2 Ubimo 11 - The Holy Bible In Alur (Lur) Revised Orthography

Athalia Yenyo Mayu Ker

¹ Nie kinde ma Athalia ma min Ahazia neno nia wode tho, eai man enyotho kodhi mi ker ceke.

² Ento Yehoceba, ma nyar ubimo ma Yoram nyamin Ahazia, egamu Yoac ma wod Ahazia, man ekwale kud i kind wot ubimo ma junego, en ku japidi pare, e ekethogi i kusika mi vuto; man gikane ni Athalia, ketho nia junege ngo;

³ man ebedo kude apana i ot pa Yehova rundi abusiel. Man Athalia camu ker wi ng’om.

⁴ Man i rundi mir abirone Yehoiada oro kwenda man ekelo jego ma wi dak mi Jukari man mi jukur, e egamugi i bang’e i ot pa Yehova; man etimo lembariba kugi, e eketho gikwong’o i ot pa Yehova, man enyutho igi wod ubimo.

⁵ Man eng’olo igi, ewacu kumae, Maeni gin ma wubitimo: kindwu mir adege, m’umondo i ceng’ sabatu, bibedo jugwok kur mi ot p’ubimo;

⁶ man ng’ete mir adege bibedo i dhugang’ Sur; man ng’ete mir adege i dhugang’ i ng’ei jukur; kum kumeno wubigwoko kur mi ot, man wubibedo ni kacer dhanu.

⁷ Man wun udul ario, en e dhanu ceke m’ucidho woko i ceng’ sabatu, wubigwoko kur mi ot pa Yehova kum ubimo.

⁸ E wubitieko ubimone gbur, ku ba dhanu ceke ng’atuman ku jambali pare i cinge; man ng’atu m’umondo yor i ther ma juthero, wek junege: e wubed kud ubimo kinde m’ewok woko, ku kinde m’emondo.

⁹ Man jego ma wi dak gitimo calku lembe ceke ma Yehoiada ma jalam ung’olo; e ku ba dhanu ng’atuman ugamu dhanu pare, ju ma gibibino i ceng’ sabatu, man ju ma gibiwok woko i ceng’ sabatu, e gibino ba Yehoiada ma jalam.

¹⁰ Man julam gimio tong’ ku ban ma naka p’ubimo ma Daudi, ma ni i ot pa Yehova ni jego ma wi dak.

¹¹ E jukur gicungo, dhanu ceke kubang’gi kubang’gi ku jamtho i cing’gi, ugambre i ng’et ot ma yor acwic cil kum ng’et ot ma yor acam, i ng’et pemblam ku ot, i ng’et ubimo gbur.

¹² Elund ewodho wod ubimo, man eketho jamkermiwic i wie, emio ire lembatuca de; e gikethe ni ubimo, man giwire; man giteng’o cing’gi, giwacu de kumae, Ubimo bed hai.

¹³ Man kinde ma Athalia winjo bawoi mi jukur man mi dhanu, ebino ba dhanu i ot pa Yehova:

¹⁴ e eneno, man, nen, ubimo cungo ba mbegi, calu kuragi, ku jego man agwara i vut ubimo; e dhanu ceke m’i ng’om anyong’a negogi, man gikudho agwara. Athalia lund uyeco kendi pare, man ekok kumae, Lembapora ma rac! lembapora ma rac!

¹⁵ E Yehoiada ma jalam ung’olo ni jego mi dak ma jukethogi wi udul, ewacu igi de kumae, Wukabe woko ku kind jukur; man ng’atu m’ulube wunege ku palamularu. Kum jalam uwacu kumae, Ku junege i ot pa Yehova.

¹⁶ Kum kumeno giyabu yo ire; man ecidho ku yo ku ma riuni mondo ko i ot p’ubimo: e junege kuca.

¹⁷ Man Yehoiada timo lembariba kind Yehova kud ubimo man dhanu, nia gibed dhanu pa Yehova; i kind ubimo bende ku dhanu.

¹⁸ E dhanu ceke m’i ng’om gicidho ba ot pa Bal, e girwombe piny; pem pare kud ayi gin m’acwia pare gituro nziki nziki ma gwei, man ginego Matan ma jalam pa Bal i wang’ pemblam. Man jalam uketho jego wi ot pa Yehova.

¹⁹ Man egamu jego ma wi dak, ku Jukari, man jukur, ku dhanu ceke m’i ng’om; e gikelo ubimo piny kud i ot pa Yehova, man gibino yo ba dhugang’ mi jukur cil kum ot p’ubimo. Man ejany wi komker p’ubimo.

²⁰ Kum kumeno dhanu ceke m’i ng’om anyong’a negogi, e adhura kwio. E Athalia junego ku palamularu ba ot p’ubimo.

Nindo mi Camuker pa Yehoac mi Yuda

²¹ Yehoac rundi pare abiro kinde m’emaku camu ker.