1 Samwil 30 - The Holy Bible In Alur (Lur) Revised Orthography

Daudi Voyo Juamaleki

¹ Man etimbre, kinde ma Daudi ku dhanu pare gidok giwok Ziklag i ceng’ mir adege, nia Juamaleki giting’o lwiny kum ng’et ng’om ma yor ariwa ma piny, man kum Ziklag, man gigoyo Ziklag, giwang’e de ku mac,

² man giyaku mon ku gin ceke ma ni i ie, ma thindhoku ma dongo de: ginego moko ngo, ento gidok kugi, man gicidho i yo migi.

³ Man kinde ma Daudi ku dhanu pare giwok bang’ adhurane, nen, juwang’e ku mac; e mon migi ku wotgi, ku nyiggi, juyaku.

⁴ Daudi ku dhanu ma ni karacelo kude giting’o dwangi malu man giywak, maram tegogi doko umbe ko ma giywak ko.

⁵ E juyaku mon ario pa Daudi, Abinoam ma nya Yezreli, man Abigail ma naka ci Nabal ma Jakarmeli.

⁶ Man cwiny Daudi ng’abre dit; kum dhanu giyero pi canye ku kidi, kum can unego ng’eyong’ec mi dhanunegi ceke, ku ba dhanu ceke ng’atuman pi wote man pi nyige: ento Daudi udwokre gire tek ni kum Yehova Mungu pare.

⁷ Man Daudi wacu ni Abiathar ma jalam, ma wod Ahimelek kumae, Akwei, kel ugoke keni i bang’a. Man Abiathar ukelo ugoke keca ba Daudi.

⁸ Man Daudi penjo ba Yehova, ewacu kumae, Tek alubo tok udul maeni, abirubogi? Man eloko lembe ire kumae, Lub tokgi; kum ibirubogi andha, man gin moko mbe ma bidong’ m’ibigamu ngo.

⁹ Kum kumeno Daudi cidho, en ku dhanu dak abusiel ma gini karacelo kude, man gitundo ba kulo Bezor, ka ma ju ma juweko gidong’ i ie.

¹⁰ Ento Daudi lubo tokgi, en ku dhanu dak ang’wen; kum dhanu dak ario gidong’ cen, ma givoc ketho gicopo kadhu kulo Bezor ungo.

¹¹ Man ginwang’u Jamisiri i thim, e gikele ba Daudi, man gimie kwen, e ecamu; man gimio ire pi emadhu;

¹² man gimio ire ng’et kwend ubolo, man njuru nyingulok m’uthwo ario: e kan edaru camu, tipone dwogo kendo i kume; kum ecamu kwen moko ngo, kadi pi moko de emadhu ngo, ceng’ adek ku diewor adek.

¹³ Man Daudi wacu ire kumae, In i pa ng’a? man iai kani? Man ewacu kumae, An a jalawobi ma Misiri, jatic pa Jaamaleki; man jadit para weka, kum ceng’ adek m’ukadhu kuma maka.

¹⁴ Wating’o lwiny wi ng’et ng’om ma yo piny mi Jukerethi, man wi ng’et ng’om ma pa Yuda, man wi yor ariwa ma piny pa Kaleb; man wawang’u Ziklag ku mac.

¹⁵ Man Daudi wacu ire kumae, Ibitera piny bang’ udul maeni? Man ewacu kumae, Kwong’ ira ku Mungu, nia ibinega ngo, kadi ibimia ngo i cing’ jadit para, e abiteri piny bang’ udul maeni.

¹⁶ E kinde m’etere piny, nen, gimoiri foo wi ng’om ceke, gibecamu gibemadhu de, man gimielo miel, kum ayeki ceke ma dit ma gigamu kud i ng’om mi Jufilisti, man kud i ng’om Yuda.

¹⁷ Man Daudi goyogi ugambre ma mombwa thumo cil uthieno mir urwone: man ng’atu acel de mbe i kindgi m’uboth, ndhu awobi dak ang’wen kende m’uwotho ku wi ngamia, man giringo.

¹⁸ E Daudi gamu gin ceke ma Juamaleki giyaku kendo; man Daudi bodho mon pare ario.

¹⁹ Man gin moko mbe m’urem igi, kadok ma thindho kadi ma dongo, kadok wodo kadi nyir, kadok ayeki, kadi gin moko de mbe ma juyaku i bang’gi: Daudi gamu ceke kendo.

²⁰ Man Daudi yaku udul rombe ceke ku dhok ceke, ma gileko i wang’ lim maeno, man ewacu kumae, Maeni ayeki pa Daudi.

²¹ E Daudi bino ba dhanu dak arione, ma givoc hai ketho gicopo lubo Daudi ngo, ma giketho gibedo dhu kulo Bezor bende; man gicidho kara giromb ku Daudi, man giromb ku dhanu ma gini karacelo kude: e kinde ma Daudi tundo ceng’ni ba dhanunegi, epenjogi maram gibedo ko.

²² Man dhanu ceke ma rac ku dhanu ma judubo, kind ju ma gicidho giku Daudigi, gilund giloko lembe, man giwacu kumae, Kum wacidho wakugi ngo, wabimio igi kum ayeki ma wagamu kendo ngo, ndhu ni dhanu kubang’gi kubang’gi nga’tuman dhaku pare ku nyithindhe, kara egamgi, gicidhi.

²³ Daudi lund uwacu kumae, Wubitimo kumeno ngo, juwada, ku gin ma Yehova mio iwa, m’egwokowa, man emio udul maeni m’ubino i kumwa i cingwa.

²⁴ Man ng’a ma biwinjo dwendwu i lembe maeni? kum calu makapiny pa ng’atu m’uloro piny i lwiny ubedo, e makapiny pa ng’atu m’ubedo kum jamni de bibedo kumeca: gibipoko rom rom.

²⁵ Man etimbre kumeca ugambre i ceng’ maeca ku m’ulube, nia eketho ebedo ni cik man ni lembapoka ni Israel cil i ceng’ ma tin.

²⁶ Man kinde ma Daudi dwogo i Ziklag, eoro kum ayeki ni judongo mi Yuda, en e ni jurimbe, ewacu kumae, Nen, giramia iwu kum ayeki mi judegi pa Yehova:

²⁷ ni ju ma gini i Beth-el, man ni ju ma gini i Ramoth ma yo piny, man ni ju ma gini i Yatir,

²⁸ man ni ju ma gini i Aroer, man ni ju ma gini i Sifmoth, man ni ju ma gini i Ectemoa,

²⁹ man ni ju ma gini i Rakal, man ni ju ma gini i adhura mi Juyerameli, man ni ju ma gini i adhura mi Jukeni,

³⁰ man ni ju ma gini i Horma, man ni ju ma gini i Boracan, man ni ju ma gini i Athak,

³¹ man ni ju ma gini i Hebron, man i ka ceke ma Daudi ku dhanu pare gibegicidho i ie.