2 Ubimo 16 - The Holy Bible In Alur (Lur) Revised Orthography

Nindo mi Camuker pa Ahaz

¹ I rundi apar wi abirone pa Peka ma wod Remalia, Ahaz ma wod Yotham m’ubimo mi Yuda maku camu ker.

² Ahaz rundi pare pier ario kinde m’emaku camu ker; man ecamu ker rundi apar wi abusiel i Yerusalem: e etimo gin m’ubedo atira ngo i wang’ Yehova Mungu pare, calu Daudi ma kwaru mire.

³ Ento ewotho i yo mir ubimo mir Israel, eyo, man eketho wode kadh kud i mac, calku ginmajudagu mi thek, ma Yehova bayu woko kud i wang’ nyithindho mir Israel.

⁴ Man elamu lam ewang’u udok ma ng’wice ng’ar de i ka ma malu, man wi ungulu gudi, man the yen ceke m’uluk kubang’e kubang’e.

⁵ Rezin m’ubimo mi Cami ku Peka ma wod Remalia m’ubimo mir Israel gilund giidho malu ba Yerusalem i lwiny: e gitieko Ahaz kud ali, ento gicopo sage ngo.

⁶ I nindo maeca Rezin m’ubimo mi Cami ugamu Elath kendo ni Cami, man eriemo Juyahudi kud i Elath; e Jucami gibino i Elath, man gibedo keca, cil i ceng’ ma tin.

⁷ Kum kumeno Ahaz uoro jukwenda ba Tiglat-pileser m’ubimo mir Ascur, ewacu kumae, An a jatic peri man wodi: idh malu, man ibodha kud i cing ubimo mi Cami, man kud i cing ubimo mir Israel, m’ujai ira.

⁸ E Ahaz ugamu mola ma tar ku mola ma kwar ma junwang’u i ot pa Yehova, man i kakanpiny mi ot p’ubimo, man eore ni giramia ni ubimo mir Ascur.

⁹ Man ubimo mir Ascur uwinjo dwande; e ubimo mir Ascur uidho malu kum Dameski, e emake, man eyaku dhanune ni ng’eca i Kir, man enego Rezin.

¹⁰ E ubimo ma Ahaz ucidho i Dameski kara eromb ku Tiglat-pileser m’ubimo mir Ascur, man eneno pemblam ma ni i Dameski; e Ahaz m’ubimo oro ayi mi pemblam bang’ Urija ma jalam, ku rambe de, calku bodhone ceke.

¹¹ E Urija ma jalam uguro pemblam: calku gin ceke ma Ahaz m’ubimo oro kud i Dameski, Urija ma jalam utime kumeca ni dwogo p’ubimo ma Ahaz kud i Dameski.

¹² E kinde m’ubimo dwogo kud i Dameski, ubimo neno pemblamne: e ubimo coro ceng’ni ba pemblam, man ethiero i wie.

¹³ E elamu lam m’awang’a pare, ku lam mi mogo pare, man ekonjo lam m’amadha pare, man ekiro rimo mi lam mi kwiocwiny pare, wi pemblamne.

¹⁴ E pemblam mi mola, ma ni i wang’ Yehova, ekelo kud i wang’ot, kud i kind pemblam pare ku ot pa Yehova, man ekethe yor ariwa ma malu i ng’et pemblam pare.

¹⁵ Man Ahaz m’ubimo ng’olo ni Urija ma jalam, ewacu kumae, Wang’ lam m’awang’a mi kugweno wi pemblam ma dit, ku lam mi mogo mir uthieno, ku lam m’awang’a p’ubimo, ku lam mi mogo pare, ku lam m’awang’a mi dhanu ceke m’i ng’om, man lam mi mogo migi, ku lam m’amadha migi; man ikir rimo ceke mi lam m’awang’a i wie, ku rimo ceke mi lam: ento lam mi mola bibedo ira m’apenjo kudo.

¹⁶ Urija ma jalam utimo kumeca, calku gin ceke m’ubimo ma Ahaz ung’olo.

¹⁷ Man Ahaz m’ubimo thumo ng’et kathere woko, man eting’o jamblogo kud i wigi man eting’o nam ku wi koni dhiang’ mi mola ma ni i there, man ekethe wi kabedo mi kidi.

¹⁸ E yo m’auma mi ceng’ sabatu ma jugomo i ot, ku kamondo p’ubimo ma yo woko, eloko yo ba ot pa Yehova, ni kum ubimo mir Ascur.

¹⁹ Nie dong’ tic pa Ahaz m’etimo, gigore i kitabu mi lemkei mir ubimo mi Yuda ngo?

²⁰ Man Ahaz unindo ku kwaru pare, e juyike ku kwaru pare i adhura pa Daudi: man Hezekia ma wode camu ker kakare.