1 Samwil 21 - The Holy Bible In Alur (Lur) Revised Orthography

Daudi Ringo Saul

¹ Daudi lund ubino i Nob bang’ Ahimelek ma jalam: man Ahimelek ubino kara eng’ol Daudi ma kume bemiel, man ewacu ire kumae, Nedi ibino i kendi, man ng’atu moko mbe karacelo kudi?

² Man Daudi wacu ni Ahimelek ma jalam kumae, Ubimo ng’olo ira tic, man ewacu ira kumae, Kud iyi ng’atu moko ng’ei gin moko pi tic m’aori i kume, man gin m’ang’olo iri: man ang’olo ni awobi i ka ma nyo, man ka ma nyo.

³ Ka kumeno kawono ang’o ni the cingi? mi ira lungu kwen abic i cinga, kadi gin ma tek nuti.

⁴ Man jalam uloko lembe ni Daudi, ewacu de kumae, Kwen moko ma sai umbe the cinga, ento kwen ma leng’ nuti; ndhu tek awobi gigwokri gigi ni mon.

⁵ Man Daudi loko lembe ni jalamne, man ewacu ire kumae, Andha jucero iwa mon i ceng’ adek maeni; kan awok woko, nwang’u piny mir awobi maeni gi leng’, kadok en e woth ma thiri thiri; tin piny migi bibedo leng’ ma sagu dit ungo?

⁶ Kum kumeno jalamne umio ire kwen ma leng’; kum kwen moko mbe keca ndhu kwen m’anyutha, ma jugamu kud i wang’ Yehova, kara juketh kwen ma mor kakare ceng’ ma jukabe.

⁷ Nwang’u ng’atu moko ma kind jutic pa Saul ni keca i ceng’ maeca, ma jucere i wang’ Yehova; ma nyinge Doeg ma Jaedomi, en e jakwac ma jadit pa Saul.

⁸ Man Daudi wacu ni Ahimelek kumae, Palamularu kadi tong’ moko nuti i beng’i? kum abino ku palamularu para ngo kadi jamcinga de, kum lembe p’ubimo en e ma pio.

⁹ Man jalam uwacu kumae, Palamularu pa Goliath ma Jafilisti, m’inego i poga mi Ela e ma nuti, nen, ebedo aboya ku bongu keni i ng’ei ugoke: tek ibigamu maeno, game; kum mange mbe ndhu maeno e ma ni keni. Man Daudi wacu kumae, Moko mbe ma calu maeno, mie ira.

¹⁰ E Daudi ai malu, man eringo i ceng’ maeca ni lworo pa Saul, man ecidho ba Akic m’ubimo mi Gath.

¹¹ Man jutic pa Akic giwacu ire kumae, Maeni en e Daudi m’ubimo mi ng’om ungo? giwero pire man ni wadi man ni wadi i miel ungo giwacu kumae, Saul unego pare rubanga, Man Daudi pare rubanga apar ungo?

¹² E Daudi kanu lembe maeni i adundene, man lworo nege dit kum Akic m’ubimo mi Gath.

¹³ Man eloko bedo pare i wang’gi, man epale gire nia en e abelu i cing’gi, man egoro wi dlmgoia mi dhugang’, man eweko laudhoge cwir wi tike.

¹⁴ Akic ulund uwacu ni jutic pare kumae, Nen, wunen ng’atuno en e abelu; ka kumeno nedi wukele i bang’a?

¹⁵ Abelu mbe i bang’a ambeya, m’uketho wukelo janduni ubin utim abelu i vuta? janduni bimondo i ot para?