1 Ubimo 19 - The Holy Bible In Alur (Lur) Revised Orthography

Elia Ringo i Horeb

¹ Man Ahab uyero pi gin ceke ma Elia timo ni Yezebel, man ke maram enego ko jubila ceke ku palamularu.

² Yezebel ulund uoro jakwenda bang’ Elia, ewacu kumae, Dong’ mungu tim kumeni i bang’a, man mange bende, tek aketho kwo peri bedo ngo calu kwo pa ng’atu acel m’i kindgi urwo unyoni.

³ E kinde m’eneno maeni, eai, man eringo pi kwo pare, e ebino Ber-ceba, ma pa Yuda, e eweko jatic pare kuca.

⁴ Ento en gire ecidho woth mi ceng’ acel i langa, man ebino ebedo piny de the yen m’udinyo: e epenjo pire gire nia etho, ewacu de kumae, Eromo; kawono, E Yehova, kab kwo para woko; kum a ber ma sagu kwaru para ngo.

⁵ Man evuto piny enindo de the yen m’udinyone; man, nen, jamalaika mulo kume, man ewacu ire kumae, Ai malu man icam.

⁶ E eneno, man, nen, kwen m’apada ma jutedo wi cukmac ni ceng’ni wie, ku cupa mi pi. Man ecamu emadhu de, e evuto kendo.

⁷ E malaika pa Yehova bino kendo wang’ arionde, man emulo kume, ewacu de kumae, Ai malu icam, kum woth e bor hai iri.

⁸ E eai, ecamu de man emadhu, man ewotho ku tego mi cemo maeno ceng’ pier ang’wen ku diewor pier ang’wen wi Horeb ma got pa Mungu.

⁹ E ebino kuca ba odng’om, e egonjo keca; man, nen, lembe pa Yehova bino i bang’e, man ewacu ire kumae, Itimo ang’o keni, Elia?

¹⁰ E ewacu kumae, Ngiri nega dit pi Yehova, Mungu mir udul; kum nyithindho mir Israel giweko lembariba peri, gimugo pemblam peri piny, man ginego jubila peri ku palamularu: man an, ndhu an a kenda e m’udong’; e gibeyenyo kwo para, kara gikabe woko.

¹¹ Man ewacu kumae, Cidhi, icung wi got de i wang’ Yehova. Man, nen, Yehova kadhu, man yamu ma dit ma tek de ung’enyo gudi, e eng’enyo cana nziki nziki i wang’ Yehova; ento Yehova ni i yamune ngo: man yo ng’ei yamu digidi; ento Yehova ni i digidine ngo;

¹² man yo ng’ei digidi mac; ento Yehova ni i macne ngo: man yo ng’ei mac dwal ma nok ma yo.

¹³ Man ebedo kumeno, kinde ma Elia winjo maeno, nia eumo wang’e ku kanzu pare, man ewok woko, ecimgo de i kamondo mi odng’om. Man, nen, dwal uwok i bang’e, man ewacu kumae, Itimo ang’o keni, Elia?

¹⁴ E ewacu kumae, Abedo ku ngiri ma dit pi Yehova, Mungu mir udul; kum nyithindho mir Israel giweko lembariba peri, gimugo pemblam peri, man ginego jubila peri ku palamularu; e an, ndhu an a kenda, e m’adong’; man giyenyo kwo para, kara gikabe woko.

¹⁵ Man Yehova wacu ire kumae, Cidhi, dok i yo peri ba langa mi Dameski: man kan ibino, ibiwiro Hazael ubed ni ubimo wi Cami;

¹⁶ man Yehu ma wod Nimci ibiwiro ubed ni ubimo wi Israel; e Elica ma wod Cafat ma Abel-mehola ibiwiro ubed jabila kakeri.

¹⁷ Man ebitimbre, nia ng’atu m’uboth ni palamularu pa Hazael, Yehu binego; man ng’atu m’uboth ni palamularu pa Yehu, Elica binego.

¹⁸ Ento abiweko ira dhanu rubanga abiro i kind Israel, ma cong’gi ceke fokurum ungo ni Bal, man dhoggi ceke kubang’e kubang’e ma fok’ucwie ngo.

Lwong’o pa Elica

¹⁹ Kum kumeno eai kukuca, man enwang’u Elica ma wod Cafat, m’ubefuro fur, ku koni dhiang’ ma ku mberembere apar wi ario i wang’e, man en karacelo kud apar wi arionde: e Elia kadhu lokaca i bang’e, man ebolo kanzu pare i kume.

²⁰ Man eweko koni dhiange, eringo de tok Elia man ewacu kumae, Akwei, wek acwi limb vwa ku ma, e abilund lubo toki. Man ewacu ire kumae, Dok kendo; kum atimo ang’o i beng’i?

²¹ E edok ku ba lubo toke, man egamu koni dhiang’ ma ku mberembere e enegogi, man etedo ring’ gi ku jamtic mi koni dhiang’, e emio ni dhanu, man gicamu. Elund eai, man elubo tok Elia, e etimo ire.