2 Timoteo 3 - The Holy Bible In Alur (Lur) Revised Orthography

¹ Endre ing’ei mae, nia i ceng’ mi kajik rundi nindo mi can biwok.

² Kum dhanu bibedo ma ng’atuman bimare gire en, man bimare gire en, gibibedo jumar sente, ku jukulula, ku ju ma gidodri wi juwagi, ku ju ma cayu cac, ku ju ma gi juco ni junyodogi, ku ju ma gifoyo foc ungo, ku ma leng’ ungo de,

³ ku ju ma mer mi wat umbe kugi, ku ju ma thegri ngo, ku ju ma gibalu abali de, ku ju ma kweri gigi ngo, ku ju ma kwiny de, ku ju m’udagu gin ma ber,

⁴ ku juganda de, ku ju ma wigi tek, ku ju ma gitingri, ku ju ma gimaru migi anyong’a mananu ma sagu mer ma gimaru ko Mungu;

⁵ ma gimoko kum ayi kwanyu koth Mungu, ento gikwero tegone: koc woko kum joni bende.

⁶ Kum kind joni moko gi ju ma gimondo i udi lwe, man gimaku mon ni ayeki ma jukusegu ma giyeyo ter mi dubo, ma awanya ma rac ma mba mba ting’ogi,

⁷ gi ju ma giponjo ng’eyo areri, ento gicopo tundo kum ng’eyong’ec mi lemandha ngo.

⁸ Man calu yang’ Yane giku Yambre gijai ni Musa, e joni bende gijai kum lemandha kumeca; co ma pidoic migi nyothre, ma girwinyo ndhu kum yioyic.

⁹ Ento lembe migi bijik: kum lembe migi ma kite mbe biwok ngbeng’ i wang’ dhanu ceke, calu lembe mi joca bende nyuthre.

Paolo Ciko Timoteo

¹⁰ Ento in re ilub tok ponji para, ku pira bende, ku yeny ma ia yenyo, ku yic m’ayio de, ku mwonyo lembe de ma jumwonyo hai, ku mer m’amaru, ku twiocwiny de,

¹¹ yau ragedo, ku can de; maeni m’anwang’u i Antiokia, ku i Ikonio, ku i Lustra de; thwo ragedo m’aciro: man Rwoth ulara kud i ie ceke.

¹² Andha, man dhanu ceke m’uyenyo gibed kud ayi Mungu i Kristu Yesu gibinwang’u ragedo.

¹³ Ento dhanu ma rac ku ju ma girambri de gibisagri asaga, gibibombo abombi gin de jubibombogi.

¹⁴ Ento dong’ ibed ku lembe m’igamu ng’eyo con, ku maeni ma cwinyi kwio i kume, m’ing’eyo ko ju m’iponjo ng’eyo lembe i bang’gi;

¹⁵ ya ugambre ma fodi i mukere ing’eyo lembagora ma leng’ ma copo dwoki riek kum both ma juboth ko ku yioyic ma ni kum Kristu Yesu.

¹⁶ Lembagora ceke ma Mungu yuyo i wie ai ba Mungu man ke kulokane nuti mi ponji, mi nyuth ma junyutho ko dubo, ku mi twiny ma jutwinyo kojo de, ku mi ponji ma mi bedopwe:

¹⁷ kara dhanu pa Mungu copo romo kakare, m’eyikre ndhu kum tic ceke ma ber kubang’gi kubang’gi.