1 Ubimo 17 - The Holy Bible In Alur (Lur) Revised Orthography

Elia Ewo Lembe pi Ndru

¹ Man Elia ma Jaticbi, ma en e mir umondo mi Gilead, uwacu ni Ahab kumae, Calu Yehova Mungu mir Israel ubedo kwo, m’acungo i wang’e, thoi kadi koth de bibedo mbe rundi maeni, ento calku lembe para.

² E lembe pa Yehova bino i bang’e, uwacu kumae,

³ Ai kakeni man ilokri yo nyangu, e ipond i ng’et kulo Kerith, ma ni i wang’ Yordan.

⁴ Man ebibedo, nia ibimadhu kum kulone; man ang’olo ni ngoro y a giter cam iri kuca.

⁵ Kum kumeno ecidho etimo calku lembe pa Yehova; kum ecidho man ebedo ng’et kulo Kerith, ma ni i wang’ Yordan.

⁶ E ngoro kelo ire kwen ku ring’o kugweno, man kwen ku ring’o uthieno; man emadhu kum kulone.

⁷ Man etimbre yo ng’ei nindo moko, nia kulone dwono, kum koth umbe i ng’ombe.

Elia giku Dhaku ma Cware Tho mi Zarefath

⁸ E lembe pa Yehova bino i bang’e, uwacu kumae,

⁹ Ai, icidh Zarefath, ma en e pa Sidon, man ibed kuca: nen, ang’olo ni dhaku ma cware tho kuca nia egwoki.

¹⁰ Kum kumeno eai man ecidho Zarefath; man kinde m’ewok dhugang’ mir adhurane, nen, dhaku ma cware tho ni keca m’ebecoko ridi: e elwong’e, ewacu kumae, Akwei, kel ira nyathi pi moko i agulu, kara amadhi.

¹¹ E kan ebecigamu, elwong’e, man ewacu kumae, Akwei, kel ira nyathi kwen i cingi.

¹² Man ewacu kumae, Calu Yehova Mungu peri bedo kwo, kwen m’apada mbe kuda, ndhu mogo ma theng’ cing’ i agulu, ku nyathi mo i cupa: man, nen, abekwanyu ridi ario, kara amond atede ira waku woda, kara wacame, e watho.

¹³ Man Elia wacu ire kumae, Lworo kud unegi; cidh itim calu iwacu; ento ilar itim ira kudo nyathi kwen m’apada, man ikele woko i bang’a, man yo ku ng’eye itim iri man pi wodi.

¹⁴ Kum Yehova, Mungu mir Israel, uwacu kumae, Agulu mi mogo bithum ungo, kadok cupa mi mo de bijik ungo, cil i ceng’ ma Yehova oro koth wi ng’om.

¹⁵ E ecidho etimo de calku lembawaca pa Elia: e dhakune, kud Elia, man juode, gicamu ceng’ dupa.

¹⁶ Agulu mi mogo thum ungo, kadok cupa mi mo de jik ungo, calku lembe pa Yehova, m’eyero ku dhu Elia.

¹⁷ Man etimbre yo ng’ei gin maeni, nia wod dhakune, ma won ode, kume make; e kume lith hai, ketho nia yuyo moko mbe m’udong’ i ie.

¹⁸ Man ewacu ni Elia kumae, Wabedo ku lembang’o wakudi, E in m’i dhanu pa Mungu? ibino i bang’a kara jupoi kum dubo para, man kara ineg woda!

¹⁹ Man ewacu ire kumae, Mi wodi i bang’a. E egame kud i kore, man etere malu i kusika, ka m’ebedo i ie, man ekethe wi kavuto pare gire.

²⁰ E elwong’o Yehova, man ewacu kumae, E Yehova Mungu para, ikelo lembe ma rac bende wi dhaku ma cware mbe ma wabedo ni umondo wakugi, kunego wode?

²¹ Man eriebre gire wi nyathin wang’ adek, e elwong’o Yehova, ewacu de kumae, E Yehova Mungu para, akwei, wek ng’eyong’ec pa nyathin maeni dwog i ie kendo.

²² E Yehova winjo badwand Elia; man ng’eyong’ec pa nyathinne dwogo i ie kendo, man ecer.

²³ E Elia ting’o nyathin, man ekele piny ku i kusika etere i ot, man emie ba min mire; e Elia wacu kumae, Nen, wodi bedo kwo.

²⁴ Man dhakune wacu ni Elia kumae, Kawono ang’eyo nia in i dhanu pa Mungu man nia lembe pa Yehova m’i dhogi en e andha.