1 Samwil 20 - The Holy Bible In Alur (Lur) Revised Orthography

Lembariba mi Mer i kind Daudi ku Yonathan

¹ Man Daudi ringo kud i Naioth i Rama, man ebino, ewacu de i wang’ Yonathan kumae, Atimo ang’o? kier para en e ang’o? man dubo para en e ang’o i wang’ wuru, m’uketho eyenyo kwo para?

² Man ewacu ire kumae, Awene; ibitho ngo: nen, vwa timo gin moko ngo kadok ma dit kadi ma nok de ngo, ma k’eyero ira ngo; man vwa mung’o maeni ira mir ang’o? en e kumeno ngo.

³ Man kendo Daudi kwong’o man ewacu kumae, Wuru ng’eyo andha nia anwang’u bero i weng’i; man ewacu kumae, Yonathan kud ung’ei maeni, can umaru nege: ento andha calu Yehova bedo kwo, man calu ng’eyong’ec peri bedo kwo, dakutielo acel kende ma ni i kindwa waku tho.

⁴ Yonathan ulund uwacu ni Daudi kumae, Gin ma tek ng’eyong’ec peri yenyo, abitime iri.

⁵ Man Daudi wacu ni Yonathan kumae, Nen, urwo dwi bipor, man maku kud akwer bedo kud ubimo dhu cemo: ento wek acidhi, kara apond i podho cil i ceng’ mir adege uthieno.

⁶ Tek wuru neno nia ambe, e iwac kumae, Daudi penja ngili ngili nia ayi ering i Beth-lehem m’adhura pare; kum en e lam ma ku ba rundi kuca ni wat ceke.

⁷ Tek ewacu kumae, Ebedo dre; jatic peri bibedo ma cwinye kwio: ento tek kwinyo nege, ibilund ng’eyo nia ekeco lembe ma rac.

⁸ Ka kumeno tim ku bero ku jatic peri; kum ikelo jatic peri i lembariba pa Yehova karacelo kudi: ento tek kier ni i ia, nega in giri; kum nedi ikela ba wuru?

⁹ Man Yonathan uwacu kumae, Ebed bor i kumi; kum tek ang’eyo nia vwa keco lembe ma rac moko nyanok i kumi, e ayero iri ngo?

¹⁰ Daudi lund uwacu ni Yonathan kumae, Ng’a ma biyero ira tek kuno wuru dwoko lembe iri ma teki?

¹¹ E Yonathan uwacu ni Daudi kumae, Bin, wek wacidh i podho. E gicidho gin ario i podho.

¹² Man Yonathan uwacu ni Daudi kumae, Yehova, Mungu mir Israel, ubed lamulembe: kinde m’arondo vwa urwo calu unyoni, kadi i ceng’ mir adege, nen, tek bero nuti yo ba Daudi, abilund oro kwenda i beng’i ngo, man anyuthe iri ngo?

¹³ Yehova tim kumeno ba Yonathan, man mange bende, tek ebibedo ber ni vwa ya etimi rac, tek atuce iri ngo, man aciki ngo, kara icidh ku kwiocwiny: man Yehova bed kudi, calu ebedo ku vwa.

¹⁴ Man ibinyutho ira mer mi bero pa Yehova i nindo m’abedo ie kwo kende ngo, kara kud atho;

¹⁵ ento ibijigo bero peri ngo bende kud i ot para mi nja; ungo, kadok kinde ma Yehova kabu judegi pa Daudi kubang’gi kubang’gi kud i wang’ ng’om.

¹⁶ Kum kumeno Yonathan utimo lembariba ku ot pa Daudi, ewacu kumae, Man Yehova bilwong’e i cing’ judegi pa Daudi.

¹⁷ E Yonathan uketho Daudi ukwong’ kendo, ni kum mer m’emare ko; kum emare calu emaru ng’eyong’ec pare gire.

¹⁸ Yonathan ulund uwacu ire kumae, Urwo dwi bipor; man jubiyenyi, kum kom peri bibedo kende.

¹⁹ Man kan ibedo ceng’ adek, ibiloro piny pio, man ibibedo i ka m’ipondo i ie kinde ma jubeneno i lembe maeni, man ibidong’ kum kidi Ezel.

²⁰ Man abikilo athero adek i ng’ete, calu abekilo girakila.

²¹ Man, nen, abioro nyathin, abiwacu kumae, Cidhi, yeny athero. Tek awacu ni nyathinne kumae, Nen, athero ni yor i ng’ei; gamgi, man ibin; kum kwiocwiny ni i beng’i man lem ma rac ungo, calu Yehova bedo kwo.

²² Ento tek awacu kumae ni nyathinne, Nen, athero gini i weng’i; cidh i yo peri; kum Yehova ketho icidhi.

²³ Man lembe ma wayero pire wakudi, nen, Yehova ni i kindwa wakudi mi nja.

²⁴ Kum kumeno Daudi pondo i podho; e kinde ma dwi por, ubimo bedo piny kara ecam cemo.

²⁵ Man ubimo bedo wi kom pare calu ma naka, wi kom ma ni i ng’et gang’; e Yonathan ucungo, man Abner ubedo i ng’et Saul: ento kaka Daudi dong’ kende.

²⁶ Ento Saul uyero lem moko ngo i ceng’ maeca: kum ie paru kumae, Gin moko time, e leng’ ungo; andha e leng’ ungo.

²⁷ Man etimbre urwone yo ng’ei por pa dwi, ma en e ceng’ mir arionde, nia kaka Daudi dong’ kende: man Saul uwacu ni Yonathan ma wode kumae, Nedi wod Yese bino ngo ba cemo, kadok nyaworo, kadi tini?

²⁸ Man Yonathan uloko lembe ni Saul kumae, Daudi penjo ngili ngili nia ayi eci Beth-lehem:

²⁹ man ewacu kumae, Wek acidhi, akwei; kum wat mwa gibedo ku lam i adhura; man umira ng’olo ira nia abed kuca: man kawono tek anwang’u bero i weng’i, wek acidhi, akwei, man anen utumira. Ka kumeno ebino ngo dhu mesa p’ubimo.

³⁰ Ng’ecwiny pa Saul ulund uopo kum Yonathan, man ewacu ire kumae, In i wod dhaku ma jaswa ma jaco de, nwang’u ang’eyo ngo nia ifoyo wod Yese ni lewic peri giri, man ni lewic mi muneru pa meru?

³¹ Kum ma fodi wod Yese bedo kwo wi ng’om, ibicungo ngo, kadi ker peri de. Kum kumeno kawono ior kwenda man ikele i bang’a, kum ebitho andha.

³² Man Yonathan uloko lembe ni Saul ma won, man ewacu ire kumae, Nedi juketho etho? etimo ang’o?

³³ Man Saul ucobe ve ku tong’ kara ecobe; ni kum maeni Yonathan ung’eyo nia won ukeco ya eneg Daudi.

³⁴ Kum kumeno Yonathan uai malu ku dhu mesa ku ng’ecwiny ma lake tek, man ecamu cemo ngo i ceng’ mir arionde mi dwije; kum can unege pi Daudi, kum won udieiig’o cwinye.

³⁵ Man etimbre kugweno, nia Yonathan ucidho i podho i kinde m’eng’olo ni Daudi, man nyathin ma nok ni karacelo kude.

³⁶ Man ewacu ni nyathin pare kumae, Ringi, iyeny athero m’akilo kawono. Man ka nyathinne ringo, ekilo athero yor i wang’e.

³⁷ Man ka nyathin ubino i ka ma Yonathan ukilo ie athero, Yonathan ulwong’o nyathinne, ewacu kumae, Athero ni yor i weng’i ngo?

³⁸ E Yonathan ulwong’o nyathin kumae, Ci pio, ku morkumi, kud igal. E nyathin pa Yonathan ucoko athero, man edwogo ba jadit pare.

³⁹ Ento nyathinne ng’eyo gin moko ngo: ndhu Yonathan ku Daudi kende e m’ung’eyo lembene.

⁴⁰ E Yonathan umio jamcinge ba nyathin pare, man ewacu ire kumae, Cidhi, tergi i adhura.

⁴¹ Man kinde ma nyathinne cidho, Daudi ai ku ka ma yor ariwa ma piny, man epodho arieba wang’e i ng’om, man erum gire wang’ adek: e gicwio limbgi, man giywagri, maram Daudi sagu ko.

⁴² Man Yonathan uwacu ni Daudi kumae, Cidh ku kwiocwiny, kum wadaru kwong’o wan ario ku nying’ Yehova, wawacu kumae, Yehova bibedo i kindwa wakudi, man i kind kodhina ku kodhini, mi nja. Man eai ecidho de: man Yonathan udok i adhura.