1 Ubimo 14 - The Holy Bible In Alur (Lur) Revised Orthography

Lembaewa pa Ahija kum Yeroboam

¹ I nindo maeca Abija ma wod Yeroboam kume lith.

² Man Yeroboam uwacu ni dhaku pare kumae, Akwei, ai malu man ipeli giri, kara ku jung’ei nia in i dhaku pa Yeroboam; man icidh i Cilo: nen, Ahija ma jabila ni kuca, m’uyero pira nia abibedo ubimo wi dhanu maeni.

³ Man icidh ku kwen m’ang’ina apar, ku kwen m’apada, ku cupaini kic, e icidh i bang’e: man ebiyero iri pi gin ma bitimbre kum nyathinne.

⁴ E dhaku pa Yeroboam utimo kumeca, man eai, e ecidho Cilo, man ebino ba ot pa Ahija. Nwang’u Ahijane copo neno piny ungo; kum wang’e bedo via via ni kum tio pare.

⁵ E Yehova wacu ni Ahija kumae, Nen, dhaku pa Yeroboam ubino kara epenj lembe i beng’i pi wode; kum kume lith: ibiwacu ire kuman kuman; kum ebibedo, kinde m’emondo, nia ebipale gire nia en e dhaku mange.

⁶ Man ebedo kumeno, kinde ma Ahija winjo ba tiende, kan emondo ku dhogola, nia ewacu kumae, Mondi, in i dhaku pa Yeroboam; nedi ipeli giri nia in i ng’atu mange? kum juora i beng’i ku rwonglembe ma pek.

⁷ Cidhi, yer ni Yeroboam kumae, Yehova, Mungu mir Israel, uwacu kumae, Kum calu adodi kud i kind dhanu, man akethi ni jatelwic wi dhanu para Israel,

⁸ man ang’enyo ker woko kud i ot pa Daudi, amie iri de; ento ibedo calu jatic para ma Daudi ngo, m’uworo lembang’ola para, man m’uluba kud adundene ceke, kara etim gin m’ubedo atira i wang’a kende,

⁹ ento itimo dubo ma sagu dhanu ceke m’ular uwok iri, man icidho itimo iri mungu mange, kud ayi giracwia m’atwaga, kara unyai ng’ecwiny i ia, man ibaya i ng’ei:

¹⁰ ka kumeno, nen, abikelo lembe ma rac wi ot pa Yeroboam, man abikabu nyithindho ceke ma co kubang’gi kubang’gi ku ba Yeroboam, ng’atu ma juciko bang’e ku ng’atu m’ubedo agonya i kind Israel, man abiyweyo ot pa Yeroboam woko kot, calu ng’atu m’uyweyo weyo woko, maram ebithum ko ceke.

¹¹ Dhanu pa Yeroboam m’utho i adhura gwogi bicamu; man ng’atu m’utho i podho winyo ma kor polo bicamu: kum Yehova yero maeni.

¹² Ka kumeno ai, cidh i ot peri: e kinde ma tiendi mondo i adhura, nyathinne bitho.

¹³ Man Israel ceke biywage, man gibiyike; kum en e kende m’e pa Yeroboam m’ebicidho i liel, kum junwang’u gin moko ma ber i ie i ot pa Yeroboam yo ba Yehova, Mungu mir Israel.

¹⁴ Mange ke Yehova biting’o ire ubimo wi Israel, ma bikabu ot pa Yeroboam woko i ceng’ maeca: ento ang’o? ebitimo kumeni kawono.

¹⁵ Kum Yehova bigoyo Israel, calu juyengo usi i pi; man ebimugo Israel kud i ng’om maeni ma ber m’emio ni kwarugi, man ebikethogi loka Kulo, kum gitimo mungu m’araga migi, ma ginyayu ko ng’ecwiny i Yehova.

¹⁶ Man ebimio Israel kum dubo pa Yeroboam, m’edubo, man m’eketho Israel udubo kudo.

¹⁷ E dhaku pa Yeroboam uai, man ecidho, ebino de i Tirza: man kinde m’ebino ba kamondo mi ot, nyathinne tho.

¹⁸ E Israel ceke giyike, man giywage, calku lembe pa Yehova, m’eyero ku jatic pare ma Ahija ma jabila.

¹⁹ Man dong tic pa Yeroboam, maram ekiedo ko, man maram ecamu ko ker, nen, gigore i kitabu mi lemkei mir ubimo mir Israel.

²⁰ Man nindo ma Yeroboam ucamu ie ker gi rundi pier ario wi ario: e enindo ku kwaru pare, man Nadab ma wode camu ker kakare.

Nindo mi Camuker pa Rehoboam

²¹ Man Rehoboam ma wod Suleman ucamu ker i Yuda. Rehoboam rundi pare pier ang’wen wi acel kinde m’emaku camu ker, man ecamu ker rundi apar wi abiro i Yerusalem, adhura ma Yehova goyo wie kud i suru ceke mir Israel, kara eketh nyinge keca; man nying’ min mire Nama ma Nyaamoni.

²² Man Yuda timo gin ma rac i wang’ Yehova, e ginyayu ngiri i ie ku dubo migi ma gitimo, ma sagu gin ceke ma kwaru migi timo.

²³ Kum gigomo igi ka ma malu bende, ku mbegi, man mungu m’araga, wi ungulu got ceke ma wiu kubang’e kubang’e, man the yen ceke m’uluk kubang’e kubang’e;

²⁴ man jusodomi nuti i ng’om bende: gitimo calku ginmajudagu ceke mi thek ma Yehova riemo woko i wang’ nyithindho mir Israel.

²⁵ Man etimbre i rundi mir abije p’ubimo ma Rehoboam, nia Cicak m’ubimo mi Misiri uidho malu kum Yerusalem;

²⁶ man ekabu piny m’akana woko kud i ot pa Yehova, ku piny m’akana mi ot p’ubimo; ekabu woko ceke: man ekabu ban ceke mi mola ma kwar woko ma Suleman utimo.

²⁷ Man ubimo ma Rehoboam utimo ban mi mola kakagi, man ekethogi i cing’ jego mi jukur, ma gwoko dhugola mi ot p’ubimo.

²⁸ Man ebedo kumeno, nia, ku ba mondo m’ubimo mondo ko i ot pa Yehova, jukur giyeyogi, man gidwokogi kendo i kusika mi gwok.

²⁹ Nie dong’ tic pa Rehoboam, ku gin ceke m’etimo, gigore i kitabu mi lemkei mir ubimo mi Yuda ngo?

³⁰ Man ali ni i kind Yeroboam ku Rehoboam thiri thiri.

³¹ Man Rehoboam unindo ku kwaru mire, e juyike ku kwaru mire i adhura pa Daudi: man nying’ min mire Nama ma Nyaamoni. E Abijam ma wode camu ker kakare.