1 Ubimo 11 - The Holy Bible In Alur (Lur) Revised Orthography

Judegi pa Suleman man Lokri Cen pare ku ba Yehova

¹ Nic ubimo ma Suleman umaru mon dupa ma juwirok, giku nya Farao, mon mi Jumoabi, ku Juamoni, ku Jeudomi, ku Jusidoni, ku Juhiti;

² mi thek ma Yehova wacu pigi ni nyithindho mir Israel kumae, Kud ucidh i kindgi, kadok gin de ku gimond i kindwu; kum gibiloko adundewu tok mungu migi andha: Suleman umoko kum joni i mer.

³ Man ebedo ku mon dak abiro, mon ma dongo, man mon m’araga dak adek; man mon pare loko adundene woko.

⁴ Kum etimbre, kinde ma Suleman uti, nia mon pare loko adundene tok mungu mange; man adundene bedo ndhu cu ngo ku Yehova Mungu pare, calu adunde Daudi ma won.

⁵ Kum Suleman ucidho tok Actoroth ma mungu ma dhaku mi Jusidoni, man tok Milkom ma ginmajudagu mi Juamoni.

⁶ Man Suleman utimo gin ma rac i wang’ Yehova, man elubo ndhu Yehova ngo, calu Daudi ma won utimo.

⁷ Suleman ulund ugomo ka ma malu ni Kemoc ma ginmajudagu mi Moab, wi got ma ni i wang’ Yerusalem, man ni Molek ma ginmajudagu mi nyithindho mir Amon.

⁸ Man etimo kumeca pi mon pare ceke ma juwirok, m’uwang’u udok ma ng’wice ng’ar man m’ulamu lam ni mungu migi.

⁹ Man ng’ecwiny unego Yehova kum Suleman, kum adundene lokre cen ku ba Yehova, Mungu mir Israel, m’unyuthre ire wang’ ario,

¹⁰ M’eng’olo ire de pi gin maeni, nia kud elub tok mungu mange: ento eworo lembe ma Yehova ng’olo ngo.

¹¹ Kum kumeno Yehova wacu ni Suleman kumae, Kum itimo maeni, man iworo lembariba para ku cik para de ngo, m’ang’olo iri, abing’enyo ker kud i beng’i andha, man abimie ni jatic peri.

¹² Ento abitime i nindo peri ngo, ni kum Daudi ma wuru: ento abing’enye kud i cing’ wodi.

¹³ Ento abing’enyo ker dho ngo; ento abimio suru acel ni wodi, ni kum Daudi ma jatic para, man ni kum Yerusalem m’agoyo wie.

¹⁴ Man Yehova ting’o jasend kum Suleman, en e Hadad ma Jaedomi: en e kodhi mir ubimo i Edom.

¹⁵ Kum etimbre, kinde ma Daudi ni i Edom, man Yoab ma jego mir udul uidho malu kara eyik ju ma junegogi, man egoyo co kubang’gi kubang’gi i Edom

¹⁶ (kum Yoab man Israel ceke gibedo kuca dwi abusiel, cil m’enego ko co ceke kubang’gi kubang’gi i Edom);

¹⁷ nia Hadad uringo, en ku Juedomi moko ma jutic pa won gikugi, kara gicidh i Misiri, nwang’u fodi Hadad nyathin ma nyanok.

¹⁸ Man giai kud i Midian, e gibino Paran; man gigamu dhanu kugi kud i Paran, e gibino Misiri, ba Farao m’ubimo mi Misiri, m’umio ire ot, man eng’olo ire pi cemo, emio ire ng’om de.

¹⁹ E Hadad unwang’u bero ma dit i wang’ Farao, ketho nia emio ire yore ni dhaku, en e nyamin Tapenez m’ubimo ma dhaku.

²⁰ Man nyamin Tapenez unyolo ire Genubath ma wode, ma Tapenez uketho ekwiro cak i ot pa Farao; man Genubath ni i ot pa Farao i kind wot Farao.

²¹ Man kinde ma Hadad uwinjo ku i Misiri nia Daudi nindo ku kwaru mire, man nia Yoab ma jego mir udul utho, Hadad uwacu ni Farao kumae, Wek aai kara acidh i ng’om para ma dhe.

²² Farao lund uwacu ire kumae, Ento ang’o m’urem iri i bang’a, nia, nen, m’ibeyenyo icidh i ng’om peri ma dhe? Man eloko lembe kumae, Gin moko mbe: ento wek aai kende.

²³ Man Mungu ting’o jasend mange ire, en e Rezon ma wod Eliada, m’upiei ni rwoth pare ma Hadadezer m’ubimo mi Zoba.

²⁴ Man ecoko dhanu i bang’e, man edoko jego wi udul, kinde ma Daudi nego ju m’i Zoba: man gicidho Dameski, gibedo de i ie, man ecamu ker i Dameski.

²⁵ Man en e jasend mir Israel i nindo ceke pa Suleman, m’umedo gin ma rac ma Hadad utimo: e edagu Israel, man ecamu ker wi Cami.

²⁶ Man Yeroboam ma wod Nebat, ma Jaefraimi ma Zereda, ma jatic pa Suleman, ma nying’ min mire Zerua, ma dhaku ma cware tho, en bende eting’o cinge malu kum ubimo.

²⁷ Man maeni en e lembe m’uketho eting’o cinge malu kum ubimo: Suleman ugomo Milo, man eyiko ka m’umor i adhura pa Daudi ma won.

²⁸ Man ng’atu ma Yeroboam en e dhanu ma tek ma jarukara; e Suleman uneno nia jalawobine en e ng’atu ma kume mor, man emio ire ng’ol wi tic ceke mi ot pa Yusuf.

²⁹ Man etimbre i nindo maeca, kinde ma Yeroboam uwok woko kud i Yerusalem, nia jabila ma Ahija ma Jaciloni nwang’e i yo; nwang’u Ahijane ronjre ku kendi ma nyen; e gin ario gibedo gikendgi i podho.

³⁰ Man Ahija maku kendi ma nyen ma ni i kume, man eyece thek apar wi ario.

³¹ Man ewacu ni Yeroboam kumae, Gam thek apar iri; kum Yehova, Mungu mir Israel, uwacu kumae, Nen, abing’enyo ker kud i cing’ Suleman, man abimio suru apar iri

³² (ento ebibedo ku suru acel, ni kum jatic para ma Daudi man ni kum Yerusalem, ma en e adhura m’agoyo wie kud i suru ceke mir Israel);

³³ kum giweka, man girwo ni Actoroth ma mungu ma dhaku mi Jusidoni, ku Kemoc ma mungu mi Moab, man Milkom ma mungu mi nyithindho mir Amon; man giwotho i yo para ngo, kutimo gin m’atira i wang’a, man kuworo cik para ku lembapoka para, calu Daudi ma won utimo.

³⁴ Ento abikabu ker dho kud i cinge ngo; ento abikethe ni jatelwic i nindo ceke m’ecamu ie ng’om, ni kum Daudi ma jatic para m’agoyo wie, m’uworo lembang’ola para ku cik para;

³⁵ ento abikabu ker kud i cing’ wode, man abimie iri, en e suru apar.

³⁶ Man abimio suru acel ni wode, kara Daudi ma jatic para ubed ku thala thiri thiri i Yerusalem i wang’a, adhura m’agoyo wie kara aketh nyinga keca.

³⁷ Man abigemi, e ibicamu ker calku yeny ceke ma ng’eyong’ec peri yenyo, man ibibedo ubimo wi Israel.

³⁸ Man ebibedo tek ibiwinjo lembe ceke m’ang’olo iri, man ibiwotho i yo para, man ibitimo gin m’atira i wang’a, kara iwor cik para ku lembang’ola para calu Daudi ma jatic para timo; nia wabibedo wakudi, man abigomo iri ot ma tek, calu agomo ni Daudi, man abimio Israel i beng’i.

³⁹ Man abisendo kodhi Daudi pi maeni, ento mi nja re ngo.

⁴⁰ Ka kumeno Suleman uyenyo eneg Yeroboam; ento Yeroboam uai, man eringo i Misiri, ba Cicak m’ubimo mi Misiri, man ebedo i Misiri maram tho pa Suleman uwok ko.

Tho pa Suleman

⁴¹ Nie dong’ tic pa Suleman ku gin ceke m’etimo, ku rieko pare, gigore ngo i kitabu mi tic pa Sulemani?

⁴² Man nindo ma Suleman ucamu ie ker i Yerusalem wi Israel ceke en e rundi pier ang’wen.

⁴³ E Suleman unindo ku kwaru pare, man juyike i adhura pa Daudi ma won: e Rehoboam ma wode camu ker kakare.