1 Ubimo 6 - The Holy Bible In Alur (Lur) Revised Orthography

Suleman Ugomo Ot pa Yehova

¹ Man etimbre i rundi dak ang’wen ku pier abora yo ng’ei ma nyithindho mir Israel giai ko kud i Misiri, i rundi mir ang’wende mi camu ker pa Suleman wi Israel, i dwi Ziv, ma en e dwi mir arionde, nia etheko gomo ot pa Yehova.

² Man ot m’ubimo Suleman ugomo ni Yehova, kaborne en e bot pier abusiel, man kalacne bot pier ario, man kadongone bot pier adek.

³ Man ponde ma ni i wang’ hekalu mi ode, kaborne bot pier ario calku kalac mi ode; man kalacne bot apar i wang’ ode.

⁴ Man etimo wang’ot ku gin ma kinde koc ni der mi ode.

⁵ Man egomo ot ma malu kum kor ot i ng’ete gbur, kum kor ot m’utieke gbur, mi hekalu man mi kayerlembe; man etimo kusika mi ng’ete gbur.

⁶ Man ot ma malu ma yor i ie kalacne bot abic, man mi diere kalacne bot abusiel, man mir adege kalacne bot abiro; kum ejwigo ot ku yo woko kara riu ma kor ot kud uribre kude.

⁷ Man ode, kinde ma jubegome, jugome ku kidi ma juyiko i ka ma jung’enyo ie kidi; man juwinjo ba nyondro ngo kadi lei kadi jamtic moko mi nyunyu de, kinde ma jubegome.

⁸ Dhugola mi kusika mi ng’et ot mi diere, eni i ng’et ot ma yor acwic: man giidho malu ku giraidha ma wire i ot mi diere, man kud i mi diere i mir adege.

⁹ Kum kumeno egomo ode, e edare; man eumo ode ku riu ku bau mi musonge.

¹⁰ Man egomo ot ma malu kum ode gbur, kubang’e kubang’e kadongone bot abic: man gijengri kum ode ku riu mi musonge.

¹¹ E lembe pa Yehova bino ba Suleman, uwacu kumae,

¹² Pi ot maeni m’ibegomo, tek ibiwotho ku cik para, man ibitimo lembapoka para, ibiworo lembang’ola para de ceke kara iwoth i igi; abilund ketho lembe para cungo kudi m’ayero ni Daudi ma wuru.

¹³ Man abibedo i kind nyithindho mir Israel, man abikuno dhanu para ma Israel ungo.

¹⁴ Kum kumeno Suleman ugomo ode man edare.

¹⁵ Man egomo kor ode ma yor i ie ku bau mi musonge: ugambre i die ode cik kum kor ode ma malu, eumogi yor i ie ku yen; man eumo die ode ku bau mi sipre.

¹⁶ Man egomo bot pier ario kum ode ma yor i ng’eye ku bau mi musonge ugambre i die ode cik kum kor ode ma malu: egomogi pire yor i ie, mi kayerlembe, en e pi kamaleng’ m’usagu.

¹⁷ Man ode, thelembene kumae, hekalu ma ni i wang’ kayerlembene, kaborne bot pier ang’wen.

¹⁸ Man musonge ni wi ode yor i ie, ma jung’iko ni tiendedhok ku thiuboko m’uthiwo: ceke en e musonge; kidi moko mbe ma nen.

¹⁹ Man etimo kayerlembe i die ode yor i ie, kara eketh sanduk mi lembariba pa Yehova keca.

²⁰ Man yo i kayerlembene ka ma thwolo nuti ma kaborne bot pier ario, man kalacne bot pier ario, kadongone de bot pier ario: man emwono kume ku mola ma kwar ma leng’: e emwono pemblam bende, ma en e mi musonge.

²¹ Kum kumeno Suleman umwono ode yor i ie ku mola ma kwar ma leng’: man etelo nyoro mi mola ma kwar ukadhu kud i wang’ kayerlembe; man emwone ku mola ma kwar.

²² Man emwono kum ode tunglu ku mola ma kwar, maram ode thum ko kpo: pemblam ceke bende ma mi kayerlembe emwono ku mola ma kwar.

²³ Man etimo kerubi ario ku yendulu, gin ario de kadongogi bot apar.

²⁴ Bomb kerubi acel bot abic, man bomb kerubi mucelo de bot abic: ugambre kum lwith bombe acel cil kum lwith bombe mucelo de en e bot apar.

²⁵ Man kerubi mucelo de bot apar: kerubi ario de kaporne acel man ayine acel.

²⁶ Kadongo mi kerubi acel en e bot apar, man kerubi mucelo de kumeca.

²⁷ Man eketho kerubine i ot ma yor i ie; man bomb kerubine rieire, ketho nia bomb kerubi acel umulo kor ode acel, man bomb kerubi mucelo de mulo kor ode mucelo; man bombgi gudo wadi i die ot.

²⁸ Man emwono kerubine ku mola ma kwar.

²⁹ Man eng’iko kor ode ceke gbur kud ayi kerubi m’ang’ika man thith ku thiuboko m’uthiwo, yor i ie ku yo woko de.

³⁰ Man emwono die ode ku mola ma kwar, yor i ie ku yo woko de.

³¹ Man etimo dhugola mi yendulam ni kamondo mi kayerlembe: riu man kor dhugolane gi ng’et kor ode mir abije.

³² Kum kumeno etimo dhugola ario mi thith: man eng’iko kumgi ku ng’ik mi kerubi ku thith man thiuboko m’uthiwo, man emwonogi ku mola ma kwar; man emwono mola ma kwar wi kerubi man wi thith.

³³ Etimo ng’et dhugola mi kamondo mi hekalu bende kumeca ku yendulam; mi ng’ete mir ang’wende mi kor ode;

³⁴ man dhugola ario mi yen sipre: clhugola acel ng’ete ario giribiri, dhugola mucelo de ng’ete ario ribre.

³⁵ Man eng’iko kerubi ku thith man thiuboko m’uthiwo i kumgi; man emwonogi ku mola ma kwar m’umoko kum tic m’ang’ika.

³⁶ Man egomo lelagang’ ma yor i ie ku wang’e adek mi kidi m’akaka, man wang’e acel ku riu mi musonge.

³⁷ I rundi mir ang’wende juketho the ot pa Yehova, i dwi Ziv.

³⁸ Man i rundi apar wi acende, i dwi Bul, nia en e dwi mir aborans, ode thum kubang’e ceke, man calkud ayine ceke. Kum kumeno egome rundi abiro.