2 Samwil 18 - The Holy Bible In Alur (Lur) Revised Orthography

Tho pa Absalom

¹ E Daudi kwanu dhanu ma gini kude, man eketho jego mi rubanga man jego mi dak i wigi.

² E Daudi oro dhanune, mir adege the cing’ Yoab, man ng’ete mir adege the cing Abicai ma wod Zeruia, m’umin Yoab, man ng’ete mir adege the cing Itai ma Jagiti. Man ubimo wacu ni dhanu kumae, An ku kita bende wabicidho wakudu andha.

³ Ento dhanu wacu kumae, Ibicidho ngo: kum tek waringo, gibipido piwa ngo; kadok tek ng’etwa kucel utho, gibiparu piwa ngo: ento in i rom ku kindwa rubanga apar; ka kumeno kawono e ber ma sagu tek ibedo ayika mi kelo kony iwa ku i adhura.

⁴ E ubimo wacu igi kumae, Abitimo gin m’ubedo ber iwu. Man ubimo cungo ng’et dhugang’, e dhanu ceke giwok woko ku dak man ku rubanga.

⁵ Man ubimo ng’olo ni Yoab kud Abicai man Itai, e ewacu kumae, Wutim ber kum jalawobine, ma Absalom, ni kuma. Man dhanu ceke giwinjo kinde m’ubimo ng’olo ni jego ceke pi Absalom.

⁶ Kum kumeno dhanu giwok woko i thim kum Israel: e lwiny ni i luli pa Efraim.

⁷ E jugoyo dhanu mir Israel keca i wang’ jutic pa Daudi, man nek ma dit nuti keca i ceng’ maeca mi dhanu rubanga pier ario.

⁸ Kum lwiny umoire keca wi wang’ ng’om ceke; e luli camu dhanu i ceng’ maeca ma sagu ma palamularu camu.

⁹ E lembe podho wi Absalom nia eromb ku jutic pa Daudi. Man Absalom ubewotho ku wi kana pare man kanane rikre the jang bongu ma dit m’ukadre, man wie moko kum bongu man eliere ku malu i kind polo ku ng’om; e kanane ma ni yor i there cidho.

¹⁰ E ng’atu moko neno maeni, man eyero ni Yoab, ewacu kumae, Nen, aneno Absalom uliere kum bongu.

¹¹ E Yoab uwacu ni ng’atu m’uyero ire kumae, Man, nen, inene, man igoye keca i ng’om ungo nedi? e kuno di amio iri sente mi mola ma tar apar, ku thond pier.

¹² E ng’atuca wacu ni Yoab kumae, Kadok agam sente mi mola ma tar rubanga i cinga, de aci ketho cinga ngo kum wod ubimo: kum i winjo mwa ubimo ng’olo iri man ni Abicai man ni Itai, ewacu kumae, Wubed ku weng’wu nia ng’atu moko kud umul jalawobi ma Absalom.

¹³ Tek kumeno ngo tek atimo kud abombi kum kwo pare (man lembe moko mbe m’umungre ni ubimo), kuno di in giri igoyo kori i kuma.

¹⁴ Yoab ulund uwacu kumae, Acopo galu kumeno ngo i kumi. E egamu athero adek i cinge, man ekilo kudo adunde Absalom, kinde ma fodi ekwo i kind bongu.

¹⁵ E awobi apar m’uyeyo jambali pa Yoab gicoro ceng’ni man gigoyo Absalom, e ginege.

¹⁶ E Yoab ukudho agwara, man dhanu lokri ku ba lubo tok Israel kum Yoab ucero dhanune.

¹⁷ E giting’o Absalom, man gibaye i vur ma dit i luli, man girodo kidi ma dit apila i wie: man Israel ceke giringo kubang’gi kubang’gi ng’atuman ba hema pare man ba hema pare.

¹⁸ Nwang’u i kinde ma fodi Absalom ubedo kwo egamu man eting’o mbegi ire gire, ma ni i poga p’ubimo; kum ewacu kumae, Woda mbe ma bigwoko nyinga kara jupoi pira; man elwong’o mbegine calku nyinge gire; man julwong’e jampoi pa Absalom, cil i ceng’ maeni.

¹⁹ Ahimaz ma wod Zadok ulund uwacu kumae, Wek aring kawono, man ater rwonglembe bang’ ubimo, maram Yehova culo ko kwor ire kum judegine.

²⁰ E Yoab uwacu ire kumae, Ibibedo jayei rwonglembe tinuni ngo, ento ibitero rwonglembe ceng’ mange; ento ceng’ ma tin ibitero rwonglembe ngo, kum wod ubimo tho.

²¹ Yoab ulund uwacu ni Jakuci kumae, Cidh, iyer ni ubimo gin m’ineno. Man Jakuci rum gire ni Yoab, e eringo.

²² Ahimaz ma wod Zadok ulund uwacu asu kendo ni Yoab kumae, Ento wek lembe timbre calu m’ebitimbre, ng’ol ira, akwei, aring bende tok Jakuci. Man Yoab uwacu kumae, Pirang’o ibiringo, woda, kum ibinwang’u sukulia ngo kum rwonglembene?

²³ Ento wek lembe timbre calu m’ebitimbre, ewacu kumae, Abiringo. E ewacu ire kumae, Ringi. Ahimaz ulund uringo yor i Pambu, man elar etundo ni Jakuci.

²⁴ Nwang’u Daudi bedo i kind dhugang’ ario: man jakur uidho malu wi gang’kidi ku kum wi dhugang’, man eting’o wang’e malu, e eneno, man, nen, ng’atu acel m’uberingo kende.

²⁵ E jakur ukok, man eyero ni ubimo. Ubimo wacu kumae, Tek ebedo kende, rwonglembe ni i dhoge. Man ebino pio pio, e ecoro ceng’ni.

²⁶ E jakume neno ng’atu mange m’uberingo; e jakume lwong’o ba jakur dhugola, man ewacu kumae, Nen, ng’atu mange uberingo kende. Man ubimo wacu kumae, En bende ekelo rwonglembe.

²⁷ Man jakur uwacu kumae, Awacu nyo ng’wec pa ng’atu ma kwong’ane en e calu ng’wec pa Ahimaz ma wod Zadok. Man ubimo wacu kumae, En e ng’atu ma ber, man ebino ku rwonglembe ma ber.

²⁸ E Ahimaz ulwong’o, man ewacu ni ubimo kumae, Kwiocwiny. Man erum gire arieba wang’e i wang’ ubimo, ewacu de kumae, Mugisa bed ni Yehova Mungu peri, m’umio dhanu m’uting’o cing’gi kum rwoth para m’ubimo.

²⁹ Man ubimo wacu kumae, Jalawobi ma Absalom ubedo beri? E Ahimaz uloko lembe kumae, Kinde ma Yoab uoro jatic p’ubimo, en e an ma jatic peri, aneno yakni ma dit, ento ang’eyo there ngo.

³⁰ Man ubimo wacu kumae, Wiri cen, man icung keni. E ewire cen, man ecungo ling’.

³¹ Man, nen, Jakuci wok; man Jakuci wacu kumae, Rwonglembe ni rwoth para m’ubimo; kum Yehova culo kwor iri i ceng’ maeni i kum dhanu ceke m’ujai iri.

³² Man ubimo wacu ni Jakuci kumae, Jalawobi ma Absalom ubedo beri? E Jakuci loko lembe kumae, Jukwoj rwoth para m’ubimo, ku dhanu ceke m’ujai i kumi kara gitimi rac, ubed calu jalawobi maeni bedo.

³³ E can unego ubimo dit, man eidho malu i kusika wi dhugang’, e eywak: man kan ebewotho, ewacu kumae, E woda Absalom, woda, woda Absalom! mundo atho kakeri, E Absalom, woda, woda!