2 Jukorinto 12 - The Holy Bible In Alur (Lur) Revised Orthography

Ginmawokiwang’ ku Nyuthonyuth pa Rwoth ni Paolo

¹ Abikolula be, kadok e ber ungo; endre abibino ba ginmawokiwang’ ku nyuthonyuth pa Rwoth.

² Ang’eyo ng’atu moko i Kristu, rundi apar wi ang’wen m’ukadhu (tek eni i kum, ang’eyo ngo; kadi tek embe i kum, ang’eyo ngo; Mungu ng’eyo), ng’atu ma kumeca juting’e malu cil i polo mir adege.

³ Man ang’eyo wagi ng’atuca (tek eni i kum, kadi e nge ku kum, ang’eyo ngo; Mungu ng’eyo),

⁴ maram juting’e ko malu i Paradis, m’ewinjo ko lembe de ma sagu aweca, ma cik uyio ngo ya dhanu weci.

⁵ Ni kum ng’atu ma kumeca abilula: endre ni kuma gira abilula ngo, ndhu i ng’ic para m’a ng’ic ko.

⁶ Kum tek ayenyo alula, abibedo jakasegu ngo; kum abiyero lemandha; endre aweko, kara ng’atu moko kud ukwana ma sagu ramba m’eneno abedo ko, kadi m’ewinjo i bang’a de.

⁷ Man kara kud atingra malu ma sagu ni kum giranyutha ma dit apila, ukudho ma i ring’kum umire ira, jakwenda pa Jok kara epada, kara kud atingra ma sagu.

⁸ Pi gin maeni akwayu Rwoth bang’ adek, kara eai i kuma.

⁹ Man ewacu ira kumae, Berona romi: kum tegona doko ndhu cu i ng’ic. Kum kumeno abilula kum ng’ic para kud anyong’a m’usagu dit, kara tego pa Kristu bed i kuma.

¹⁰ Kum kumeno anyong’a nega i ng’ic, i acidi de, i can piny, i ragedo, i can m’alimo, ni kum Kristu: kum kinde ma a ng’ic, kinde maeca a tek.

Pidoic pa Paolo pi Kanisa i Korinto

¹¹ Adoko jakasegu: wucwala; kum emaku ya wufoya: kum adong’ cen ki ngo i gin moko mi jukwenda ma sagu juwagi ceke, kadok an a gin moko ngo.

¹² Andha giranyutha pa jakwenda utimbre i kindwu i twiocwiny ceke, ku giranyutha man musana ku tego ma dit de.

¹³ Kum girang’o ma wujwik i ie ma sagu kanisa mange, tek en e ma nia an gira abedo ni ter iwu ngo? wek timo rac maeni woko ira.

¹⁴ Nen, maeni wang’ adege m’abedo ko ayika m’abin ko i beng’wu; man abibedo ni ter iwu ngo: kum ayenyo gin mu ngo, ento wun re: kum emaku ya nyithindho gikan piny ni junyodo migi ngo, ento junyodo re ni nyithindho.

¹⁵ Man abilalu ndhu alala ku mutoro ma dit man abidaru tekna de piwu. Tek amaruwu dit ma sagu, an ke jumara nok ma sagu?

¹⁶ Ento kadok ebedo kumeno, an gira anurowu ngo; ento, kum a riek, amakuwu kud abombi.

¹⁷ Avugowu ku jumoko m’aoro i beng’wu?

¹⁸ Ajuko Tito, man aoro umego gikude. Tito vugowu? wawotho ku tipo ma calacel ungo? wawotho ku ba tielo ma calacel ungo?

¹⁹ Iwu wacu nyo cil unyoni wabegonyo lembe m’i wiwa giwa iwu. I wang’ Mungu wabeyero i Kristu. Ento gin ceke, jumer, gi pi teng’oteng’ mu.

²⁰ Kum alworo, kara ku yo moko, kinde m’awok, abinwang’uwu calu wagi m’amaru ngo, an bende jubinwang’a calu wagi ma wumaru ngo; kara dhau kud ubed nuti ku yo moko, ku ngiri, ku kwinyo, ku pokri, ku yero nying’, ku yero nying’ ma kwe kwe, ku yakni;

²¹ kara kinde m’abino kendo Mungu para kud ubin ujwiga i weng’wu man abin aywak kum dupa m’i kindgi ma gilar gidubo, ma gikuloko cwinygi ngo kum sasa man tarwang’ man awanya ma rac ma gitimo.