1 Samwil 3 - The Holy Bible In Alur (Lur) Revised Orthography

Yehova Lwong’o Samwil

¹ E nyathin Samwil utimo ni Yehova i wang’ Eli. Man lembe pa Yehova bedo rwa rwa i ceng’ maeca; lembanyutha bedo dit ungo.

² E etimbre i nindo maeca, kinde ma Eli vuto i kakare (nwang’u wang’e maku doko via via, ketho ecopo neno ngo),

³ man thala pa Mungu fokutho ngo, man Samwil uvuto kara enindi, i hekalu pa Yehova, ka ma sanduk pa Mungu ni i ie;

⁴ nia Yehova lwong’o Samwil: man ewacu kumae, Anuti.

⁵ Man eringo ba Eli, man ewacu kumae, Anuti; kum ilwong’a. Man ewacu kumae, Alwong’o ngo; vut piny kendo. Man ecidho evuto.

⁶ E Yehova lwong’o kendo, Samwil. Man Samwil uai ucidho bang’ Eli, man ewacu kumae, Anuti; kum ilwong’a. Man eloko lembe kumae, Alwong’o ngo, woda; vut kendo.

⁷ Nwang’u Samwil fodung’eyo Yehova ngo, kadok lembe pa Yehova de fodunyuthre ire ngo.

⁸ Man Yehova lwong’o Samwil kendo mir adege. E eai ecidho bang’ Eli, man ewacu kumae, Anuti; kum ilwong’a. E Eli neno nia Yehova lwong’o nyathinne.

⁹ Ka kumeno Eli wacu ni Samwil kumae, Dok, ivuti: man ebibedo, tek elwong’i, nia ibiwacu kumae, Yer, Yehova; kum jatic peri winjo. Kum kumeno Samwil ucidho man evuto kakare.

¹⁰ Man Yehova bino, ecungo, man elwong’o calu i kinde m’ande, Samwil, Samwil. Samwil ulund uwacu kumae, Yer; kum jatic peri winjo.

¹¹ Man Yehova wacu ni Samwil kumae, Nen, abitimo gin moko i Israel, ma ku ba ith dhanu ceke m’uwinjo pire ithe ario de bimor.

¹² I ceng’ maeno abitimo kum Eli gin ceke m’ayero pi ot pare, ugambre i thekrine cil kum kajikne.

¹³ Kum ayero ire nia abipoko lembe wi ot pare mi nja, kum dubo m’eng’eyo, kum wote gikelo kwong’ i wigi gigi, man ecerogi ngo.

¹⁴ Ka kumeno akwong’o ni ot pa Eli, nia dubo m’i ot pa Eli bikabre woko ngo ku lam kadi ku girathiera mi nja.

¹⁵ Man Samwil uvuto cil kugweno, man eyabu dhugola mi ot pa Yehova. E lworo nego Samwil ni nyutho ginmawokiwang’ ni Eli.

¹⁶ Eli lund ulwong’o Samwil, man ewacu kumae, Samwil, woda. Man ewacu kumae, Anuti.

¹⁷ Man ewacu kumae, Gindang’o ma Yehova yero iri? Akwei, kud imung’e ira; Mungu tim kumeni i beng’i, man ma sagu bende, tek imung’o lembe moko ira mi gin ceke m’eyero iri.

¹⁸ E Samwil uyero ire ceke kot, man emung’o gin moko ire ngo. E ewacu kumae, En e Yehova: wek etim gin m’ubedo ber ire.

¹⁹ E Samwil udongo, man Yehova ni kude, e eweko lem pare moko ngo upodh i ng’om.

²⁰ Man Israel ceke ugambre Dan cil Ber-ceba ging’eyo nia juketho Samwil ubed jabila pa Yehova.

²¹ E Yehova nyuthre kendo i Cilo; kum Yehova nyuthre gire ni Samwil i Cilo ku lembe pa Yehova.