1 Yohana 3 - The Holy Bible In Alur (Lur) Revised Orthography

¹ Wunen maram mer ma Wego maru kowa bedo ko m’emio iwa, ketho julwong’owa nyithindho pa Mungu; wabedo kumeno de. Kum lembe nini ng’om ung’eyowa ngo, kum eng’eye ngo.

² Jumer, kawono wa nyithindho pa Mungu, endre fodi enyuthre ngo nia wabibedo ni ang’o. Wang’eyo nia, tek ebinyuthre, wabibedo calkude; kum wabinene cil calu ebedo.

³ Man ku ba dhanu ceke m’ubedo ku genogen maeni i bang’e edwokre leng’ gire, cil calu en e leng’.

⁴ Ku ba dhanu ceke ma timo dubo etimo co bende; dubo de en e camuco.

⁵ Man wang’eyo nia enyuthre kara ekab dubo woko; man dubo mbe i ie.

⁶ Ng’atu ma tek ubedo i ie dubo ngo: ng’atu ma tek udubo meca nwang’u enene ngo, kadok ang’eya de eng’eye ngo.

⁷ Nyithindho para ma thindho, kud wuyi ng’atu moko tel wiwu ariri swa; ng’atu ma timo bedopwe nwang’u ebedo pwe, cil calu en ebedo pwe:

⁸ ng’atu ma timo dubo en e pa wonabali; kum wonabali dubo ugambre ku kwong’a. Kum lembe maeni Wod Mungu nyuthre, kara enyoth tic pa wonabali.

⁹ Ng’atu ma tek Mungu nyole timo dubo ngo, kum kodhi pare bedo i ie: man ecopo dubo ngo, kum Mungu nyole.

¹⁰ I maeni nyithindho pa Mungu nyuthri, man nyithindho pa wonabali: ng’atu ma tek timo bedopwe ngo nwang’u en e pa Mungu ngo, kadok ng’atu m’umaru umin ungo bende.

Dong’ Wamara

¹¹ Kum maeni en e rwonglembe ma wawinjo ugambre ku kwong’a, nia dong’ wamara:

¹² calu Kain ungo ma en e pa ng’atu ma rac, man enego umin. Man enege mir ang’o? Kum tic pare bedo rac, p’umin e m’ubedo pwe.

¹³ Iwu kud uwang’ lii, umego, tek ng’om udaguwu.

¹⁴ Wang’eyo nia waai i tho wamondo i kwo, kum wamaru umego. Ng’atu m’umaru ngo bedo i tho.

¹⁵ Ng’atu ma tek udagu umin nwang’u en e janek: man wang’eyo nia janek umbe ma bedo ku kwo ma rondo ku rondo i ie.

¹⁶ Kum kumeni wang’eyo mer, kum emio kwo pare piwa: e maku wan bende wami kwo mwa pir umego.

¹⁷ Ento ng’atu m’ubedo ku piny m’i ng’om, man eneno can piny unego umin, man ecero ngisi pare ire, mer pa Mungu bedo i ie nenedi?

¹⁸ Nyithindho para ma thindho, ku wamar ku lembe, kadok ku dhok; endre ku tic man lemandha.

Tegocwiny yo ba Mungu

¹⁹ Kum maeni wabing’eyo nia wan wa mi lemandha, man wabiketho adundewa kwio i wang’e:

²⁰ kum tek adundewa poko lembe i wiwa rac, Mungu dwong’ ma sagu adundewa, man eng’eyo gin ceke.

²¹ Jumer, tek adundewa poko lembe i wiwa rac ungo, nwang’u wabedo ku tegocwiny yo ba Mungu;

²² man gin ma tek wakwayu wagamu i bang’e, kum waworo cik pare watimo de gin ma nyayu mutoro i wang’e.

²³ Maeni de cik pare, nia wayi nying Wode Yesu Kristu, man wamara cil calu emio iwa cik.

²⁴ Man ng’atu m’uworo cik pare bedo i ie, en de ebedo i ie. Ku maeni de wang’eyo nia ebedo i iwa, ni kum Tipo m’emio iwa.