1 Ubimo 21 - The Holy Bible In Alur (Lur) Revised Orthography

Ahab ku Podho mir Ulok pa Naboth

¹ Man etimbre yo ng’ei gin maeni, nia Naboth ma Jayezreli bedo ku podho mir ulok, ma ni i Yezrel, ceng’ni odker pa Ahab m’ubimo mi Samaria.

² Man Ahab uyero ni Naboth, ewacu kumae, Mi podho mir ulok peri ira, kara abed kude ni podho mi dek, kum eni ceng’ni ba ot para; man abiwile iri ku podho mir ulok ma sage: kadi, tek ebedo ber iri, abimio iri wel pinje i sente.

³ E Naboth uwacu ni Ahab kumae, Yehova cera, kud ami aba pa kwara iri.

⁴ E Ahab ubino i ot pare ku cwinye m’udieng’ ma lembe ton i ie de kum lembe ma Naboth ma Jayezreli yero ire; kum ewacu kumae, Abimio iri aba pa kwara ngo. E evuto piny wi kavuto pare, man eloko wang’e yo woko, man ekwero camu kwen.

⁵ Ento Yezebel ma dhaku pare bino i bang’e man ewacu ire kumae, Cwinyi bedo ku can ma kumeno nedi, ketho icamu kwen moko ngo?

⁶ E ewacu ire kumae, Kum ayero ni Naboth ma Jayezreli, man awacu ire kumae, Mi podho mir ulok peri ira mi sente; kadi, tek ebedo ber iri, abimio iri podho mir ulok mange pire: man eloko lembe kumae, Abimio podho mir ulok para iri ngo.

⁷ Man Yezebel ma dhaku pare wacu ire kumae, Kawono ibimo ker mir Israeli? ai malu, man icam kwen, man wek anyong’a neg adundeni: abimio iri podho mir ulok pa Naboth ma Jayezreli.

⁸ Kum kumeno egoro waraga ku nying Ahab, emwonogi de kud ayi pare, man eoro waragane ba judongo man ba weg yung ma ni i adhura pare, man m’ubedo karacelo ku Naboth.

⁹ E egoro i waragane, ewacu kumae, Wuyer pi wekocam, man wuketh Naboth malu i kind dhanu:

¹⁰ man wuketh dhanu ario, ma dhanu ma rac, i wang’e, e wek ginyuth lembe i kume, giwac kumae, Ikwong’o Mungu kud ubimo de. Man wulund wutere woko, e wucanye ku kidi kara etho.

¹¹ E dhanu mir adhura pare, en e judongo ku weg yung m’ubedo i adhura pare, gitimo calu Yezebel uoro i bang’e, calu ebedo agora i waraga m’eoro i bang’gi.

¹² Giyero pi wekocam, man giketho Naboth malu i kind dhanu.

¹³ E dhanu arione, ma dhanu ma rac, gimondo man gibedo i wang’e: e dhanu ma racne ginyutho lembe i kume, en e i kum Naboth i vut dhanu, giwacu kumae, Naboth ukwong’o Mungu kud ubimo. Gilund gitere woko kud i adhura, e gicanye ku kidi m’etho ko.

¹⁴ Gilund gioro kwenda ba Yezebel, giwacu kumae, Jucanyu Naboth ku kidi, man etho.

¹⁵ E etimbre, kinde ma Yezebel uwinjo nia jucanyu Naboth ku kidi, man etho, nia Yezebel uwacu ni Ahab kumae, Ai malu, mak podho mir ulok pa Naboth ma Jayezreli, m’ekwero mio iri mi sente; kum Naboth ubedo kwo ngo, ento etho.

¹⁶ Man etimbre, kinde ma Ahab uwinjo nia Naboth utho, nia Ahab uai malu kara elor piny ba podho mir ulok pa Naboth ma Jayezreli, kara emake.

¹⁷ E lembe pa Yehova bino bang’ Elia ma Jaticbi, m’uwacu kumae,

¹⁸ Ai, lor piny kara wuromb kud Ahab m’ubimo mir Israel, m’ubedo i Samaria: nen, eni i podho mir ulok pa Naboth, ka m’eloro i ie piny kara emake.

¹⁹ E ibiyero ire, ibiwacu kumae, Yehova wacu kumae, Inego, man imaku bende? Man ibiyero ire, ibiwacu kumae, Yehova wacu kumae, I ka ma gwogi nang’u ie rimb Naboth, e gwogi binang’u rimbi keca, en e peri.

²⁰ E Ahab uwacu ni Elia kumae, Inwang’a, E jadegi para? Man eloko lembe kumae, Anweng’i, kum ing’ieuri giri kara itim gin ma rac i wang’ Yehova.

²¹ Nen, abikelo lembe ma rac i wii, man abiyweyi woko pet man abikabu nyithindho ma co ceke kubang’gi kubang’gi ku bang’ Ahab, man ng’atu ma juciko bang’e ku ng’atu ma jugonyo i kind Israel:

²² man abidwoko ot peri calu ot pa Yeroboam ma wod Nebat, man calu ot pa Baca ma wod Ahija kum dubo m’inyayu kudo ng’ecwiny i ia, man kum iketho Israel udubo.

²³ Man Yehova yero pi Yezebel bende, ewacu kumae, Gwogi bicamu Yezebel i ng’et ot ma tek mi Yezrel.

²⁴ Dhanu pa Ahab m’utho i adhura gwogi bicamu; man ng’atu m’utho i podho winyo ma kor polo bicamu.

²⁵ (Ento ng’atu moko mbe ma calu Ahab, m’ung’ieure gire kara etim gin ma rac i wang’ Yehova, ma Yezebel ma dhaku pare thubo.

²⁶ Man etimo ginmajudagu dit kum lubo mungu m’araga, calku gin ceke ma Juamori timo, ma Yehova bayu woko i wang’ nyithindho mir Israel.)

²⁷ Man etimbre, kinde ma Ahab uwinjo lembe maeni, nia eyeco kendi pare, man eke tho gonia i kume, e ekwiro cam, man evuto i gonia, man ewotho yo yo.

²⁸ E lembe pa Yehova bino bang’ Elia ma Jaticbi, uwacu kumae,

²⁹ Ineno maram Ahab ujwigre ko gire i wang’a? kum ejwigre gire i wang’a, abikelo lembe ma racne i ceng’ pare ngo; ento i ceng’ pa wode abikelo lembe ma racne wi ot pare.