2 Jukorinto 6 - The Holy Bible In Alur (Lur) Revised Orthography

¹ E wan ma wabetimo karacelo wakude wabethokowu bende ya kud wujol bero pa Mungu mananu

² (kum ewacu kumae, I nindo m’uyire awinjoi, Man i ceng’ both akonyi: nen, kawono en e nindo ma yire; nen, kawono en e ceng’ mi both):

³ ma wabemio ko kakier i gin moko ngo, kara timotim mwa ubed ma titi mbe i wie;

⁴ endre wabefoira giwa i gin ceke, calu jutim pa Mungu, i twiocwiny ma dit, kud i can, ku can piny m’unegowa, ku lem ma tek,

⁵ ku wang’ goc, ku kol, i yakni, kud i tic ma jumuli ko, kud i kurokur, kud i kwirocam;

⁶ kud i bedo ma ijo bedo ko leng’, i ng’eyong’ec, i mwonyolenlbe ma jumwonyo hai, ku bedo ber ku dhanu, i Tipo Maleng’, i mer ma abombi mbe i ie,

⁷ i lembe mi lemandha, man i tego pa Mungu; ni kum jamtho mi bedopwe yo ku cing’ taa yor acwic ku yo ku cing’ ma yor acam bende,

⁸ ku dwong’ man umbe yung, ku rwonglembe ma rac man rwonglembe ma ber; calu jubombi, e karaman andha;

⁹ calu jukung’eyo ngo, e karaman jung’eyo cu; Calu wabetho, karaman nen, wabedo kwo; calu jubeponjo aponja ma tek, e jukunego anega de ngo;

¹⁰ calu ma can ubenego anega, karaman anyong’a benego thiri thiri; calu can piny ubenego, karaman m’ubelonyo dhanu dupa; calu ju ma weg gin moko ngo, karaman weg gin ceke.

¹¹ Dhogwa bedo ang’ama iwu, E Jukorinto, adundewa doko dit.

¹² Wubedo arida i iwa ngo, ento wubedo arida i iwu giwu.

¹³ Nie pi culocul ma calcal (ayero calu ni nyithindha), e wun bende wudok dit.

Wan Wa Hekalu pa Mungu ma Kwo

¹⁴ Kud wutwiru karacelo ku ju ma gi juyic ungo ma pigi tung’ ku piwu: kum ribri manedi ma ni i kind bedopwe giku camuco? kadi ribri ma der giribri ko giku mudho ni kani?

¹⁵ Ribri manedi ma Kristu giribri ko giku Beliali? kadi jayic ubedo ku maka pare manedi giku jayieungo?

¹⁶ Ribri manedi ma hekalu pa Mungu giribri ko gikud ayi gin m’acwia? kum wan wa hekalu pa Mungu ma kwo; cil calu Mungu wacu kumae, Abibedo i igi, man abiwotho i igi; man abibedo Mungu migi, man gibibedo dhanu para.

¹⁷ Kum kumeno Wuai woko kud i kindgi, man wubed tung’, Rwoth uwacu, Man kud wuraul gin m’ucido; E abijolowu.

¹⁸ Man abibedo iwu ni Wego, Man wubibedo ira ni wota ku nyiga, Rwoth ma Jategokpo wacu.