2 Samwil 16 - The Holy Bible In Alur (Lur) Revised Orthography

¹ E kinde ma Daudi kadhu ku wi ka m’aidha nyanok, nen, Ziba ma jatic pa Mefiboceth urombo kude, ku kana ario ma ku jambwoth, man kwen m’ang’ina dak ario ni i wigi, ku njuru nyingulok m’uthwo dak acel, man cupa mi pigulok.

² Man ubimo wacu ni Ziba kumae, Thelembe m’ikelo kume maeni ang’o? Man Ziba wacu kumae, Kana gi mi juot p’ubimo giwoth i wie; man kwen m’ang’ina ku nying’ yen mi cwir gi mir awobi ma gicam; man pigulok, nia wagi ju ma givoc i langa gicopo madhu.

³ Man ubimo wacu kumae, E ka wod jadit peri ni kani? man Ziba wacu ni ubimo kumae, Nen, ebedo i Yerusalem; kum ewacu kumae, Tinuni juot mir Israel bidwoko ker pa vwa ira.

⁴ Ubimo lund uwacu ni Ziba kumae, Nen, gin ceke ma pa Mefiboceth en e peri. Man Ziba wacu kumae. Ajwigra; dong’ anwang’ bero i weng’i, rwoth para. E ubimo.

⁵ Man kinde m’ubimo Daudi bino Bahurim, nen, ng’atu acel m’i ot pa Saul, ma nyinge Cimei, ma wod Gera, ewok woko ku keca; ewok woko, man ewotho ku yanyu ayany.

⁶ E ecanyu kidi kum Daudi, man kum jutic ceke p’ubimo Daudi: man dhanu ceke ku dhanu ma tek ceke gini yo ku cinge ma yor acwic ku ma yor acam.

⁷ Man Cimei wacu kumae kinde m’eyanyu ayany, Cidhi, cidhi, in i dhanu mi rimo, man dhanu ma kite mbe:

⁸ Yehova dwoko rimo ceke m’i ot pa Saul i wii, m’icamu ker i kakare; man Yehova mio ker i cing Absalom ma wodi; man, nen, jumeki i kier peri giri, kum in i dhanu mi rimo.

⁹ Abicai ma wod Zeruia lund uwacu ni ubimo kumae, Nedi avuj gwok maeni belamu rwoth para m’ubimo? akwei, wek akadh lokaca, man athum wie woko.

¹⁰ Man ubimo wacu kumae, Wabedo ku lembang’o wakudu, wu wot Zeruia? Kum elamu, man kum Yehova wacu ire kumae, Lam Daudi; ng’a ma bilund wacu kumae, Nedi itimo kumeno?

¹¹ Man Daudi wacu ni Abicai, man ni jutic pare ceke kumae, Nen, woda, m’uai i ia, ebeyenyo kwo para: e ka Jabenyamini ke kawono bitimo kani? weke, wek elam; kum Yehova ng’olo ire.

¹² Kuno nyo Yehova bineno wi rop ma jutimo i kuma, man nia Yehova bidwoko ira lembe ma ber kum lam pare m’elama ko tin.

¹³ Kum kumeno Daudi ku dhanu pare gicidho i yo; man Cimei wotho ku kor got i kume, man ewotho ku lamu lam, ewotho ku canyu kidi i kume de, man ku ketho utur.

¹⁴ E ubimo, ku dhanu ceke ma gini kude, giol; e etegre gire keca.

¹⁵ Man Absalom, ku dhanu ceke, dhanu mir Israel, gibino Yerusalem, man Ahithofel ni kude.

¹⁶ Man etimbre, kinde ma Hucai ma Jaarki, ma jarimb Daudi, ubino bang’ Absalom, nia Hucai wacu ni Absalom kumae, Ubimo bed hai, Ubimo bed hai.

¹⁷ Man Absalom uwacu ni Hucai kumae, Maeni bero peri ma kum jarimbi? nedi ikwero cidho ku jarimbi?

¹⁸ Man Hucai wacu ni Absalom kumae, Ungo; ento ng’atu ma Yehova, ku dhanu maeni, man dhanu ceke mir Israel ugoyo wie, e abibedo pare, man wabibedo wakude.

¹⁹ Man kendo, maku atim ni ng’a? maku atim i vut wode ngo? calu atimo i vut wuru, e abibedo kumeca i vuti.

²⁰ Absalom ulund uwacu ni Ahithofel kumae, Mi lembapora peri mi gin ma wabitimo.

²¹ Man Ahithofel uwacu ni Absalom kumae, Mond wi mon pa wuru m’araga, m’eweko kara gigwok ot; man Israel ceke biwinjo nia wuru degi apila: e cing’ dhanu ceke ma ni karacelo kudi bidoko tek.

²² Kum kumeno gipedho hema ni Absalom wi ot; man Absalom umondo wi mon m’araga pa won i wang’ Israel ceke.

²³ Man lembapora pa Ahithofel, m’emio i ceng’ maeca, calu tek ng’atu moko penjo ba lembe pa Mungu: lembapora ceke pa Ahithofel ubedo kumeca ma ni Daudi ku ma ni Absalom.