir adege wucoi, man wukai, wupidh podho mir ulok de, man wucam nyinge.

³⁰ Man dong’ dhanu mi ot pa Yuda m’uboth ulaggi binyang’ kendo piny, man gibicego nying’gi malu.

³¹ Kum dong’ dhanu m’udong’ biai malu kud i Yerusalem, man ju ma biboth ku kind got Sayuni: ngiri pa Yehova bitimo maeni.

³² Ka kumeno Yehova wacu kumae pir ubimo mir Ascur, Ebibino bang’ adhura maeni ngo, kadi athero de ebikilo kuca ngo, kadok ku ban de ebibino i wang’e ngo, kadi ng’om de ebidhuro ngo i kume.

³³ Kud i yo m’ebino i ie, ebidok de kud i ie, e ebibino bang’ adhura maeni ngo, Yehova wacu.

³⁴ Kum abigwoko adhura maeni kara abodhe, pira, man pi jatic para ma Daudi.

³⁵ E etimbre i diewor maeca, nia malaika pa Yehova wok woko, man egoyo Juascuri rubanga dak acel ku pier abora wi abic i kagonjo: man kinde ma dhanu ai pir kugweno, nen, maeni ceke gin avu.

³⁶ Kum kumeno Senakerib m’ubimo mir Ascur uai, man ecidho edok, e ebedo i Nineve.

³⁷ Man etimbre, kinde m’eberwo i ot pa Nisrok ma mungu pare, nia Adramelek ku Carezer gigoye ku palamularu: man giboth i ng’om Ararat. Man Esarhadon ma wode camu ker kakare.