2 Jukorinto 5 - The Holy Bible In Alur (Lur) Revised Orthography

¹ Kum wang’eyo nia tek ot ma ku ng’om mi hema mwa loi, wabedo ku giragoma m’uai ba Mungu, en e ot ma jutimo ku cing’ ungo, ma nja ku nja, i polo.

² Kum andha wacur acura i maeni, ma wabeyenyo dit jurony ot mwa m’uai i polo wi kumwa:

³ tek ebedo kumeno nia juronywa e jubinwang’u wabedo muneru ngo.

⁴ Kum andha wan ma wani i hema maeni wacur acura, ma jubenurowa; ma nia wayenyo jukab ko kendi mwa ngo, ento wayenyo nia jurony kud i wie, kara mi tho nini umwonjre ku kwo.

⁵ Nie ng’atu m’utimowa pi gin maeni nini en e Mungu, m’emio iwa mukwatu mi Tipo.

⁶ Ka kumeno wan ma wabedo thiri thiri ku tegocwiny, ma wang’eyo nia, kinde ma wani thuwa i kum, wambe ku Rwoth

⁷ (kum wawotho ku yioyic, ku neno re ngo);

⁸ wabedo ku tegocwiny, awacu, man wayenyo ma sagu ya wabed umbe kum, man wabed thuwa waku Rwothgi.

⁹ Kum kumeno bende wakeco mwa, nia kadok wani thuwa kadi wambe, wabed ma wanyayu mutoro i ie.

¹⁰ Kum wan ceke wabikonyuthra be ngbeng’ i wang’ kom mi ng’olo lembe pa Kristu; kara dhanu ceke kubang’gi kubang’gi ng’atuman unwang’ gin m’utimbre i kum, rom ku gin m’etimo, kadok ebedo ber kadi rac.

Tic mi Pot

¹¹ Ka kumeno wan ma wang’eyo lworo pa Rwoth, wathoko dhanu, ento junyuthowa ngbeng’ ni Mungu; man ke ageno ya wanyuthra ngbeng’ bende i pidocwinywu.

¹² Wafoira kendo ngo iwu, ento calu wabemio iwu kafoiri ma ni kumwa, kara wubed ku gin moko ma wulok ni ju ma gifoiri kum giranena, man ku yo i adunde re ngo.

¹³ Kum kadok rieko mwa rwinyo iwa, en e ni Mungu; kadi kadok wa weg pidoic ma nger, en e iwu.

¹⁴ Kum mer pa Kristu becwaluwa; kum wang’olo kumeni, ya acel utho pi ceke, ka kumeno ceke tho;

¹⁵ man etho pi ceke, kara ju m’ubedo kwo ku gibed kwo i kumgi gigi kendo, endre ire m’etho i kumgi man ecer kendo.

¹⁶ Kum kumeno ugambre kawono cil macen wang’eyo ng’atu moko ngo ni kum gin mi kum: kadok wadaru ng’eyo Kristu ni kum gin mi kum, ento kawono wang’eye kumeno kendo ngo.

¹⁷ Kum kumeno tek ng’atu moko ni i Kristu, meca en e giracwia ma nyen: gin ma con udaru kadhu; nen, gidoko nyen.

¹⁸ Ento gin ceke ai ba Mungu, m’eketho kindwa poto wakugi en ni kum Kristu, man emio iwa tic mi pot;

¹⁹ en e kumeni, ya Mungu ni i Kristu m’ebepoto ng’om ire gire, ma k’ebekwanu kier migi igi ngo, nwang’u emio iwa lembe mi pot.

²⁰ Ka kumeno wa judhulembe ka Kristu, calu ma tek Mungu bekwayu kudwa: wabekwayuwu ma tek ni kum Kristu, wuketh kindwu pot ku Mungugi.

²¹ En m’eng’eyo dubo tak de ngo edwoke ni dubo piwa; kara wadok ni bedopwe pa Mungu ni kume.