2 Samwil 4 - The Holy Bible In Alur (Lur) Revised Orthography

Junego Ic-boceth

¹ Man ka Ic-boceth, ma wod Saul, uwinjo nia Abner utho i Hebron, cinge kwio, man Israel ceke cwinygi ng’abre.

² Man Ic-boceth ma wod Saul, ubedo ku dhanu ario ma gi jego mir udul: nying’ ng’atu acel Bana, man nying’ mucelo Rekab, gi wot Rimon ma Jaberothi, mi nyithindho pa Benyamin (kum Beroth bende jukwane pa Benyamin:

³ man Juberothi giringo i Gitaim, man gibedo ni umondo keca cil i ceng’ maeni).

⁴ Nwang’u Yonathan, ma wod Saul, wode nuti ma won abala m’i tielo. Rundi pare abic kinde ma rwonglembe pa Saul ku Yonathan ubino kud i Yezrel; man japidi ting’e, e eringo: man etimbre, kinde m’etimo pio kara eringi, nia epodho, man abala kwanye. Man nyinge Mefiboceth.

⁵ Man wot Rimon ma Jaberothi, gi Rekab man Bana, gicidho, man gibino nyangu ma the dieceng’ kum ot pa Ic-boceth, kan eyom ku dieceng’.

⁶ E gibino keca i dieot, calu giyenyo gikel nganu; man gigoye i kume: e Rekab ku Bana m’umin mire giboth.

⁷ Nie ka gibino i ot, kan evuto wi kavuto pare i odnindo pare, gigoye, e ginege, man githumo wie woko, man gicidho yo bang’ Araba ku diewor soro.

⁸ Man gikelo wi Ic-boceth ba Daudi i Hebron, man giwacu ni ubimo kumae, Nen, wi Ic-boceth, ma wod Saul, ma jadegini, m’eyenyo kwo peri: Yehova culo kwor pa rwoth para m’ubimo i ceng’ maeni kum Saul, man kum kodhine.

⁹ E Daudi loko lembe ni Rekab ku Bana m’umin mire, ma wot Rimon ma Jaberothi, man ewacu igi kumae, Calu Yehova bedo kwo, m’ewaru ng’eyong’ec para kud i lembe ma tek ceke,

¹⁰ kinde ma ng’atu acel uyero ira, ewacu kumae, Nen, Saul utho, ma ie paru ya ekelo rwonglembe ma ber, amake, man anege i Ziklag, ma en e sukulia m’amio ire kum rwonglembe pare.

¹¹ E ka dhanu ma judubo m’unego ng’atu ma pwe i ot pare ma dhe wi kavuto pare ke, abilwong’o rimbe i beng’wu dit ma sagu ngo kawono, man abikabuwu woko ngo kud i ng’omi?

¹² Man Daudi ng’olo ni awobi pare, e ginegogi, man githumo cing’gi ku tiendgi woko, man gilierogi malu i ng’et kut i Hebron. Ento giting’o wi Ic-boceth, man giyike i liel pa Abner i Hebron.