1 Samwil 4 - The Holy Bible In Alur (Lur) Revised Orthography

¹ Man lembe pa Samwil ubino bang’ Israel ceke. Nwang’u Israel ucidho kum Jufilisti i lwiny, man gigonjo i ng’et Eben-ezer: man Jufilisti gonjo i Afek.

Jufilisti Yaku Sanduk pa Mungu

² Man Jufilisti githeri gigi kum Israel: man kinde ma gikiedo, jugoyo Israel i wang’ Jufilisti; man ginego kind njuru asikari m’i thim m’uyenyo romo dhanu rubanga ang’wen.

³ Man kinde ma dhanu bino i kagonjo, judongo mir Israel uwacu kumae, Nedi Yehova goyowa tin i wang’ Jufilisti? Dong’ wagemu sanduk mi lembariba pa Yehova kud i Cilo i bang’wa, kara ebin i kindwa, man elarwa kud i cing’ judegi mwa.

⁴ Kum kumeno dhanu gioro kwenda i Cilo; man gigamu sanduk mi lembariba pa Yehova mir udul ku kuca, m’ubedo wi kerubi: man wot Eli ario, gi Hofni ku Finehaz, gini keca karacelo ku sanduk mi lembariba pa Mungu.

⁵ Man kinde ma sanduk mi lembariba pa Yehova ubino i kagonjo, Israel ceke giwoi ku woi ma dit, ketho nia ng’om umor kendo.

⁶ Man ka Jufilisti giwinjo badwal mi woine, giwacu kumae, Badwal mi woi ma dit maeni ma ni i kagonjo mi Juebrania thelembene ang’o? Man ging’eyo nia sanduk pa Yehova bino i kagonjo.

⁷ Man lworo nego Jufilisti, kum giwacu kumae, Mungu bino i kagonjo. E giwacu kumae, Can i wiwa! kum ugambre con ngi wagi gin maeni fodubedo nuti ngo.

⁸ Can i wiwa! ng’a ma bibodhowa kud i cing’ mungu maeni ma teki? maeni gi mungu m’ugoyo Jumisiri ku thong’om ma kwonde tung’ tung’ ceke i langa.

⁹ Wubed tek, man wutimbru calu co, E wu Jufilisti, kara kud wubed jutic ni Juebrania, calu naka gibedo iwu: wutimbru calu co, man wukied.

¹⁰ E Jufilisti gikiedo, man gigoyo Israel, man giringo kubang’gi kubang’gi ng’atuman ba hema pare: e nek ma dit apila nuti; kum dhanu mir Israel ma ku tielo podho rubanga pier adek.

¹¹ Man juyaku sanduk pa Mungu; e wot Eli ario, ma Hofni ku Finehaz, junego.

¹² E ng’atu acel pa Benyamin uai kud i njuru asikari, man ebino i Cilo ceng’ nino, ku kendi pare m’uyec, man ku ng’om i wie.

¹³ Man kinde m’ebino, nen, Eli bedo wi kom pare dhu yo m’ebekio; kum adundene bemiel kum sanduk pa Mungu. Man kinde ma ng’atuca ubino i adhura, man eyero pire, adhurane ceke ywak.

¹⁴ Man kinde ma Eli winjo badwal mi ywakne, ewacu kumae, Badwal mi yakni maeni thelembene ang’o? E ng’atuno timo pio, man ebino eyero de ni Eli.

¹⁵ Nwang’u rundi pa Eli pier abung’wen wi abora; man wang’e cido, ketho nia ecopo neno piny ungo.

¹⁶ E ng’atuno wacu ni Eli kumae, An a ng’atu m’uai kud i njuru asikari, man aring’ni tinuni kud i njuru asikari. E ewacu kumae, Lembe timbre nenedi, woda?

¹⁷ E ng’atu m’ukelo rwonglembe loko lembe man ewacu kumae, Israel uringo i wang’ Jufilisti, man nek ma dit bende nuti i kind dhanu, man woti ario bende, Hofni giku Finehaz, githo, man juyaku sanduk pa Mungu.

¹⁸ E etimbre, kinde m’eyero pi sanduk pa Mungu, nia Eli podho ataru ku wi kom pare ng’et dhugang’; e ng’ute tur, man etho: kum en e dhanu m’uti, man e pek. Man nwang’u epoko lembe mir Israel rundi pier ang’wen.

¹⁹ E ci wode, ma dhaku pa Finehaz, ie nuti, e ceng’ni nyol: man lande m’ewinjo rwonglembe nia juyaku sanduk pa Mungu, man nia kwaru mire ku cware de githo, egung’ gire man enyol; kum moc ugoye.

²⁰ Man i kinde mi tho pare mon m’ucungo i vute giwacu ire kumae, Lworo kud unegi; kum inyolo nyathin ma nico. Ento edwoko lembe ngo, kadok pire de eparu ngo

²¹ Man ecaku nying’ nyathinne Ikabod, ewacu kumae, Dwong’ uweko Israel; kum juyaku sanduk pa Mungu, man kum kwaru mire ku cware.

²² E ewacu kumae, Dwong’ uweko Israel; kum juyaku sanduk pa Mungu.