1 Yohana 4 - The Holy Bible In Alur (Lur) Revised Orthography

¹ Jumer, kud wuyi tipo ceke, ento wuponj tipo, tek giai ba Mungu, kum jubila mi ndra dupa cidho nge nge i ng’om.

² Kum kumeni wang’eyo Tipo pa Mungu: ku ba tipo ceke ma tuco nia Yesu Kristu daru bino i kum nwang’u en e pa Mungu:

³ man ku ba tipo ceke ma tuco Yesu ngo nwang’u en e pa Mungu ngo: man maeni en e tipo japiem Kristu, ma wuwinjo pire nia ebebino; e kawono edaru wok i ng’om.

⁴ Wun wu pa Mungu, nyithindho para ma thindho, man wuloyogi: kum ng’atu ma ni i iwu e dit ma sagu ng’atu ma ni i ng’om.

⁵ Gin gi mi ng’om: kum kumeno giyero calu mi ng’om, ng’om de winjogi.

⁶ Wan wa pa Mungu: ng’atu m’ung’eyo Mungu winjowa; ng’atu ma pa Mungu ngo winjowa ngo. Kum maeni wang’eyo tipo mi lemandha, ku tipo mi kier.

Mungu En e Mer

⁷ Jumer, dong’ wamara, kum mer en e pa Mungu; man ku ba dhanu ceke ma mer nwang’u Mungu nyole, man eng’eyo Mungu.

⁸ Ng’atu ma mer ungo nwang’u eng’eyo Mungu ngo; kum Mungu en e mer.

⁹ I maeni mer pa Mungu nyuthre iwa, nia Mungu oro Wode kulong’ i ng’om kara wabed kwo ni kume.

¹⁰ I maeni mer ungo, nia wamaru Mungu, ento nia emaruwa, eoro wode de bed ni lam mi dubo mwa.

¹¹ Jumer, tek Mungu maruwa kumeno, maku wan bende wamara.

¹² Ng’atu moko mbe ma foduneno Mungu nindo moko: tek wamara, nwang’u Mungu bedo i iwa, man mer pare doko ndhu cu i iwa:

¹³ ku maeni wang’eyo nia wabedo i ie en ke i iwa, kum emio iwa kum Tipo pare.

¹⁴ E waneno man wanyutho lembe de nia Wego oro Wod ubed ni Jalar mi ng’om.

¹⁵ Ng’atu ma tek bituco nia Yesu en e Wod Mungu, nwang’u Mungu bedo i ie, en de i Mungu.

¹⁶ E wang’eyo wayio de mer ma Mungu bedo ko yor i bang’wa. Mungu en e mer; man ng’atu m’ubedo i mer nwang’u ebedo i Mungu, man Mungu de bedo i ie.

¹⁷ I maeni mer udoko ndhu cu i bang’wa, kara wabed ku tegocwiny i ceng’ pokolembe; kum calu ebedo, cil wan bende wabedo kiimeno i ng’ombuni.

¹⁸ Lworo mbe i mer: ento mer ma ndhu cu riemo lworo woko, kum lworo bedo ku masendi; man ng’atu ma lworo nege nwang’u edoko ndhu cu ngo i mer.

¹⁹ Wamaru, kum elar emaruwa.

²⁰ Tek ng’atu moko wacu kumae, Amaru Mungu, ma en ke edagu umin, nwang’u en e jandra: kum ng’atu m’umaru umin ungo m’eneno, ecopo maru Mungu ngo m’eneno ngo.

²¹ E cik maeni ma wabedo ko ai i bang’e, nia ng’atu m’umaru Mungu dong’ emar umin bende.