1 Samwil 18 - The Holy Bible In Alur (Lur) Revised Orthography

Lembariba pa Yonathan giku Daudi

¹ Man etimbre, kinde m’edaru weco ku Saul, nia ng’eyong’ec pa Yonathan uribre ku ng’eyong’ec pa Daudi, man Yonathan umare calu ng’eyong’ec pare gire.

² Man Saul ugame ceng’ maeca, man eyio ngo edok kendo ba ot pa won.

³ Yonathan giku Daudi gilund gitimo lembariba, kum emare calu ng’eyong’ec pare gire.

⁴ Man Yonathan uwodho kanzu kud i kume, man emie ni Daudi, ku kendi pare, cil palamularu pare, man atum pare, ku thond piere de.

⁵ Man Daudi cidho ka ma tek Saul uore, man etimbre gire ku rieko: man Saul ukethe wi dhanu mir ali, man ebedo ber i wang’ dhanu ceke, man i wang’ jutic pa Saul bende.

Kumira Nego Saul kum Daudi

⁶ Man etimbre kinde ma gibino, kinde ma Daudi ai ba nek mi Jufilisti, nia mon giai ku i adhura mir Israel ceke, ma gibewero wer man gibemielo miel, kara giromb kud ubimo ma Saul, kud umbukulumbu, ku mutoro, man ku jam badwal.

⁷ E mon giwero wer man ni wadi man ni wadi ka gibegoyo, man giwacu kumae, Saul unego rubanga pare, Man Daudi rubanga apar pare.

⁸ Man kwinyo ma dit unego Saul, man wec maeni ton i ie; e ewacu kumae, Gikwanu ni Daudi rubanga apar, man ira gikwanu rubanga kende: man ecopo bedo kud ang’o mange ndhu keri?

⁹ E Saul uketho wang’e i kum Daudi ugambre i ceng’ maeca ku m’ulube de.

¹⁰ Man etimbre urwone, nia tipo ma rac m’uai ba Mungu ubino wi Saul ku tego, man eewo lembe i die ot; man Daudi goyo ku cinge, calu ebedetimo ceng’ ku ceng’. Man Saul ubedo ku tong’ pare i cinge;

¹¹ e Saul ucobo tonge; kum ewacu kumae, Abigoyo Daudi cil kum kor ot. E Daudi uc kud i vute wang’ ario.

¹² E lworo nego Saul kum Daudi, kum Yehova ni kude, man eai ku ba Saul.

¹³ Ka kumeno Saul ucore cen kud i kume, man ekethe ni jego pare wi rubanga; man ewok woko emondo de i wang’ dhanu.

¹⁴ E Daudi timbre gire ku rieko i yo pare ceke; man Yehova ni kude.

¹⁵ Man ka Saul uneno nia etimbre gire ku rieko ma dit, elwore.

¹⁶ Ento Israel ceke ku Yuda de gimaru Daudi; kum ewok woko man emondo i wang’gi.

¹⁷ E Saul uwacu ni Daudi kumae, Nen, nyara ma jadit ma Merab, abimie iri ni dhaku: endre ibed jakero ira, man ikied lwiny pa Yehova. Kum Saul uwacu kumae, Cinga kud ubed i wie, ento wek cing’ Jufilisti ubed i wie.

¹⁸ Man Daudi wacu ni Saul kumae, An a ng’a, man kwo para en e ang’o, kadi wat pa vwa i Israel, ma nia abed jalwod ubimo?

¹⁹ Ento etimbre i nindo ma maku jumi Merab, ma nya Saul, ni Daudi, e judong’ jumie ni Adriel ma Jameholathi ni dhaku.

²⁰ Man Mikal, ma nya Saul, umaru Daudi: e giyero ni Saul, man lembene nyayu mutoro i ie.

²¹ E Saul uwacu kumae, Abimie ire, kara ebed ni uwic ire, man kara cing’ Jufilisti ubed i kume. Kum kumeno Saul uwacu ni Daudi kumae, Tinuni ibibedo jalwoda wang’ arionde.

²² Man Saul ung’olo ni jutic pare, ewacu kumae, Wuwac ni Daudi ling’ ling’, man wuwac kumae, Nen, ubimo bedo ku mutoro i kumi, man jutic pare ceke gimeri: ka kumeno kawono bed jalwod ubimo.

²³ Man jutic pa Saul giyero lembe maeni i ith Daudi. E Daudi wacu kumae, Bedo jalwod ubimo en e lembe ma nok kud i weng’wu, kum an a ng’atu ma jacan, man jufoya hai ungo?

²⁴ E jutic pa Saul giyero ire, giwacu kumae, Daudi wacu kuman kuman.

²⁵ Man Saul uwacu kumae, Wubiwacu ni Daudi kumae, Ubimo yenyo keny moko ngo, ento dendkum m’i kendi mi Jufilisti ma co dak acel, kara ecul kwor kum judegi p’ubimo. Nwang’u i Saul upido nia eketh Daudi upodh ku cing’ Jufilisti.

²⁶ Man ka jutic pare giyero lembe maeni ni Daudi, enyayu mutoro i Daudi nia ebed jalwod ubimo. Man fodi nindo thum ungo;

²⁷ e Daudi ai man ecidho, en ku dhanu pare, man ginego kind dhanu mi Jufilisti dak ario; man Daudi kelo dendkumgi m’i kendi, man gimiogi ni ubimo ku welgi bo, kara ebed jalwod ubimo. Man Saul umio ire Mikal ma nyare ni dhaku.

²⁸ E Saul uneno eng’eyo de nia Yehova ni karacelo ku Daudi; man Mikal, ma nya Saul, umare.

²⁹ Man lworo nego Saul m’usagu kum Daudi; e Saul en e jadegi pa Daudi thiri thiri.

³⁰ Judongomawijo mi Jufilisti gilund giwok woko: man etimbre, ku ba wok ma giwok ko woko, nia Daudi timbre gire ku rieko ma sagu jutic ceke pa Saul; kum kumeno nyinge bedo ku pak ma dit.