2 Ubimo 10 - The Holy Bible In Alur (Lur) Revised Orthography

Yehu Daru Juot pa Ahab

¹ Nwang’u wot Ahab pier abiro ni Samaria. Man Yehu goro waraga, man eorogi i Samaria, ba jubim mi Yezrel, en e judongo, man ba ju ma tungo wot Ahab, ewacu kumae,

² Kawono ka waraga maeni tundo i beng’wu, kum wot jadit mu ni kudu, man magali ku riuni ni kudu, kud adhura ma tek bende, man jambali;

³ wuyeny ng’atu ma ber ma cu i kind wot jadit mu, man wukethe wi komker pa won, wukied de pi ot pa jadit mu.

⁴ Ento lworo negogi apila, man giwacu kumae, Nen, ubimo ario gicungo i wang’e ngo: wabilund cungo nenedi?

⁵ Man ng’atu ma ni wi juot, ku ng’atu ma ni wi adhurane, man judongo bende, ku ju ma tungo nyithindho, gioro kwenda ba Yehu, giwacu kumae, Wan wa jutic peri, man wabitimo gin ceke m’iwacu iwa; wabiketho ng’atu moko ngo ni ubimo: tim gin m’ubedo ber i weng’i.

⁶ Elund egoro waraga mir arionde igi, ewacu kumae, Tek wubedo jubang’a, man tek wubiwinjo dwanda wugam wi dhanu ma wot jadit mu, man wubin i bang’a i Yezrel urwo unyoni. Nwang’u wot ubimo, ma gi dhanu pier abiro, gini ba dhanu ma weg dwong’ mir adhurane, m’utungogi.

⁷ Man etimbre, kinde ma waragane bino i bang’gi, nia gimaku wot ubimo, man ginegogi, en e dhanu pier abiro, man giketho wigi i katoko, e giorogi i bang’e i Yezrel.

⁸ E jakwenda bino i bang’e, man ewacu ire kumae, Gikelo wi wot ubimo. E ewacu kumae, Wucok dhoggi ni ungu ario i kamondo mi dhugang’ maram kugweno wok ko.

⁹ E etimbre kugweno nia ewok woko, man ecungo, ewacu de ni dhanu ceke kumae, Wun wu pwe: nen, aporo lembe kum jadit para, man anege; ento ng’a m’ugoyo jumaeni ceke?

¹⁰ Wung’ei kawono nia lembe pa Yehova moko mbe ma bidong’, ma Yehova yero pi ot pa Ahab: kum Yehova timo lembe m’eyero ku jatic pare ma Elia.

¹¹ Kum kumeno Yehu goyo dhanu ceke m’udong’ m’i ot pa Ahab i Yezrel, ku dhanu pare ma weg dwong’ ceke, man jurimbe ma ka cwinye, ku julam pare, maram eweko ko ire moko ngo m’udong’.

¹² E eai ecidho, man ecidho Samaria. Man kan eni ba ot mi nyaru yukrombe mi jukwac i yo,

¹³ Yehu rombo ku utumin Ahazia m’ubimo mi Yuda, man ewacu kumae, Wu jukani? E giloko lembe kumae, Wan wa utumin Ahazia: man waloro piny kara wamoth nyithindho p’ubimo man nyithindho pa ci ubimo.

¹⁴ Man ewacu kumae, Wumakgi ma kwo. E gimakugi ma kwo, man ginegogi dhu vur mi ot nyaru yukrombe, en e dhanu pier ang’wen wi ario; kadok kindgi moko de eweko ngo.

¹⁵ E kinde m’eai ku keca, enwang’u Yehonadab ma wod Rekab m’ubebino rombo kude; man emothe, ewacu ire kumae, Adundeni bedo atira, calu adundena bedo kud adundeni? E Yehonadab uloko lembe kumae, Ebedo kumeno. Tek ebedo kumeno, mi ira cingi. E emio ire cinge; man eting’e malu i bang’e i magali.

¹⁶ Man ewacu kumae, Wacidh wakudi, man inen ngiri para ma pi Yehova. Kum kumeno giketho ewotho ku i magali pare.

¹⁷ E kinde m’ebino Samaria, egoyo dhanu ceke m’udong’ i Samaria ma pa Ahab, maram enyothe ko, calku lembe pa Yehova, m’eyero ni Elia.

Yehu Nyotho Rwo Ceke ma ni Bal

¹⁸ E Yehu coko dhanu ceke karacelo, man ewacu igi kumae, Ahab utimo ni Bal nyanok: ento Yehu bitimo ire dit.

¹⁹ Ka kumeno kawono wulwong’ jubila pa Bal ceke i bang’a, jurwo pare ceke, ku julam pare ceke; kud wuwek moko dong’: kum abedo ku lam ma dit m’atira ni Bal: ng’atu ma tek ubedo mbe, ebibedo kwo ngo. Ento Yehu time i abombi, kara enyoth jurwo ni Bal.

²⁰ E Yehu wacu kumae, Wuyer pi cokri ma dit pi Bal. E giyero.

²¹ Man Yehu oro kwenda kind Israel ceke: e jurwo pa Bal ceke gibino, ketho nia ng’atu moko mbe m’udong’ ma kubino ngo. E gimondo i ot pa Bal; man ot pa Bal upong’ thur.

²² Man ewacu ni jawi kakan kendi kumae, Wodh kendi mi jurwo pa Bal ceke. E ewodho kendi woko igi.

²³ Man Yehu mondo, giku Yehonadab ma wod Rekab, i ot pa Bal; man ewacu ni jurwo pa Bal kumae, Wuyeny, man wunen nia jutic pa Yehova moko kud ubed keni, ndhu jurwo pa Bal kendgi.

²⁴ E gimondo kara githier lam ku lam m’awang’a. Nwang’u Yehu goyo ire wi dhanu pier abora yo woko, man ewacu kumae, Tek kind dhanu moko m’akelo i cingwu ubothi, ng’atu m’uweko ecidho, kwo pare bibedo pi kwo pa ng’atuca.

²⁵ Man etimbre, kinde m’edaru thiero lam m’awang’a nia Yehu wacu ni jukur man ni jego kumae, Wumondi, man wuneggi; kud wuwek moko wok woko. E gigoyogi ku lak palamularu; man jukur ku jego gibayugi woko, e gicidho bang’ adhura mi ot pa Bal.

²⁶ E giwodho mbegi ma ni i ot pa Bal woko, man giwang’ugi.

²⁷ E girwombo mbegi pa Bal piny, man girwombo ot pa Bal piny, gidwoke de ni odbar, cil i ceng’ ma tin.

²⁸ E Yehu nyotho Bal kud i Israel kumeni.

²⁹ Ento dubo pa Yeroboam ma wod Nebat, m’eketho Israel udubo kudo, Yehu weko lubogi ngo, lembene kumae, Nyithi dhiang’ mi mola ma kwar ma gini i Beth-el, man ma gini i Dan.

³⁰ Man Yehova wacu ni Yehu kumae, Kum itimo dre kutimo gin m’ubedo atira i wang’a, man itimo kum ot pa Ahab calku lembe ceke ma ni i adundena, woti mi dhanum’utuk mir ang’wende bijany wi komker mir Israel.

³¹ Ento Yehu ketho cwinye ngo kum wotho i cik pa Yehova, ma Mungu mir Israel, kud adundene ceke: eweko dubo pa Yeroboam ungo, m’eketho Israel udubo kudo.

³² I ceng’ maeca Yehova maku kabu ng’et Israel: man Hazael ugoyogi i kieu ceke mir Israel;

³³ ugambre Yordan cil yo nyangu, ku ng’om ceke mi Gilead, en e Jugadi, ku Jurubeni, man Jumanase, ugambre Aroer, ma eni ng’et poga mir Arnon, cil Gilead ku Bacan.

³⁴ Nie dong’ tic pa Yehu, ku gin ceke m’etimo, man tek pare ceke, gigore i kitabu mi kei mir ubimo mir Israel ungo?

³⁵ E Yehu nindo ku kwaru pare; man juyike i Samaria. E Yehoahaz ma wode camu ker kakare.

³⁶ Man nindo ma Yehu camu ie ker wi Israel i Samaria en e rundi pier ario wi abora.