1 Ubimo 15 - The Holy Bible In Alur (Lur) Revised Orthography

Nindo mi Camuker pa Abijam

¹ Nie i rundi apar wi aborane p’ubimo ma Yeroboam ma wod Nebat, Abijam umaku camu ker wi Yuda.

² E ecamu ker i Yerusalem rundi adek: man nying’ min mire Maka ma nya Absalom.

³ Man ewotho i dubo ceke pa won, m’elar etimo i wang’e; man adundene bedo ndhu cu ngo ku Yehova Mungu pare, calu adunde Daudi ma kwaru mire.

⁴ Ento kum Daudi Yehova Mungu pare mio ire thala i Yerusalem, kara eting’ wode malu yo ng’eye, man eketh Yerusalem ucungi;

⁵ kum Daudi timo gin m’ubedo atira i wang’ Yehova, man elokre cen ungo kum gin moko m’eng’olo ire i nindo ceke mi kwo pare, ndhu i lembe p’Uria ma Jahiti kende.

⁶ Nwang’u ali nuti i kind Rehoboam ku Yeroboam i nindo ceke mi kwo pare.

⁷ Man dong’ tic pa Abijam, ku gin ceke m’etimo, gigore i kitabu mi lemkei mir ubimo mi Yuda ngo? Man ali ni i kind Abijam ku Yeroboam.

⁸ Man Abijam unindo ku kwaru mire; e giyike i adhura pa Daudi: man Asa ma wode camu ker kakare.

Nindo mi Camuker pa Asa

⁹ Man i rundi pier arionde pa Yeroboam m’ubimo mir Israel Asa maku camu ker wi Yuda.

¹⁰ Man ecamu ker i Yerusalem rundi pier ang’wen wi acel: man nying’ min mire Maka ma nyar Absalom.

¹¹ Man Asa timo gin m’atira i wang’ Yehova, calu Daudi ma kwaru mire timo.

¹² Man ekabu jusodomi woko kud i ng’om, man ekabu mungu m’araga ceke woko ma kwaru mire timo.

¹³ Man Maka bende ma min mire, ekabu kud ebed ubimo ma dhaku, kum etimo ayi m’acwia ma ginmajudagu ni mungu m’araga; e Asa tong’o ayi m’acwia pare piny, man ewang’e dhu kulo Kidron.

¹⁴ Ento jukabu ka ma malu woko ngo; ento adunde Asa bedo ndhu cu ku Yehova i nindo pare ceke.

¹⁵ Man ekelo i ot pa Yehova gin ma won uthiero, ku gin m’ethiero en gire, mola m’a tar, ku mola ma kwar, kud agulu.

Ribri pa Asa giku Ben-hadad

¹⁶ Man ali ni i kind Asa ku Baca m’ubimo mir Israel i nindo migi ceke.

¹⁷ Man Baca m’ubimo mir Israel uidho malu kum Yuda, man egomo Rama, kara kud eyi ng’atu moko wok woko kadi umond bang’ Asa m’ubimo mi Yuda.

¹⁸ Asa lund ugamu mola ma tar ceke ku mola ma kwar ceke ma juweko i kakanpiny mi ot pa Yehova, man i kakanpiny mi ot p’ubimo, man emiogi i cing’ jutic pare; e ubimo ma Asa orogi ba Ben-hadad, ma wod Tabrimon, ma wod Hezion, m’ubimo mi Cami, m’ubedo i Dameski, ewacu kumae,

¹⁹ Lembariba ni i kindwa wakudi, i kind vwa ku wuru de: nen, aoro giramia mi mola ma tar ku mola ma kwar iri; cidhi, tur lembariba peri ma ku Baca m’ubimo mir Israel, kara eai i bang’a.

²⁰ E Ben-hadad uwinjo dwand ubimo ma Asa, man eoro jego mi njuru asikari pare kum adhura mir Israel, man egoyo Ijon, ku Dan, man Abelbeth-maka, ku Cineroth ceke, ku ng’om ceke pa Naftali.

²¹ Man etimbre, kinde ma Baca winjo pire, nia eweko gomo Rama, man ebedo i Tirza.

²² Ubimo ma Asa ulund utimo lemkwenda ni Yuda ceke; ng’atu moko mbe ma juweko lem pare: man gikabu kidi mi Rama woko, ku yen de, ma Baca gomo kudo; man ubimo ma Asa gomo kudo Geba pa Benyamin, man Mizpa.

²³ Nie dong’ tic ceke pa Asa, ku tego pare ceke, ku gin ceke m’etimo, kud adhura m’egomo, gigore i kitabu mi lemkei mir ubimo mi Yuda ngo? Ento i nindo mi tio pare tho ni i tiende.

²⁴ Man Asa nindo ku kwaru mire, man juyike ku kwaru mire i adhura pa Daudi ma kwaru mire; man Yehocafat ma wode camu ker kakare.

Nindo mi Camuker pa Nadab

²⁵ Man Nadab ma wod Yeroboam umaku camu ker wi Israel i rundi mir arionde pa Asa m’ubimo mi Yuda; man ecamu ker wi Israel rundi ario.

²⁶ E etimo gin ma rac i wang’ Yehova, man ewotho i yo pa won, man i dubo pare m’eketho Israel udubo kudo.

²⁷ Man Baca ma wod Ahija, mi ot pa Isakar, uporo lembe i kume: man Baca goye i Gibethon, ma mi Jufilisti, kum Nadab kud Israel ceke gitieko Gibethon kud ali.

²⁸ En e i rundi mir adege pa Asa m’ubimo mi Yuda ma Baca nege i ie, man ecamu ker kakare.

²⁹ Man etimbre, kinde m’edoko ni ubimo, egoyo ot ceke pa Yeroboam: eweko ng’atu moko ngo ni Yeroboam ma yuyo, maram enyothe; calku lembawaca pa Yehova, m’eyero ku dhu jatic pare ma Ahija ma Jaciloni;

³⁰ pi dubo pa Yeroboam m’edubo, man m’eketho Israel udubo kudo, kum kier pare m’enyayu kudo ng’ecwiny i Yehova, Mungu mir Israel.

³¹ Nie dong’ tic pa Nadab, ku gin ceke m’etimo, gigore i kitabu mi lemkei mir ubimo mir Israel ungo?

³² Man ali ni kind Asa ku Baca m’ubimo mir Israeli nindo migi ceke.

Nindo mi Camuker pa Baca

³³ I rundi mir adege pa Asa m’ubimo mi Yuda, Baca ma wod Ahija maku camu ker wi Israel ceke i Tirza, man ecamu ker rundi pier ario wi ang’wen.

³⁴ Man etimo gin ma rac i wang’ Yehova, e ewotho i yo pa Yeroboam, man i dubo pare m’eketho Israel udubo kudo.