2 Samwil 21 - The Holy Bible In Alur (Lur) Revised Orthography

Daudi Culo pir Amoni ni Jugibeoni

¹ Man ndru nuti i ceng’ pa Daudi rundi adek, rundi ku rundi; e Daudi yenyo wang’ Yehova. Man Yehova wacu kumae, En e pi Saul, man kum ot pare mi rimo, kum eketho Jugibeoni tho.

² Man ubimo Lwong’o Jugibeoni, e ewacu igi (nwang’u Jugibeoni gi kind nyithindho mir Israel ungo, ento mi dong’ Juamori; man nyithindho mir Israel gikwong’o igi: man Saul uponjo negogi, kum ngiri pare ma pi nyithindho mir Israel ku Yuda);

³ e Daudi wacu ni Jugibeoni kumae, Abitimo ang’o iwu? man abiculo kud ang’o, kara wumi mugisa wi aba pa Yehova?

⁴ E Jugibeoni giwacu ire kumae, En e lembe mi mola ma tar kadi mola ma kwar ungo ma ni i kindwa ku Saul, kadi ku ot pare; kadok en e iwa ngo ma nia waketh ng’atu moko tho i kind Israel. Man ewacu kumae, Gin ma wubiwacu, maeno abitimo iwu.

⁵ E giwacu ni ubimo kumae, Ng’atu m’unyothowa, man m’upido lembe i kumwa, nia junyothwa ku wadong’ i kieu moko mir Israel,

⁶ wek jumi iwa dhanu abiro ma kind wote, man wabilierogi malu ba Yehova i Gebeya pa Saul, ma ng’atu ma Yehova goyo wie. E ubimo wacu kumae, Abimiogi.

⁷ Ento ubimo cero Mefiboceth, ma wod Yonathan ma wod Saul, ni kum kwong’ pa Yehova ma ni i kindgi, i kind Daudi ku Yonathan ma wod Saul.

⁸ Ento ubimo gamu wot ario pa Rizpa ma nyar Aia, m’enyolo ni Saul, gin Armoni man Mefiboceth; man wot Mikal abic ma nya Saul m’enyolo ni Adriel ma wod Barzilai ma Jameholathi:

⁹ man emiogi i cing’ Jugibeoni, e gilierogi wi got i wang’ Yehova, man gipodho gin abiro karacelo. Man junegogi i ceng’ mi mwoka, i ceng’ ma kwong’ane, ka jutheko mwokanganu.

¹⁰ E Rizpa ma nyar Aia gamu gonia, man epedhe ire wi cana, ugambre i thekri mi mwoka cil ma pi ukonjre i wigi kud i polo; man eyio ngo nia winyo m’i polo ubed i wigi ku dieceng’, kadi yedi m’i thim de ku diewor.

¹¹ E juyero pi gin ma Rizpa ma nyar Aia, ma dhaku m’araga pa Saul, utimo.

¹² E Daudi cidho, man egamu cogo Saul ku cogo Yonathan ma wode ku ba dhanu mi Yabec-gilead, m’ukwalugi kud i gengi mi Beth-can, ka ma Jufilisti gilierogi i ie, i ceng’ ma Jufilisti ginego ie Saul i Gilboa;

¹³ e egamu cogo Saul ku kuca ku cogo Yonathan ma wode: man gicoko cogo ju ma julierogi.

¹⁴ E giyiko cogo Saul ku pa Yonathan ma wode i ng’om Benyamin i Zela, i odliel pa Kic ma won: e gitimo gin ceke m’ubimo ng’olo. Man yo ku ng’ei maeno Mungu winjo kwac ma pi ng’om.

Abicai Laru Daudi kud i Cing’ Ng’atu M’udongo Bor

¹⁵ E Jufilisti bedo kud ali kendo kud Israel; man Daudi loro piny, giku jutic pare, e gikiedo ku Jufilistine. Man Daudi voc;

¹⁶ man Icbi-benob, ma en e kind wot ng’atu ma bor, ma pek mi tong’ pare en e cekel dak adek mi mola ma ku mukero en m’etwire ku palamularu ma nyen, ie pido ya eneg Daudi.

¹⁷ Ento Abicai ma wod Zeruia bodhe, e egoyo Jafilistine, enege de. Dhanu pa Daudi gilund gikwong’o ire, giwacu kumae, Wabicidho kudu kendo ngo i lwiny, kara kud ineg thala mir Israel.

Ju pa Daudi Nego Ju M’udongo Bor

¹⁸ Man etimbre yo ng’ei maeni, nia ali nuti kendo ku Jufilisti i Gob: Sibecai ma Jahucathi ulund unego Saf, ma en e kind wot ng’atu ma bor.

¹⁹ Man ali moc kendo ku Jufilisti i Gob; man Elhanan ma wod Jayareoregi ma Jabeth-lehemi nego umin Goliath ma Jagiti, ma ruvangu tong’ pare calu yen pa jacwibongu.

²⁰ Man ali moc kendo i Gath, ma ng’atu ma bor dit ni i ie, ma nyig lwet cinge abusiel ku ba cinge ku ba cinge, man lwet tiende de abusiel ku ba tiende ku ba tiende, welne pier ario wi ang’wen; e en bende junyole ni ng’atu ma bor.

²¹ Man kinde m’ecayu Israel, Yonathan ma wod Cimei, m’umin Daudi, unege.

²² Gin ang’wen maeni junyolo ni ng’atu ma bor i Gath; e gipodho ku cing’ Daudi, man ku cing’ jutic pare.