1 Samwil 9 - The Holy Bible In Alur (Lur) Revised Orthography

Juketho Saul ni Ubimo

¹ Nwang’u ng’atu moko nuti ma pa Benyamin, ma nyinge Kic, ma wod Abiel, ma wod Zeror, ma wod Bekorath, ma wod Afia, ma wod Jabenyamini, e ng’atu ma tek ma jarukara.

² Man wode nuti, ma nyinge Saul, e jalawobi man en e ng’atu ma ber: man ng’atu moko mbe i kind nyithindho mir Israel ma ber ma sage: ugambre wi goke ku malu de e sagu dhanu ceke ku dongone.

³ Man kana pa Kic, ma won Saul, girwinyo. Man Kic uwacu ni Saul ma wode kumae, Kawono gam jatic acel karacelo kudi, man iai, icidh iyeny kananegi.

⁴ E ekadhu kud i ng’om gudi pa Efraim, man ekadhu kud i ng’om Calica, ento ginwang’ugi ngo: gilund gikadhu kud i ng’om Calim, e gini keca ngo: man ekadhu kud i ng’om mi Jubenyamini, ento ginwang’ugi ngo.

⁵ Kinde ma gibino ba ng’om Zuf, Saul uwacu ni jatic pare ma ni bang’e kumae, Bin, wadoki, vwa maru weko pido pi kana, man cwinye maru ringo i kumwa.

⁶ E ewacu ire kumae, Nen kawono, dhanu pa Mungu nuti i adhura maeni, man en e ng’atu ma won yung; gin ceke m’ewacu timbre andha: kawono dong’ wacidh keca; kuno nyo ecopo yero iwa pi woth ma wacidho i ie.

⁷ Saul ulund uwacu ni jatic pare kumae, Ento, nen, tek wacidho, wabitero ang’o ni ng’atuno? kum kwen uthum i jamni mwa, man giramia mbe ma water ni dhanu pa Mungune: wabedo kud ang’o?

⁸ E jatic uloko lembe ni Saul kendo, ewacu kumae, Nen, abedo ku ng’et cekel mi mola ma tar mir ang’wende i cinga: abimio maeni ni dhanu pa Mungune, kara eyer iwa pi yo mwa.

⁹ (Con i Israel, kinde ma ng’atu moko cidho nipenjo lembe ba Mungu, ewacu kumae, Wubin, man dong’ wacidhu ba jaeulembe; kum ng’atu ma julwong’e Jabila kawono naka julwong’e Jaeulembe.)

¹⁰ Saul ulund uwacu ni jatic pare kumae, Iwacu dre; bin, dong’ wacidhi. Kum kumeno gicidho bang’ adhura ka ma dhanu pa Mungune ni i ie.

¹¹ Ka giidho ka ma aidha bang’ adhura, ginwang’u jumanyir ubecitwomo pi, e gipenjogi kumae, Jaeulembe ni keni?

¹² E giloko lembe igi, giwacu kumae, Enuti; nen, eni i weng’i: tim pio kawono, kum ewok tinuni i adhura; kum dhanu gibedo ku lam tin i ka ma malu.

¹³ Ka wumondo i adhura, e wubinwang’e pio pio, ma fokeidho ngo i ka ma malu nicamu; kum dhanu bicamu ngo ma fokebino ngo, kum emio mugisa wi lamne; man yo ku ng’eye ju ma julwong’ogi gicamu. Ka kumeno kawono wuidhi; kum i kinde maeni wubinwang’e.

¹⁴ E giidho malu bang’ adhurane; man ka giwok yor i adhurane, nen, Samwil uai ubino yor i bang’gi, kara eidh i ka ma malu.

¹⁵ Nwang’u Yehova nyutho ni Samwil ma fodi Saul kuwok ungo ceng’ acel, ewacu kumae,

¹⁶ Urwo unyoni abioro ng’atu acel i beng’i kud i ng’om Benyamin, e ibiwire ebed jatelwic mi dhanu para Israel; man ebibodho dhanu para kud i cing’ Jufilisti: kum aneno wi dhanu para, kum ywak migi wok i bang’a.

¹⁷ Man kinde ma Samwil uneno Saul, Yehova wacu ire kumae, Nen, ng’atu m’ayero pire iri! ng’atu maeni bibedo ku ng’ol wi dhanu para.

¹⁸ Saul ulund ucoro ceng’ni ba Samwil i dhugang’, man ewacu kumae, Wac ira, akwei, ka ma ot pa jaeulembe ni i ie.

¹⁹ E Samwil uloko lembe ni Saul, man ewacu kumae, An a jaeulembe; idh malu i wang’a i ka ma malu, kum wabicamu wakudu tinuni: man kugweno abiweki cidho, man abiyero iri gin ceke ma ni i adundeni.

²⁰ Man pi kana peri m’urwinyo ceng’ adek m’ukadhu, kud iketh pidoii i kumgi; kum ginwangri. Man gin ceke ma juketho cwiny i kume i Israel en e pi ng’a? En e piri ngo, man pi ot pa wuru ceke?

²¹ E Saul uloko lembe man ewacu kumae, An a Jabenyamini ngo, mi suru ma nok mir Israel ungo? man juot mwa e nok ma sagu juudi ceke mi suru pa Benyamin ungo? e kan iyero ira kumeni nedi?

²² Man Samwil ugamu Saul ku jatic pare, man ekelogi i kusika mi welo, man eketho gijany i ka ma cu i kind ju ma julwong’o, ma gi ceng’ni dhanu pier adek.

²³ Man Samwil uwacu ni jatedo kumae, Kel makapiny m’amio i beng’i, m’awacu pire iri kumae, Kethe i beng’i.

²⁴ E jatedo ting’o bamb, ku ma ni i wie, man ekethe i wang’ Saul. Man Samwil uwacu kumae, Nen, maeno ma jukanu! kethe i weng’i icam; kum cil i nindo ma jung’olo jukane iri, kum awacu kumae, Alwong’o dhanu. Kum kumeno Saul gicamu giku Samwil i ceng’ maeca.

²⁵ Man kinde ma giloro piny ku ka ma malu i adhura, e giweco giku Saul ku wi ot.

²⁶ E giai pir kugweno: man etimbre kinde ma mombwa thumo, nia Samwil ulwong’o Saul ku wi ot, ewacu kumae, Ai, kara aciki. Man Saul uai, man gicidho woko gin ario, en giku Samwil, woko.

²⁷ Ka gibeloro piny i kajik mir adhurane, Samwil uwacu ni Saul kumae, Wac ni jatic ukadh i wang’a (man ekadhu), ento ilar icung ti, kara aketh iwinj lembe pa Mungu.